ئه‌ڤرۆ نيوز:
ل سه‌رچوونا پێشمه‌رگه بۆ كۆبانێ، مه‌سعود بارزانى، سه‌رۆكێ هه‌رێما كوردستانێ په‌يامه‌ك به‌لاڤكر و تێدا ئاشكه‌را كر كو په‌لامارا داعش بۆ سه‌ر هه‌رێما كوردستانێ و رۆژئاڤايێ كوردستانێ ئه‌و دره‌نده‌يى و بێره‌حمى به‌رامبه‌ر گه‌لێ كورد ئه‌نجام دايه و زۆر ب رۆهنى نيشان دده‌ت كو تيرۆرستێن داعش نه ب تنێ ژ لايێ ئاينى ڤه به‌لكو ژ دژى ئاينى و ره‌گه‌زپه‌رستيێ نه.
پشتى ده‌مه‌كێ كێم چاڤه‌رێ په‌يامێ بن ب زاراڤێ بادينى…
ئه‌ڤرۆ نيوز:
جێگرێ سه‌رۆك كۆمارێ عيراقێ، ئوسمامه نوجێفى، خواست كو له‌ز د ئازادكرنا مووسل دا بهێته كرن و زێده‌تر نه‌مينيته ل ژێر ده‌ستێ داعش و ل دۆر كێشێن ئاواران ژى ئاشكه‌را كر كو كێشێن ئاواران ژى ژ شيانێن هه‌رێمێ يێن ده‌ركه‌فنيت.
د به‌ياننامه‌كێ دا كو ژ نڤيسينگه‌ها نوجێفى دا ده‌ركه‌فتى يه، تێدا ئاماژه ب وێ چه‌ندێ كريه كو رۆژا چارشه‌مبى ئۆسامه نوجێفى ل گه‌ل سه‌رۆكێ جڤاتا پارێزگه‌ها نه‌ينه‌وا بشار كيكى و ئه‌ندامێن جڤاتێ ل گه‌ل وه‌زيرێ به‌ره‌ڤانيێ و وه‌زيرێ په‌روه‌ردێ و وه‌زيرێ پلاندانانێ و هژماره‌كا ئه‌ندامێن جڤاتا نوونه‌ران كۆمبوو.
د ڤێ نڤيسارێ دا هاتيه: “ئه‌م نوكه باش دزانين ئاواره د چ ره‌وش دانه و نوكه رێژا وان ژ شيانێن هه‌رێما كوردستانێ د چاڤدان و خزمه‌تكرنا وان دا زێده‌تر لێ هاتينه و ئه‌ڤه پێدڤى ب شيانێن هه‌وه هه‌يه، چونكو هه‌ر ئێك ژ هه‌وه نوونه‌راتيا پشكه‌كا نه‌ينه‌وا دكه‌ت”.
ب گۆره‌ى ڤێ نڤيسارێ ئاماژه ب وێ چه‌ندێ ژى كريه كو ئه‌ڤا داعش كرى به‌رى نوكه چو ماڤيا نه‌كريه كو ژ هه‌موو ئه‌ته‌كێتێن مرۆڤايه‌تى ده‌رچوويه كو ژ 60 هه‌تا 70 وه‌لاتان ل جيهانێ د پشكدارن كو ب ره‌نگه‌كى دژى هه‌موو ئاين و نه‌ته‌وه و مه‌زهه‌بان كار دكه‌ت و مه‌ترسيه ل سه‌ر هه‌موو جيهانێ.
ژ لايێ خوه ڤه بشار كيكى سه‌رۆكێ جڤاتا پارێزگه‌ها نه‌ينه‌وا دياركر كو پێدڤيه كريارا رزگاركرنا نه‌ينه‌وا گيرۆ نه‌بيت ب هيڤيا پشته‌ڤانيا له‌شكرى و چه‌كى.
