ئه‌ڤرۆ نيوز:
دوهى نيڤرۆ و هه‌تا ئه‌ڤرۆ سپێدێ شه‌روپێكدادان د ناڤبه‌را هێزێن چه‌كدارێن داعش و هێزێن يه‌كينه‌يێن پاراستنا گه‌ل يێ به‌رده‌وامه ب گۆره‌ى ژێده‌رێن د ناڤا كۆبانێ دا.
ژێده‌رێن هێزێن يه‌كينه‌يێن پاراستنا گه‌ل راگه‌هاند كو ئه‌ڤه ژ دوهى نيڤرۆ وه‌ره چه‌كدارێن داعش يێ ب دژوارى باشوور و رۆژهه‌لاتێ باژێرى تۆپباران دكه‌ن ب مه‌ره‌ما وێ چه‌ندێ بگه‌هنه ناڤا باژێرى.
نوكه ره‌نگه ئاراميه‌ك يا د ناڤ باژێرى دا په‌يدا بووى، ده‌نگێ تۆپ و چه‌كى ناهێته گوهلێبوون ب گۆره‌ى وان ژێده‌ران.
شاندێ BBC ل سه‌ر سنورێ باكوور و كۆبانێ راگه‌هاند كو هێزێن يه‌كينه‌يێن پاراستنا گه‌ل و هه‌ڤپه‌يمانێن وێ ژ له‌شكرێ سورى يێ ئازادى هێرشێن دژوار يێن برينه سه‌ر چه‌كدارێن داعش ل رۆژئاڤايێ كۆبانێ دا كو وێ گڤاشتنا ل سه‌ر هه‌ڤالێن خوه ل باشوور و رۆژهه‌لاتى كێم بكه‌ن.
ژێده‌رێ ناڤا كۆبانێ هژمارا قوربانيان ديار نه‌كر، به‌لێ ته‌كست ل سه‌ر وێ چه‌ندێ كر كو قوربانى يێن كه‌فتين.
عومه‌ر عه‌لۆش ئێك ژ سه‌ركردێن يه‌كينه‌يێن پاراستنا گه‌ل بۆ BBC گۆت: “ئه‌ڤ شه‌روپێكدادانێن نوكه ل كۆبانێ هه‌ين، دژوارترين شه‌روپێكدادانن د ماوه‌يێ بۆرى دا، كۆبانێ ب خوه ڤه ديتى”.
عه‌لۆش ئاماژه ب وێ چه‌ندێ ژى كريه كو نوكه هێزێن چه‌كدارێن داعش يێن رابووين ب خرابكرنا هنده‌ك ژ وان ئاڤاهيێن د ناڤا كۆبانێ دا ل بن كۆنترۆلا وان.
ئەڤرۆ:
وەزارەتا بازرگانی و پیشەسازی ل حوکمەتا ھەرێما کوردستانێ گەھشتنا چەکێ پارێ گەنمێ جۆتیارێن ھەرێمێ ژ لایێ حوکمەتا عیراقێ ڤە بۆ ھەرێما کوردستانێ راگەھاند.
وەزارەتا بازرگانی و پیشەسازی ل سەر مالپەریَ خوە یێ فەرمی بەلاڤ کریە کو دوھی ٢٢/١٠/٢٠١٤ وەجبەکا دیتر یا چەکێن پارێ گەنمێ جۆتیاران گەھشتە بەنکێن ھەرێمێ.
پەیڤدارێ وەزارەتا بازرگانی و پیشەسازیا ھەرێما کوردستانێ ئەحمەد حسێن بۆ باسنیوز دیارکر کو ل حەفتیا بھێت دێ دەست ب دابەشکرنا پارێ گەنمی ل سەر جۆتیاران ھێتە کرن، ئاشکرا ژی کر کو ژ ڤی پارەی ٢٣ ملیار و ٦٨٥ ملیۆن دینار یێن جۆتیارێن پارێزگەھا ھەولێرێ نە، ٢٠ ملیار و ٧٥٥ ملیۆن دینار یێن جۆتیارێن پارێزگەھا دھۆکێ نە و یێن پارێزگەھا سلێمانیێ ژی ١٤ ملیار و ٥٠٤ ملیۆن دینارن.
