ئەندامەکێ جڤاتا نوونەرێن عیراقێ ژ لیستا پارتی دیموکراتی کوردستان راگەھاند، ھەتاکو وەزیرێن کورد دەلیڤا پێدڤی بەرھەڤ نەکەن، شاندێ دانوستاندکارێ حوکمەتا ھەرێما کوردستانێ سەرەدانا بەغدا ناکەت.

د. عەرەفات کەرەم دیارکر” سەرەدانەکا چاڤەرێکری یا شاندێ دانوستاندکارێ حوکمەتا ھەرێمێ بۆ بەغدا یا ھەی بۆ چارەکرنا کێشێن ھەلاویستی د ناڤبەرا ھەولێرێ و بەغدا دا، لێ ھێشتا ژڤانێ وێ سەرەدانێ نەھاتیە دەستنیشانکرن”.

گوت ژی” ئەو شاندە د دەمەکی دا دێ چیتە بەغدا کو وەزیرێن کورد دەلیڤەکا دروست بەرھەڤ کربیت بۆ دەستپێکرنا دانوستاندنێن لایەنێ کوردی ل گەل بەرپرسێن بەغدا، ب تایبەتی ژ لایێ د. رۆژ نوری شاویس جێگرێ سەرۆکێ وەزیرێن عیراقێ و ھشیار زێباری وەزیرێ داراییا عیراقێ”.

ئەڤرۆ:
پشتی وەرگرتنا ھەموو دکیۆمێنتان ل دۆر ژنێن ھاتینە رەڤاندن، پەرلەمانێ کوردستانێ دێ روونشتنەکا تایبەت ل دۆر کەیسا ژنێن شنگالێ گرێدەت.
د کومبوونەکێ دا ل ناڤبەرا لژنا داکوکی کرنێ ژ مافێن ژنان و رێکخراوا بزنسس ومێن ل گەل رێڤەبەریا گشتی یا ساخلەمیا پارێزگەھا دھۆکێ کو دوھی 28\10\2014 ھاتیە ئەنجام دان، ئێڤار ئیبراھیم سەرۆکا لژنا ناڤبری دیارکر وان خواستیە پەرلەمانێ کوردستانێ روونشتنەکا تایبەت ب کەیسا ژنێن شنگالێ ڤە گرێدەت، ژ بەر کو د سێ ھەیڤێن بۆری دا راپۆرتەک ژ لایێ لژنا وان ل دۆر رەوشا ژنێن شنگالێ ھاتیە ئامادەکرن و گۆت ئەم پێشبینی دکەین دۆرێن پێنج ھزار ژن و زارۆیان ل ژێر دەستێن داعش دانە و ژ بەر کو ھەر کارێ ل گەل ھاتبیتە کرن ل دووڤ ئارەزویا وان نەبوویە، لەورا ساخلەمی و دەروونیا وان د رەوشەکا ئالوز دایە و دێ داخواز ژ پەرلەمانێ کوردستانێ ھێتە کرن پشتەڤانیا دارایی و جەستەیی بۆ وان ژنان بھێتە کرن.
د. نزار عسمەت رێڤەبەرێ گشتیێ ساخلەمیا پارێزگەھا دھۆکێ دیارکر کو بابەتێ رزگاربوونا ژنان گەلەک یێ ھەستیارە و گۆت ژ ئەنجامێ گەلەک کۆمبوونان بڕیار ھاتیە دان ب باشترین شێوە بەرژوەندیێن وان بھێنە پاراستن و نابیت چو رێکخراو خوە ل ڤی بابەتی بکەنە خودان، چونکو ئەڤە کارێ دەزگایێن حوکمەتێ یە و ھەکە رێکخراو بزانن ژنێن قورتالبووی ھەنە دشێن رێنیشاندەرێن وان بن بۆ رەوانەکرنا وان بۆ دەزگەھێن حوکمەتێ داکو پشتەڤانی و چارەسەریا وان بھێتە کرن.
دیارکر ژی ئەو دێ راپۆرتەکێ ل دۆر رەوشا ساخلەمیا ژنان و چاوانیا چاڤدێری و پشتەڤانیا وان پێشکێشی لژنا داکوکی کرنێ ژ مافێن ژنان کەن داکو یا پێدڤی بھێتە کرن.