ئه‌ڤرۆ نيوز، نيوار محه‌مه‌د سه‌ليم:

عيراقێ راگه‌هاند كو ب هه‌لكه‌فتا عاشورايێ كو دبيته‌ 10 موحه‌رمێ، ل هه‌موو داموده‌زگه‌هێن حوكمه‌تا عيراقێ بهێنڤه‌دانه‌ و ب ڤێ هه‌لكه‌فتێ ژى دێ هێزێن ئه‌منى زێده‌تر ل جهێن پيرۆز به‌لاڤه‌ كه‌ت.

د به‌ياننامه‌كێ دا، جڤاتا وه‌زيرێن عيراقێ گۆت: “رۆژا سێشه‌مبيا بهێت كو دكه‌ڤيته‌ 10 موحه‌رمێ، دێ بهێنڤه‌دانا فه‌رمى بيت”.

ئاشكه‌را ژى كريه‌ كو ب ڤێ مه‌ره‌مێ ژى ل عيراقێ هه‌موويێ رێگريێن باش يێن ئه‌منى دێ گرنه‌ به‌ر دا كو جهێن ئاينى د پاراستى بن ژ كريارێن تيرۆرستى.

سه‌فين دزه‌يى، ئاخفتنكه‌رێ ب ناڤێ حوكمه‌تا هه‌رێما كوردستانێ بۆ ئه‌ڤرۆ نيوز گۆت: “هه‌كه‌ ل سه‌ر پيڤه‌رێ 1ى موحه‌ره‌مێ ب هه‌ژمێرين وى ده‌مى رۆژا دوشه‌مبى دێ بيته‌ 10ى موحه‌ره‌مێ، نوزانم وان ل سه‌ر چو پيڤه‌ر كريه‌ سێشه‌مبى”.

زێده‌تر گۆت: “ئه‌م دێ چاڤه‌رێ مالپه‌رێ فه‌رمى يێ حوكمه‌تێ كه‌ين كو ل وێرێ دێ هێته‌ راگه‌هاندن”.

ئاخفتنكه‌رێ ب ناڤێ حوكمه‌تا هه‌رێما كوردستانێ دا زانين ژى كو نه‌مه‌رجه‌ هه‌رێم يا گرێدايى بڕيارا عيراقێ بيت و گۆت: “دبيت هه‌رێم رۆژه‌كا دى ب راگه‌هينيت، هه‌ر وه‌كو به‌رى نوكه‌ ژى راگه‌هاندى”.

ئەڤرۆ نیوز، سالار دۆسکی:

مامۆستایەکێ زانستێن سیاسی ل زانکۆیا نەورۆز دیارکر کو کوردان کاغەزێن ب ھێز ھەنە و ھەکە ھات و سیاسەتا حەیدەر عەبادی درێژەپێده‌را مالکی بوو، کوردان پێ گوھۆڕێ هه‌ى.

ئازاد عادل، مامۆستایێ زانستێن سیاسی ل زانکۆیا نەورۆز، بۆ ئەڤرۆ گۆت: “نەھنارتنا بودجە و مووچێ فەرمانبەرێن ھەرێما کوردستانێ ژ لایێ بەغدا ڤە پەیوەندی ب نوری مالکی ڤە ھەیە، سەرۆک وەزیرێ بەرێ يێ عيراقێ”.

زێده‌تر گۆت: “له‌ورا ئێک ژ مەرجێن مالكى ل ده‌ما ده‌ستبه‌رداريا وی بۆ پۆستێ سه‌رۆك وه‌زيريێ ئه‌و بوو حەیدەر عەبادی ل سەر سیاسەتا وی بچيت ب تایبەت ل گەل ھەرێما کوردستانێ”.

مامۆستایەکێ زانستێن سیاسی ل زانکۆیا نەورۆز دا زانين ژى كو كێشا سه‌ره‌كى يا رێكنه‌كه‌فتنێ ئه‌وه‌ كو بەغدا دڤێـت چو پەترۆلا بھێـتە فرۆتن، ھەموو پارە بۆ بھێنە رەوانەکرن.