ل دووڤ باسنیوز بەرھەمێ گەنمێ جۆتیارێن ھەرێما کوردستانێ ل سالا ٢٠١٤ پتر بوو ژ ٧٠٠ ھزار تەنان، کو ژ لایێ وەزارەتا بازرگانی و پیشەسازیا عیراقێ ڤە ھاتبوو کرین، بەلێ ھەتا نوکە ھەمی پارە نەھاتیە ھنارتن و ھەر جار پشکەک دھێتە فرێکرن.
ئه‌ڤرۆ نيوز:
به‌رپرسه‌كى ژ پارێزگه‌ها بابل رۆژا چارشه‌مبى راگه‌هاند كو نێزكى 100 چه‌كدارێن داعش خوه دايه ده‌ست ده‌سته‌لاتدارێن عيراقێ، دو ژ وان سه‌ركردێن رێكخستيێ نه.
سه‌رۆكێ لژنا ئه‌منى ل ده‌ڤه‌را باكوورێ بابل و ئه‌ندامێ جڤاتا پارێزگه‌ێ، سامر زيباب، بۆ كه‌نالێ عيراقيه يێ فه‌رميێ حوكمه‌تا عيراقى گۆت: “ب ده‌هان تيرۆرستێن داعش ل ده‌ڤه‌را جرف صه‌خر خوه دايه ده‌ست هێزێن ئه‌منى و حه‌شه‌د شه‌عبى”.
زێده‌تر گۆت: “نێزده‌ترى 100 چه‌كدارێن داعش خوه دايه ده‌ست له‌شكرێ عيراقێ و حه‌شه‌د شه‌عبى ل ده‌ڤه‌ر عه‌بد و ويس و حه‌جير ل جرف صه‌خر پشتى بۆ ماوێ چار هه‌يڤان هاتينه ئابلۆقه دان”.
ئاماژه ب وێ چه‌ندێ ژى كر كو د ناڤ ڤان تيرۆرستان دا، سه‌ركرده‌كێ قاعيده و تۆمه‌تبارێن كرياريێن تيرۆرستى ژ 2003 و 2005 تێدانه و گۆت: “ئێك ژ وان داوود سلێمان فيحان، يێ دژى عارف جنابى ئه‌وێن گه‌له‌ك نێزێك ژ سه‌رۆكێ رێكخستيا داعش ئه‌بۆ مصعه‌ب زه‌رقاوى”.
ئەڤرۆ، قیس ئیسماعیل:
بریارە سوباھی یانا زێرڤانی بەرھەڤیێن خۆ بۆ خۆلا کوردستانێ یا تەپا پێ ب یاریەکا ھەڤالینی دگەل تیما یانا زاخۆ یا پشکدار د خۆلا کوردستانێ دا ب دووماھی بینیت.
ل دوور دووماھی بەرھەڤیێن زێرەڤانی بۆ بەرەڤانیێ ژ ناسناڤێ خۆلێ راھێنەرێ تیمێ دیارکر دبیت یاریا ئەڤرۆ دووماھی دەلیڤە بیت بۆ ھندەک یاریکەران چونکو ھەتا ٩٠% ژ پێکھاتیێ تیمێ بۆ من دیاربویە و شێوازێ یاریکرنێ ئەف سالە دێ ب یاریا کوم بێت نە پشتبەستنێ ل سەر یاریکەرەکی بتنێ بکەم و دا ژ ئاریشا ھنگافتنێن یاریکەرێن خۆ د یارێن خولێ دا قورتالبم.
سلێمان رەمەزان دیارکر چونا یاریکەرێن مینا ھۆزان ئازاد و شوان مامۆ و بارزان ڤالاتیەک د ھێلا ناڤین دا دروستکر، لەوا من و کارگیریا یانێ ب فەر دیت ھەڤبەستی د گەل چەند یاریکەرێن باش گرێدەێن چونکو ھێلا بەرەڤانیی چو گوھورینین مەزن بخو ڤە نەگرتینە تنێ یاریکەرەک نەبێت.
ل دۆر ھەڤبەستێن ئەف سالە گوت: وەکو ناڤ و ئاست گەلەک د باشن، لێ کێماسیەک ھەیە د تێگەھشتنا ئەرکێن خۆ وەکو یاریا ب کوم ژبەرکو حەزا گەلەک ژ وان بۆ دیارکرنا شیانێن خۆنە ب یاریا تاک.
