ئەڤرۆ ، سالار دۆسکی:
ژڤانە رۆژا سێشەمبی رێکەفتی 25\10\2014 ل بەرامبەر دەزگەھێ سەردەم باژێرێ سلێمانیێ پەیکەرێ نڤێسەرێ کوردێ مەزن شێرکۆ بێکەس بھێتەدانان.
پەیکەرێ ھەلبەستڤانێ کوردێ مەزن د. شێرکۆ بێکەس ژ لایێ پەیکەرساز شوان کەمال ڤە ھاتیە دروستکرن و ب سپونسەری یا دەزگەھێ عرفان ھاتیە چێکرن و ژڤانە حەفتیا بھێت ل بەر دەرگەھێ دەزگەھێ سەردەم کو پێشتر د. شیرکو بەرپرسێ وێ بوو بھێتە دانان.
ھەڤدەم د. شێرکو بێکەس ئێکەم وەزیرێ رەوشەنبیری بوو د حوکمەتا ھەرێما کوردستانێ دا ل سالا 1992.
ئه‌ڤرۆ نيوز، نيوار محه‌مه‌د سه‌ليم:
ژێده‌ره‌كى ژ هێزێن پێشمه‌رگه‌ى راگه‌هاند كو دو فرۆكێن هه‌ليكۆپته‌ر ب دژوارى ده‌ڤه‌رێن ده‌وروبه‌رێن شنگال بۆردۆمان كر و ب ده‌هان چه‌كدارێن داعش كوشتن.
ئه‌فسه‌ره‌كێ پێشمه‌رگێ كوردستانێ كو مه پاراستن ل سه‌ر به‌لاڤكرنا وى كر، دياركر كو ئه‌ڤرۆ رۆژا پێنجشه‌مبى دو فرۆكێن هه‌ليكۆپته‌ر جهێن چه‌كدارێن داعش ل نێزێكى چيايێ شنگال بۆدۆمان كرن ل ده‌مێ بزاڤ دكر ب سه‌ر چيايى بكه‌ڤن”.
ئه‌ڤى ئه‌فسه‌رى زێده‌تر گۆت: “ب گۆره‌ى پێزانينێن ده‌سپێكى ب ده‌هان كه‌س بووينه قوربانى”.
ب گۆره‌ى ژێده‌رێن شه‌رڤانێن ئێزدى زێده‌ترى پێنج هزار شه‌رڤانێن ئێزدى كو قاسم شه‌شۆ كارگێرێ لقا 17 يا پارتى ديموكراتى كوردستان سه‌رپه‌رشتيا وان دكه‌ت ل گه‌ل هنده‌ك ژ پێشمه‌رگێ كوردستانێ كو به‌رچاڤترين كه‌س ژ وان ته‌مه‌ر ره‌مه‌زانه پارێزگارێ به‌رێ يێ دهۆكێ و ئاشتى كوچه‌ر به‌رپرسێ ئاسايشا زاخۆ.
ئه‌ڤرۆ نيوز:
سعوديێ حوكمێ زيندانيكرنێ دانا سه‌ر چار ژنا كو دناڤبه‌را شه‌ش بۆ ده‌هـ سالان ژ ئه‌گه‌رێ پشته‌ڤانيكرنا چه‌كدارێن داعش.
ده‌زگه‌هێن راگه‌هاندنا سعوديێ راگه‌هاند كو دادگه‌هێ تاوانا هه‌ڤكاريا داعش ل سه‌ر چار ژ ژنێن سعوديێ سه‌پاند كو هاريكاريا كوڕێن خوه كريه ل سه‌ر گه‌هشتنا وان ب داعش ب رێيا چوونا ناڤ مالپه‌رێن ئه‌لكترۆنى يێن هه‌مه‌ره‌نگ، ديسا دانلۆدكرنا گرتيێن ده‌نگى و يێن ڤيديۆيێ يێن گرێدايى كوشتنێ.
ب گۆره‌ى ئاژانسا ده‌نگوباسێن فره‌نسى، ژڤانێ ڤان كرياران و ناسنامێن ڤان ژنا ديار نه‌كريه، كو به‌رى نوكه بڕيارا گه‌شتكرنا سێ ژ وان راوه‌ستاند بوو.
به‌رى نوكه موفتيێ سعوديێ شێخ عه‌بدولعه‌زيز ئال شێخ راگه‌هاند بوو كو رێكخستيا ده‌وله‌تا ئيسلامى دوژمنا ئێكێ يا ئيسلامێ يه.
ئه‌ڤرۆ نيوز:
گۆگل خزمه‌ته‌كا نوو يا نامێن ئه‌لكترۆنى ب ناڤێ inbox خسته كارى و دهێته پێشبينيكرن جهێ G-Mail بگريت.