ئه‌ڤرۆ نيوز:
ل گەلەک جھان ڤەخوارنێن ھێزێ دھێنە قەدەغەکرن و ل گەلەک جھان ژی چو گرنگی ب زیانێن وێ ناھێتە دان، پرسیار گەلەک دھێنە کرن، ئەرێ ڤەخوارنێن ھێزێ ژی وەکو یێن غازی نە؟ یانژی جوداھیەک دناڤبەرا واندا ھەیە و بۆچی خەلک رۆژانە فێر دبنێ و مەترسی و مفایێن وان چنە؟ و ئەرێ بۆچی ل گەلەک جھێن دی ب شێوەیەکێ بەرچاڤ دھێنە فرۆتن و چو زێرەڤانی ژی ل سەر نینە؟
یا مە دڤێت دیاربکەین ئەوە کو ل ھەموو وەلاتان گەلەک ریکلام بۆ ڤان جورە ڤەخوارنان دھێتە کرن و ل گەل وێ چەندێ ژی ھندەک کومپانیان دەست پێ کریە و ب ھەروە ددەنە گەنجان و یا دروست ڤەخوارنێن ھێزێ تا رادەیەکێ بەرچاڤ زیانێن خوە ل سەر ساخلەمیا زارۆ و سنێلەیان ھەنە و ب تایبەت ھەکە رۆژانە پتر ژ قودیکەکێ ڤەخوون و زیانێن وێ ئەوە کو رێژا کافایینی دناڤ لەشیدا زێدەدکەت و لێدانێن دلی زێدەدبن و خوین زووتر دگەھیتە ماسلکە و زەڤلەکێن لەشی و کێم دگەھیتە پیستی.
ڤەخوارنێن ھێزێ دپێکھاتینە ژ گەلەک شەکرا زوو ھەرس دبیت و ئەڤە دبیتە ئەگەر مرۆڤ ھەست ب ھێزەکا مەزن بکەت و ل گەل ڤێ چەندێ ژی ل سەر پتریا قودیکێن وان نەھاتیە نڤیسین کا چەند کافایین یان ھێز دناڤدا ھەیە.
کافایین کەرستەیەکێ بێھوشکەرە و ئیدمانێ پەیدادکەت و ھەکە بۆ دەمەکێ درێژ ھاتە ب کارئینان نەدوورە ئالوزیێ بۆ مرۆڤی پەیدابکەت و لێدانێن دلی زیدەببن و ئاریشە د نڤستنێ دا ل گەل ھندەک نیشانێن دەروونی و سەرئێشان پەیداببن.
ڤەکولینێن پزیشکی دیاردکەن کو ڤەخوارنێن ھێزێ ھاریکارن بۆ بلندبوونا فشارا دلی و رێژا شەکرێ دخوینێ دا و خوین بەربوونا دفنێ و ئاریشەیێن کرمیبوونا ددانان و کومپانی ژی ل سەر دنڤیسن کو نابیت نەخۆشێن شەکرێ و ئەوێن ھەستداری ب کافایینی ھەبیت ب کاربینن و ھندەک کومپانی نەخۆشێن دلی و ژنێن دوگیان ژی ل سەر وێ لیستێ زێدەدکەن.
بلا ژبیرنەکەین ژی کو ئەو ڤیتامینێن ل سەر ڤان ڤەخوارنان دھێنە زێدەکرن وەکو ڤیتامین (بانتوتینیک و ڤیتامین بی و بی ١٢) ب مفانە بۆ وان کەسێن ئەڤ ڤیتامینە دلەشێ واندا د کێم بن و دێ ھێزێ بۆ پەیداکەن و ل گەل ڤێ چەندێ لەشێ مە پێدڤی ژێرا ھەیە ب شێوەیەکێ سڤک.
باتێل، یوسف سەلام سلێڤانەیی:
بەرپرسێ پەیوەندی و راگەھاندنێ ل ھاتنوچوونا دھۆکێ دیار کر ل دەمەکی ھژمارەکا گەنجان شەڤا ٢٨ سەر٢٩/١٠/٢٠١٤ ل کۆمەلگەھا باستکێ ب ئارمانجا پێشوازیکرنا پێشمەرگێ چوویە کۆبانێ ھاتبوونە سەر جادا، ل دەمژمێر ١١ی شەڤێ ترۆمبێلەکا کامری رەنگێ سپی خوە ل ژمارەکا گەنجان دا و د ئەنجام دا گەنجەکی جانێ خوە ژ دەست دا.