ناڤبری ئاماژە دا ئاستێ پێشەکارێن یانێ و گوت: کاستیلو ل ھێلا ناڤێن ھەتا رادەکی باشە و دگەل یاریکەرا لێکتیگەھشتنەکا باش دروستکریە، لێ ماردۆ ھەتا نوکە ئەم رازی نەکرینە وەکو ئاست و یاریکەرێن گەنج وەکو بژار ل ھێلا ھێرشبەریێ و جواد و نیجیرڤان حسێن ل ھێلا ناڤین دشێن ل جھیێ خو وەکو یاریکەرێن سەرەکێ دناف رێزێن تیمێ دا و چەندێن دی بگرن.
ل دووماھیێ سلێمان رەمەزان دیارکر ئەنجامدانا دەە یاریێن ھەڤالینێ و دگەل تیمێن جودا جودا ھزرەکا باش دامە
و مە یاریکەرێ سەرەکی و یەدەک نابیت و ئەوێ شیانا نیشان بدەت دێ یێ سەرەکی بیت.
ئەڤرۆ نيوز:
حوکمەتا ھەرێما کوردستانێ لژنەکا بلند بۆ سزادانا وان کەسان پێک ئینا ئەوێن دەست ل گەل بازرگانی کرنا نەفتێ ل گەل داعش ھەبیت، سەرۆکێ لژنا ژێدەرێن سروشتی ل پەلەمانێ کوردستانێ دبێژیت دێ ب قانوونا تیرۆرێ سەرەدەری ل گەل وان کەسان ھێتە کرن.
ئەمیندارێ گشتی یێ ھێزێن پێشمەرگێ کوردستانێ جەبار یاوەر بۆ باسنیوز دیارکر کو لژنەکا بلند بۆ دووڤچوون و دەستەسەر کرنا وان کەسێن دەست ل گەل بازرگانیا نەفتێ ل گەل داعش ھەی ھاتیە پێک ئینان، ئاشکرا ژی کر کو لژنە ژ ھەر ئێک ژ وەزیرێ ناڤخۆ کەریم شنگالی، وەزیرێ پیشمەرگەی مستەفا سەید قادر و بەرپرسێن بلندێن ئاسایشا ھەرێمێ پێک دھێت.
سەرۆکێ لژنا ژێدەرێن سروشتی ل پەرلەمانێ کوردستانێ شێرکۆ جەودەت دیارکر کو ئەو کەسێن پەیوەندیەکا بازرگانی ل گەل رێکخراوەکا تیرۆستی دکەت دێ ل دووڤ قانوونا تیرۆرێ سەرەدەری ل گەل ھێتە کرن.
لژنا قانوونی ژی ل پەرلەمانێ کوردستانێ دیار دکەت کو ھەکە بازرگانیا کەسەکی ل گەل داعش ب بەلگە بھێتە ئێک لاکرن حوکمێ ئەو کەسێن ڤی کاری دکەن سێدارەدانە و دێ وەکو چەکدارێن داعش ھێنە ھژمارتن، چونکو دێ ب ھەڤپشکێن تاوانێ ل دووڤ قانوونێ ھێنە ھژمارتن.
جێگرا سەرۆکا لژنا قانوونی ل پەرلەمانێ کوردستانێ بھار مەحموود دیارکر کو مادێ ١٠ ژ قانوونا تیرۆرێ ل ھەرێما کوردستانێ دبێژیت ھەر کەسەک ھاریکاریا گرۆپەکێ تیرۆرستی بکەت وەکو بکەر یان ھاندەر یان بشکدار دێ ب ھەمان سزایێ تاوانباری ھێتە سزا دان.
ئەڤرۆ نيوز:
ئەکتەرێ کومێدیێ بناڤ و دەنگێ ئنگلیزی (روسێل براند) دگەل خوەنیشادەرێن کورد پشتەڤانیا باژێرێ کۆبانێ رۆژئاڤایێ کوردستانێ دکەت، وێنەکێ وی د تۆرێن جڤاکیێن فێسبووکی دا بەلاڤ بوویە، (روسێل براند) ئەکتەرێ کومێدیێ ئنگلیزی دکەمپینا (سەیف کوبانێ) دا دگەل چالاکڤانێن کورد پشکداری کر و دەنگێ نەرازیبوونێ بلندکر، جھێ ئاماژەکرنێ یە(روسێل) ئەکتەرێ کومێدیە و نڤێسەر و پێشکێشکارە ژی و ناڤ و دەنگیەکا باش ھەیە و تایبەت پرۆگرامێ( بیج برازەر) دیسا چەندین خەلات وەرگرتینە، نۆکە دژیێ ٣٩ سالیێ دایە.