ب گۆره‌ى كۆمپانيێ ئه‌ڤ خزمه‌ته بۆ وێ چه‌ندێ يه، نامێن ئه‌لكترۆنى يێن گرنگ نه‌هێنه به‌رزه‌كرن و نوكه ب ره‌نگه‌كێ ده‌مى خستيه كارى و هنده‌ك ژى وه‌سان پێشبينى دكه‌ن كو ئه‌ڤ خزمه‌تى ئه‌لكترۆنى دێ جهێ G-Mail گريت.
كه‌سه‌كى ژى كۆمپانيا گۆگل گۆت: “ئه‌ڤه مه‌زنترين نووكرنه مه بۆ خزمه‌تا نامێن ئه‌لكترۆنى ئه‌نجامدايى پشتى G-Mail. ئه‌ز گه‌له‌ك يێ ل سه‌ر رژدم ل سه‌ر”.
ژ گرنگترين خزمه‌تێن ڤێ خزمه‌تگۆزاريێ:
سه‌ندار بيتشاى، جێگرى سه‌رۆكێ گۆگل يێ سيسته‌مێ ئه‌ندرويد و خزمه‌تكاريان گۆت: “گه‌له‌ك ژ نامێن ئه‌لكترۆنى دگه‌هنه مه، پتر ژ به‌رى نوكه، هنده‌ك ژ نامێن گرنگ د ناڤا وان دا دهێنه به‌رزه‌كرن، گرنگترين كارێن مه ژى ژ ئه‌نجامێ وان دهێنه ژ ده‌ست دان، ب تايبه‌ت هه‌كه ب رێيا تله‌فۆنێن خوه كار بكه‌ين”.
زێده‌تر گۆت: “ده‌رباره‌ى گه‌له‌ك ژ مه كار كرن ل گه‌ل نامێن ئه‌لكترۆنى يێ بوويه كاره‌كێ رۆژانه و گه‌له‌ك پێڤه گيرۆ دبين و مه ژ كارێن مه يێن سه‌ره‌كى دوور دئێخيت، ل جهێ هاريكاريا مه د كاران دا بكه‌ت”.
ئه‌ڤرۆ نيوز:
سه‌رۆكێ توركيا، ره‌جه‌ب ته‌يب ئه‌ردوگان راگه‌هاند كو ئه‌و يێن گه‌هشتينه رێكه‌فتنێ 200 پێشمه‌رگه ل باشوورێ كوردستانێ بچنه رۆژئاڤا د سه‌ر ئه‌ردێ توركيا (باكوورێ كوردستانێ)، دا دا كو پشكداريێ د شه‌رێ دژى داعش دا بكه‌ن.
هه‌ر چه‌نده هێشتا ب ره‌نگه‌كێ فه‌رمى نه‌هاتيه دياركرن كا دێ چه‌ند پێشمه‌رگه و ب چو رێ چنه كۆبانێ، د ڤێ ده‌ربارێ دا سه‌رۆكێ توركيا ل وه‌لاتێ لاتڤيا ئاشكه‌را كر كو ئه‌و يێن گه‌هشتينه رێكه‌فتنێ و دێ 200 كه‌س ژ هه‌رێمێ چنه كۆبانێ.
ئه‌ڤ ته‌كستكرنا ئه‌ردوگان د ده‌مه‌كى دا هات، پشتى سه‌رۆك وه‌زيرێ توركيا داوود ئوغلۆ گۆتى: “دانوستاندن د به‌رده‌وامن ل سه‌ر چوونا پێشمه‌رگه‌ى”، ره‌تكر ژى كو نوكه ده‌ست ب چوونا پێشمه‌رگه‌ى بۆ وێ ده‌ڤه‌رێ كربيت.
سه‌رۆكێ توركيا ره‌خنه ژى ل فرۆكێن ئه‌مريكا گرتن يێن چه‌ك بۆ چه‌كدارێن YPG به‌ردايه ناڤا كۆبانێ، ئه‌و چه‌كێ دبێژن كو داعش هژماره‌ك يا وه‌رگرتى، گۆت: “ئه‌مريكا د ڤێ پێنگاڤێ دا، سه‌رپێچى ل سه‌ر توركيا كر”.