رائید ئازاد تەھا بەرپرسێ پەیوەندی و راگەھاندنێ ل ھاتنوچوونا دھۆکێ بۆ ئەڤرۆ دیار کر دەمێ خەلک بۆ دەربرینا پشتەڤانیکرنا پێشمەرگەی ھاتینە سەر جادان شەڤا ٢٨سەر٢٩ ل کۆمەلگەھا باستکێ یا ب سەر ناحیا باتێلێ ڤە، خەلکێ دەڤەرا سلێڤانەیا ھاتینە سەر جادا ترۆمبێلەکا تایبەت ژ جۆرێ کامری رەنگێ سپی خوە ل وان گەنجان دایە و گۆت: “ژ بلی وی گەنجێ جانێ خوە ژ دەست دای و پێنج ژی بریندار بوون کو رەوشا دو ژ وان نەیا باشە”.
رائید ئازاد تەھا بەرپرسێ پەیوەندی و راگەھاندنێ ل ھاتنوچوونا دھۆکێ ئاشکرا ژی کر کو شفوفێرێ کامریێ پشتی روودان کری خوە ل برینداران نەکرە خودان و رەڤی.
ئامێدیێ، مەحمود نھێلی:
پشتی کو ل رۆژا 18\8\2014 پۆلیسەکێ نەھێلانا گونەھباریان ل دەمێ ڤەگەریانێ بۆ مال بێ سەروشوون بووی تەرمێ وی ل نێزیکی سەرسنکێ دھێتە دیتن.
رێڤەبەرێ پۆلیسێن قەزا ئامێدیێ مقەدم محەمەد عەبدولرەزاق بۆ ئەڤرۆ دیاکر پشتی ئەو ھاتینە ھایدارکرن ل سەر دیتنا تەرمەکی ل چيایەکێ نێزیکی سەرسنکێ و تیمێن وان گەھشتینە جھێ روودانێ دیار بوویە کو ئەو تەرم یێ وی پۆلیسی بوو یێ کو بەری دو ھەیڤان بێ سەروشوون بووی.
مقەدم محەمەد گۆت بەری دو ھەیڤان پۆلیسەکێ نەھێلانا گونەھباریان ل سەرسنکێ ب ناڤێ ھەلکەفت ئیبراھیم ئەحمەد ژ دایکبوویێ سالا 1991 ل دەمێ ڤەگەریانێ ژ دەوامێ بوو مال ترۆمبێلا خوە ل بەردەرگەھێ مالێ دھیلێت و بێ سەروشوون دبیت و پشتی ژ لایێ مالا وان ھاتینە ھایدارکرن ل سەر بەرزەبوونا وی پۆلیسی وان بەردەوام دووڤچوون ل سەر کریە و ژلایێ بنگەھێ نەھێلانا گونەھباریان ژی بەردەوام دووڤچوون ل سەر بەرزەبونا وی دھاتە کرن تاکو دوھی تەرمی وی ھاتیە دیتن.
دیارکر ژی کو پشتی لێکۆلینێن دەسپێکی ل سەر روودانێ ھاتیە کرن تەرمێ وی ھاتە ڤەگوھاستن بۆ نوشداریا داد ل دھۆکێ و لێکۆلین ل سەر روودانێ د بەردەوامن.
زاخۆ،ھەژار مەعروف:
چاڤەرێ دھێتەکرن ئەڤرۆ بەردەوامی ب یاریێن گەرا شەشێ ژ خولا پلا نایابا عیراقێ یا تەپا پێ بھێتە کرن کو تیما ھەولێرێ دێ ل یاریگەھا نەفت بیتە مێڤانا کەھربا و دوھی دەست ب یاریێن ڤێ گەرێ ھاتبوونە کرن کو تیما زەورا وەکھەڤ بوو ل گەل کەربەلا ب گولەکێ.
بریارە سوباھی تیما تەپا پێ یا زاخۆ یاریەکا گرنگ ل یاریگەھا خوە بەرامبەر یانا نەفت ئەلجنوب بکەت کو دڤێ یاریێ دا تیما زاخۆ دێ بزاڤێن مەزن کەت بوو سەرکەفتنێ و ھیڤێن خوە گەش کەت بوو دەربازبوونێ وەرگرتنا ئێک ژ پلێتێن خولا بژارە.