ئه‌ڤرۆ نيوز:
ب ملیۆنان مرۆڤ دێ ل ھیڤیا دەستکەفتەکێ زانستیێ گرنگ بن بۆ بدوماھی ئینانا نەخۆشیێن وان یێن رۆژانە، دەمێ زانایێن بریتانی د بزاڤێن خوەدا بسەرکەفتن کو گەھشتینە قووناغێن پێشکەفتی بۆ ڤەدیتنا دەرمانەکی بۆ نەخۆشیا شەکرێ.
رۆژناما “ئەندپندت” یا بریتانی ئاشکەرا کر کو زانایێن بریتانی دەرمانەک بۆ نەخۆشیا شەکرێ دیتیە ئەوا نوکە د ناڤ لەشێ حەفت ملیۆن مرۆڤان دا ل سەرانسەری جیھانێ ھەی، ئەو ژی ب رێیا چاندنا ھندەک شانان ل بن پیستی کو مادێ “ئەنسۆلین” بەرھەمدئینیت.
ل دووڤ گۆتنا رۆژناما ناڤھاتی زانا شیاینە شانێن رھان ڤەگوھێزنە شانێن “بیتا” ئەوێن “ئەنسۆلینی” بەرھەمدئینن، تاقیکرنێن خوە ل سەر مشکان کرینە و سەرکەفتنەکا مەزن بدەستڤەئینایە.
ئه‌ڤرۆ نيوز:
ژن و کچ ب ھەموو رێیان بزاڤێ دکەن بگەھنە سەنگا گونجای و وان کیلۆیێن گوشتی یێن زێدە بھاڤێژن، پرانیا وان دمیننە د مال ڤە و وەسا ھزر دکەن ئەو پتر یا ب مفایە، بەلێ د راستی دا قەلەوی ژ مالا تە دەستپێدکەت.
چاوا مالا تە دبیتە ئەگەرێ سەنگا تە یا زێدە و قەلەویا تە؟
ژینگەھا پیس: بتایبەت ھەکە تو ل باژێری بی وپرانیا دەمێ خوە د مال ڤە ببەی و تو گەلەک کەل و پەلێن خوارنێ و شریناھیێن کارخانان بکری و خوارنا حازر ژ خوارنگەھان داخواز بکەی.
سەلاجا تژی خوارنێن خۆش: ئەو ژنێن بەردەوام خوارنێن خۆش د ھلگرن، رۆژانە پێنج جاران قەستا وێ خوارنێ دکەن و ئەڤە قەلەویێ زێدە دکەن.
سێڤ و فێقیێ د سەلاجێ دا ھلگرتی: دەمێ سێڤ و فێقی د سەلاجێ دا دھێنە ھلگرتن، ژن وی فێقی ناخۆت و ل بیرا وێ ناھێت و ھەتا برسی نەبیت قەستا وی فێقی ناکەت.
ئاگەھداری ل سەر پلا گەرماتیا مالێ: ئەو مالا گەلەک سار یان گەلەک گەرم دێ مرۆڤی پتر وەستینیت.
ئامیرێ راھێنانێن وەرزشی: پرانیا ژنان ئامیرێ خوەیێ راھێنانان ڤەدشێرن دا چو جھان د ناڤ مالێ دا نەگریت و دا زارۆ چو زیانان نەگەھیننێ، ئەڤ چەندە زیانێ ل ژنێ دکەت چونکو ل بیرا وێ ناھێت راھێنانان بکەت.
پێشوازیکرنا بەردەوام بۆ ھەڤالێن بێنەفس: ل ڤێرێ پێدڤیە وان ھەڤالێن بێنەفس مێڤان نەکەت ئەوێن گەلەک حەز ژ خوارنێ دکەن دا ئەو پشکداریێ ل گەل وان نەکەت، ھەردەم ژ دەرڤەی مال بگەھنە ئێک باشترە.