ئاژانسا ئه‌نادۆل ژ زار ده‌ڤێ ئه‌ردوگان ل ده‌مێ كۆنگرێ وى يێ رۆژنامه‌ڤانى ل گه‌ل هه‌ڤالێ وى يێ لاتڤى ئه‌ندرێس پيرزينس به‌لاڤكر كو ئه‌وى سه‌رۆكێ ئه‌مريكا ئاگه‌هدار كريه كو رێكخستيا پارتا ئێكه‌تيا ديموكرات YPD رێكخستيه‌كا تيرۆرستى يه وه‌كو PKK و هاريكاريا ئه‌و بۆ دكه‌ن، دێ بۆ تيرۆرێ چيت.
ژ لايێ خوه ڤه ره‌وانگه‌ها سوريا بۆ مافێن مرۆڤى راگه‌هاند كو داعش ده‌ستێ خوه يێ دانايه سه‌ر تل شوعه‌ير ل لايێ رۆژئاڤايێ كۆبانێ كو ب ڤێ چه‌ندێ ژى گه‌مارۆ ژ سێ لايا دانا سه‌ر كۆبانێ، رۆژهه‌لات و ئاڤا و باشوورى، ل باكوورى ژى نوكه شه‌ره‌كێ دژوار ل گه‌ل يه‌كينه‌يێن پاراستنا گه‌ل دهێته كرن.
ئه‌ڤرۆ نيوز:
پشتى سه‌ركه‌فتنا يانا ريال مه‌دريد ل گه‌ل ليڤانتى ب پێنج گۆلان بێ به‌رامبه‌ر، حه‌زژێكه‌رێن كرستيانۆ رۆنالدۆى ژ كچ و كوڕان بزاڤ كرن ئيمزايێن وى وه‌كو بيرهاتن ب ده‌ست خوه ڤه بينن، به‌لێ پشتى رۆنالدۆى ئيمزا بۆ هه‌موويان نه‌كرين، هنده‌ك ژ كچان به‌ردا گريێ ژ به‌ر كو نه‌شيان ئيمزا وى ب ده‌ست خوه ڤه بينن.
ئەڤرۆ نیۆز، قائید میرۆ:
بەرپرسێ راگەھاندنا لقا ١٤ یا پارتی دیموکراتی کوردستان بۆ ئەڤرۆ نیۆز دیارکر، د شەڕێ چولر رۆژێن بۆری دا تنێ لە دەوروبەرێ مووسڵ پتری چوارسەد چەکدارێن داعش ھاتینە کوشتن.
سەعید مەمووزینی، بەرپرسێ راگەھاندنا لقا ١٤یا پارتی دیموکراتی کوردستان ب ئەڤرۆ نیۆز راگەھاند، د ئەنجامێ شەڕێ چوار رۆژێن بۆری یێن دنێڤبەرا ھێزێن پێشمەرگەیی و چەکدارێن داعش، ھژمارەکا زۆرا چەکدارێن داعش ھاتینە کوشتن و گورەی زانیاریێن مە ھەتا نوکە ٤٠٤ تەرمێن داعش ڤەگەڕیانە باژێڕێ مووسل.
سەعیدی گۆتژی” نوکە چەکدارێن داعش دەست ب گرتنا وەلاتیان لناف باژێڕێ مووسل کریە و ددەمێ چەند رۆژێن بۆری دا ب سەدان وەلاتی ھاتینە دەستەسەرکرن.
ئه‌ڤرۆ نيوز:
رێڤه‌به‌رێ هۆنه‌رى يێ تيما ليڤه‌رپۆل راگه‌هاند كو ئه‌و دێ ب ژيوارى سه‌ره‌ده‌ريێ ل گه‌ل وێ ره‌فتارا ماريۆ پالۆتێلى يێ هێرشبه‌ر و به‌ره‌ڤانێ ريال مه‌دريد دا كه‌ن ئه‌وا دووماهى ل قاره‌مانيا شامپيۆن ليگ روودايى.
رۆژناما ده‌يلى ستار راگه‌هاند كو رۆدريگێز دێ ئيمزايێ ل سه‌ر سزادانا پالۆتيلى ده‌ت ژ ئه‌گه‌رێ گوهۆڕينا فالێنێ خوه پشتى نيڤا ئێكێ ژ ياريێ.
رۆدريگێز گۆت: “ئه‌ڤه ره‌فتاره‌كا نه‌يا گۆنجايه ل ڤێره، هه‌كه ل جهه‌كێ دى يا گۆنجاى ژى بيت، دێ سه‌ره‌ده‌ريێ ل گه‌ل بابه‌تى كه‌م”.
زێده‌تر گۆت: “سالا بۆرى ژى مه حاله‌ته‌كێ ژ ڤى ره‌نگى هه‌بوو و من سه‌ره‌ده‌رى ل گه‌ل كر و ئه‌ڤ ساله ژى دووباره بوو ڤه و دێ سه‌رده‌ريێ ل گه‌ل ڤێ ژى كه‌م”.