ناڤبری گۆتژی: “ھەکە ئەڤ سیاسەتا بەغدا د گەل کوردان بەردەوامی کێشا، کورد دشێن دەنگێ خوه‌ بگەھیننە وەلاتێن جیھانێ کو مافێ وان دھێتە خوارن و کاغەزا د دەستێ کوردان دا، دشێن ژ حوکمەتێ خوە ڤەکێشین و داخازا جودا بوونێ بکەن، دیسا دیارە ھەتا دووماھیا ئەڤ سالە دێ ھەرێما کوردستانێ ھەژمارا بەرمیلێن فرۆتنا په‌ترۆلێ زێدەکەت”.

ئازاد عادل نه‌ڤه‌شارت كو بۆ بەغدا ژی ھاتيە دیارکرن کو کوردان چەند سەنگ ھەیە، سوریا چەندین سالە داخواز ئەمریکا دکەت د هه‌وارێ بچن و قورتالکەن و ئەمریکا نەچوو، کوردان داخواز کر ئەمریکا، ھەر زوو چاوا د هه‌وارێ ھات، ئەڤە بۆ بەغدا یا رۆهنە کو کوردان سەنگا خوە ل دەڤ وەلاتێن زلھێز ھەیە و بوویە ھۆکار کو جھێن خوەیێن لەشکری ل کوردستانێ بدانن.

ئه‌ڤرۆ نيوز:

كۆمسيۆنا بلندا سه‌ربه‌خۆيا مافێن مرۆڤى ئه‌ڤرۆ رۆژا سێشه‌مبى راگه‌هاند كو ئه‌وان داخوازيه‌ك پێشكێشكى حوكمه‌تێ و جڤاتا نوونه‌ران كريه‌، تێدا خواستيه‌ كو رێ پێ بهێته‌ دان سكالايه‌كێ ل جڤاتا ئاسايشا نێڤده‌وله‌تى دژى داعش تۆمار بكه‌ت ژ ئه‌نجامێ ئه‌وان تاوانێن ئه‌و پێ رابووين د ده‌رحه‌قا مرۆڤاتيێ دا.

ئه‌ندامێ جڤاتا كۆميسه‌ران، فازل غراوى د داخۆيانيه‌كێ دا بۆ شه‌فه‌ق نيوز گۆت: “داخوازيا مه‌ بۆ وێ چه‌ندێ يه‌ حوكمه‌تا عيراقێ و جڤاتا نوونه‌ران پێنگاڤه‌كێ به‌ر ب جڤاتا ئاسايشا نێڤده‌وله‌تى ڤه‌ بهاڤێژن دا ئه‌و ژى ژ لايێ خوه‌ ڤه‌ سكالايێ ل سه‌ر داعش ل دادگه‌ها تێهه‌لچوونێ يا نێڤده‌وله‌تى تۆمار بكه‌ن ب تۆمه‌تا تاوانێن شه‌رى و دژى مرۆڤاتيێ”.

كۆمسيۆنا بلندا سه‌ربه‌خۆيا مافێن مرۆڤى ل عيراقێ چارشه‌مبا بۆرى راگه‌هاندبوو كو ئه‌وان ره‌زامه‌ندى يا ژ جڤاتا نوونه‌ران ل سه‌ر داخوازيا كۆمسيۆنێ وه‌رگرتى كو ئه‌و تاوانێن داعش دژى وه‌لاتيێن سڤيل دكه‌ت، تاوانێن شه‌رى نه‌ و دكه‌ڤنه‌ ژێر ژناڤبرنا ب كۆم دا.

ژ ده‌ركه‌فتنا داعش هه‌تا نوكه‌ گه‌له‌ك تاوانێن دژى مرۆڤاتيێ ئه‌نجام داينه‌ و ب تايبه‌ت دژى مه‌سيحى و ئێزديان كو ژبلى ده‌ركرنێ ژ جهێن وان و كوشتنا ب كۆم ژنێن وان بۆ خوه‌ برينه‌ و ل خوه‌ ماركرينه‌ و كرين و فرۆتن ژى پێ كرينه‌.