ب، ئەڤرۆ:
یانێن ئەنترمیلان و ناپولی و فیورنتینا یێن ئیتالی دێ بزاڤێ کەن پاشکەفتنێن خوە یێن خولا ناڤخوی و سەرکەفتنێن سیێ ل دووڤ ئێک تومار بکەن دەمێ ئەڤ شەڤە یاریێن خوە یێن گەرا سیێ ژ خولا یانێن ئوروپا یورپا لیگا یا تەپا پێ.
د کوما شەشێ دا یانا ئەنترمێلا ئەوا د خولا ناڤخویا ئیتالیا دا خوسارەت بووی دێ مێڤانداریا یانا سانت ئێتیان یا فرەنسی کەت و یانا ئیتالی یا ب ئومێدە ب گەھیتە نەە خالان و سەرکەفتنێ د ڤێ یاریێ دا تومار بکەت و پێنگاڤەکا مەزن بەر ب دەربازبونێ بو قوناغا دویێ ب ھاڤێژیت و زێدەتر راھێنەرێ تیمێ وولتر ماتزاری ژ بدەستڤە ئینانا ڤێ چەندێ دێ ئەو بیت باوەریێ بو یاریکەرێن خوە ڤەگەرینت و ببنە ھاندەر بو تومارکرنا ئەنجامێن باش د خولا ناڤخوی دا، ھەر چەندە ھژمارەکا یاریکەرێن وی پشکداریێ د ڤێ یاریێ دا ناکەن ب ئەگەرا ھنگافتنێ ئەوژی جوناسان و ھوگو کامبانیارو و ھەر وەسا راھێنەرێ ڤێ یانێ ئەوێ توشی رەخنەیێن مەزن بووی ھەلویستێ خوە باش بکەت و ھەر د ڤێ کومێ دا دنییرو یا ئوکرانی دێ د گەل قرەباغ یا ئەزربیجانی.
د کوما نەھێ دا یانا ناپولی دێ بیتە مێڤانەکا گران بو یانا یونگ بویز یا سویسری د بزاڤەکێ دا بو تومارکرنا سەرکەفتنا سیێ و نێزیکی دەربازبونێ و دیسان راھێنەرێ ڤێ یانێ یێ ئسپانی رافائێل بینیز دخوازیت قەرەبویا ئەنجامێن خوە یێن خولا ناڤخو بکەت و ھەر د ڤێ کومێ دا یانا سلوڤان یا سلوڤاکی دێ د گەل سپارتا براگ یا چیکی کەت.
د کوما یازدێ دا یانا فیورنتینا دێ بیتە مێڤانا پاوک یا یونانی ئەوا دێ لێگەریانا سەرکەفتنا سیێ کەت سەرەرای وێ چەندێ کو مورالا یاریکەرێن وێ یا لاوازە ب ئەگەرا خوسارەتیا د گەل یانا لازیو یا ئیتالی و دیسان یانا دینامو مینسک یا بیلا روسی د گەل یانا غانگان یا فرەنسی کەت.
د کوما حەفتێ دا یانا ئەشبیلیا یا ئسپانی ھەلگرا ناسناڤی دێ بیتە مێڤانا یانا ستاندر لیاج یا بەلجیکی د لێگەریانەکێ دا بو ڤەگەراندنا ھەڤسەنگیا خوە د ڤێ خولێ دا پشتی وەکھەڤیا یاریا بوری د گەل یانا رییکا یا کرواتی، ھەر چەندە ڤێ یانا ئسپانی د یاریا خوە یا ئێکێ دا سەرکەفتن تومار کربوو و دیسان د خولا ئسپانیا دا ئاستەکێ باش نیشان ددەت و نوکە ١٩ خال ھەنە کێمتر سێ خالان ژ سەرکێشا خولێ بەرشەلونە و ھەر د ڤێ کومێ دا یانا رییکا دێ د گەل فیینود کەت و ژ گرنگترین یاریێن ئەڤ شەڤە سێلتیک یا ئوسکوتلەندی دێ د گەل ئاسترا یا رومانی کەت د کوما چارێ دا و ئایندھوڤن یا ھولەندی د گەل باناسینایکوس یا یونانی د کوما پێنجێ دا و لیل یا فرەنسی د گەل ئێڤەرتون یا ئنگلیزی د کۆما ھەشتێ دا.
نيشاندان