پشتى نيڤا ئێكێ ژ ياريا ريال مه‌دريد و ليڤه‌رپۆل دا ب دووماهى هاتى ژ قاره‌مانيا شامپيۆن ليگ ئه‌وا ريال ب سێ گۆلێن بێ به‌رامبه‌ر سه‌ركه‌فتن تۆمار كرى، پالۆتێلى هه‌ست كر كو دێ راهێنه‌ر وى گوهۆڕيت، ئه‌ڤجا رابوو ب گوهۆڕينا فايلێنێ خوه يێ ياريێ ل گه‌ل پيپێ”.
ئەڤرۆ نیۆز، قائید میرۆ:
رێڤەبەرێ گشتیێ ڤەگوھاستنا ھەرێما کوردستانێ دیارکر، سپێدەھیا ئەڤرۆ شەش شوفێرێن کورد ل بەغدا ھاتینە رەڤاندن و بەرامبەر ئازادکرنا ھەر شوفێرەکی داخوازا ١٠ ھزار دۆلاران تێتەکرن.
سەلاح جەوھەر، رێڤەبەرێ گشتیێ ڤەگوھاستنا ھەرێما کوردستانێ تایبەت ب ئەڤرۆ نیۆز راگەھاند، کو سپێدەھیا ئەڤرۆ پێنج شەمبیێ ھژمارەکا چەکدارێن نەنیاس لباژێڕێ بەغدا چوار شوفێرێن کورد بناڤێ کارکرنێ دگەل خوە برینە و پشتی ھنگی رەڤاندی، ھەر ئەڤرۆ ل رێیا بەغدا و نێزیک قەزا خالس شوفێرەکێ دی و وەلاتیەکێ کورد ھاتینە رەڤاندن.
سەلاحی گۆت” ھەر پێنج شوفێرێن ھاتیە رەڤاندن خەلکێ باژێرێ ھەولێرێ نە و بەپرسێ ھێلا بەغدا بۆ ھەولێر، بزاڤێن زۆر کرینە بۆ ئازادکرنا شوفێرێن کورد، بەلێ ئەو گروپا شوفێر رەڤاندی(عەسابەیێن بەغدانەو) بۆ ئازادکرنا ھەر شوفێرەکی داخوازا دەھە ھزار دۆلاران دکەن.
ئه‌ڤرۆ نيوز:
به‌رپرسه‌كێ PYD داخۆيانيه‌كا وه‌زيرێ گه‌هاندنا سوريا ره‌تدكه‌ت ده‌ما گۆتى سۆپايێ سوريا هه‌ڤكاريا كۆبانێ يا كرى.
پشتى عومران ئه‌لزوعبى، وه‌زيرێ راگه‌هاندنا سوريا د داخۆيانيه‌كێ دا ل گه‌ل تله‌ڤزيۆنا سوريا راگه‌هاند كو سۆپايێ سوريا چه‌ك يێ گه‌هانديه كۆبانێ بۆ روو ب رووى بوونا چه‌كدارێن داعش و كه‌س نه‌شێت ڤێ چه‌ندێ ره‌تدكه‌ت، به‌لێ ديار قامشلى ئه‌ندامێ نوونه‌راتيا PYD ل هه‌رێما كوردستانێ د داخۆيانيه‌كێ دا بۆ باس نيوز ره‌تكر كو رژێما سوريا هه‌ڤكاريا وان كربيت.
ديار قامشلى گۆت: “چو ده‌ما هه‌ڤكارى ل گه‌ل مه و رژێما ئه‌سه‌د نه‌بوويه، د سه‌ر هندێ را رژێما ئه‌سه‌د ده‌ليڤه بۆ داعش خۆش كريه دا كو هێرشێ بكه‌ته سه‌ر رۆژئاڤايێ كوردستانێ، به‌لێ بڕيارا مه ئه‌و بوويه هه‌رێما كوردان ب پارێزين”.
ئه‌ڤى به‌رپرسێ PYD ئه‌ڤ داخۆيانيا رژێما ئه‌سه‌د ب نه‌راست ل قه‌له‌م دا و گۆت: “رژێما ئه‌سه‌د چو هاريكاريا مه ل كۆبانێ نه‌كريه، به‌رى نوكه ژى هاريكاريا كوردان نه‌كريه و ناكه‌ن و ئه‌م ژى قه‌بوول ناكه‌ين”.
ديار قامشلى وه‌سان دبينيت كو ژ ئه‌گه‌رێ به‌رگريا شه‌رڤانان و ئێكرێزيا كوردان ل كۆبانێ هه‌رده‌م ناكه‌ڤيت.
نيشاندان