ل دور ڤێ یاریێ کاپتنێ یانا زاخۆ خالد موشیر بۆ رۆژناما ئەڤرۆ گوت: ئەگەر ئەم ب خوازین ھەڤرکی ل سەر دەربازبوونا خولا بژارە بکەین دڤێت خالێن ڤێ یاریێ ب دەستخوڤە بینن، ژبەرکو تیما نەفت ژ ب ھێزترین ھەڤرکایە بوو پلێتا چوارێ و دەربازبوونێ ل گەل تیما مە.
ناڤبری ئەو چەندە ژێ دیارکر د بەرھەڤیێن باش دانە و چو کێماسی ل پێکھاتیێ تیمێ نین و ب ئومێدێن ب پشتەڤانیا جەماوەری دێ خالێن یاریێ ب دەستخوڤە ئینن.
ژلایەکێ دووڤە راھێنەرێ یانا نەفت ئەلجنوب عیماد عودە دیارکر کرنا یاریێ ل یاریگەھا زاخۆ یا ب سانەھی نابیت ژبەرکو ھێزا تیما زاخۆ ل یاریگەھا وێ جەماوەرێ وێ یە و ئەڤ چەندە کارتێکرنێ ل ئاستێ یاریکەران دکەت و ئەو ھاتینە بوو وێ چەندێ ب ئەنجامەکێ باش ڤەگەرن و بەردەوامیێ بدەنە ئەنجامێن خوە یێن باش تایبەت پشتی ل دووماھی حەفتی سەرکەفتن تومارکری.
ژ یاریێن دی یێن سوباھی جەویە د گەل مەسافی و نەجەف د گەل بەغدا و مینا د گەل تەلەبە و ل رۆژا شەمبیا بھێت دھۆک دێ بیتە مێڤانا یانا نەفت میسان ل یاریگەھا نەفت میسان کو بوو ڤێ یاریێ تیما دھۆک ھەتا دوھی د رەوشەکا لاواز یا دارایی دا بوو و جارەنڤیسێ دیار نەبوو دێ بەر ب باژێرێ عەمارە چیت یان نە ژبەرکو رەوشا نوکە یانا تێدا دبوریت گەلەکا خرابە.
ژ یاریێن دی کەرخ د گەل نەفت وەست و حدود د گەل نەفت و شورتە د گەل سلێمانیێ.
دھۆک، ئەکرەم ئیبراھیم:
دھێتە چاڤەرێکرن ئەڤرۆ سپێدێ 30\10\2014 ب ئامادەبوونا دەرباز عەبدوللا وەزیرێ ئاڤاکرن و ئاکنجیکرن و رێک و پرا و فەرھاد ئەترووشی پارێزگارێ دھۆکێ ھەردو لایێن تونێلا گەلیێ زاخۆ بگەھنە ئێک و کارێ کونکرنا تونێلێ ب دووماھی بھێت.
د داخویانیەکێ دا ئەندازیار ئەمین حسێن رێڤەبەرێ گشتیێ رێک و پرا و ئاڤاکرن و ئاکنجیکرنێ ل پارێزگەھا دھۆکێ دیار کر پشتی ب دووماھی ھاتنا کارێ کولانا ئاخێ ل تونێلا گەلیێ زاخۆ ئەڤرۆ ب ئامادەبوونا وەزیرێ ئاڤاکرن و ئاکنجیکرن و رێک و پرا و پارێزگارێ دھۆکێ ھەردو لایێن تونێلا گەلیێ زاخۆ دێ گەھنە ئێک و کارێ کولانا ئاخێ و کونکرنا تونێلێ دێ ب دووماھی ھێت و گۆت “کارێ کونکرنا تونێلێ بێ ئاریشە و ئاستەنگێن جیولۆجی و 100 % سەرکەفتیانە ب دووماھی ھات”.
ھەژی گۆتنێ یە پرۆژە ژ دو تونێلا پێک دھێت و درێژاھیا ھەر تونێلەکێ 3,600 کم و 160 ملیار دینار ژ لایێ حوکمەتا ھەرێمێ ڤە بۆ ھاتینە تەرخانکرن و ھەتا نوکە رێژا بحھئینانێ گەھشتیە 35% و ل 20\4\2013 دەست ب پرۆژەی ھاتیە کرن و ماوێ پرۆژەی 30 ھەیڤن و دھێتە چاڤەرێکرن دووماھیا ھەیڤا گولانا سالا بھێت بکەڤیتە د خزمەتا وەلاتیان دا.
نيشاندان