ئه‌ڤرۆ نیۆز:
هنده‌ك ژێده‌رێن حوكمه‌تا هه‌رێما كوردستانێ ئاشكراكر، ویلایه‌تێن ئێكگرتیا ئه‌مریكى لبه‌ر فرۆكخانا (حه‌ریرێ) كو دكه‌فیته‌ د ناڤبه‌را هه‌ولێرێ و ناحیا حه‌ریرێ دا، بكه‌ته‌ بنگه‌هه‌كێ له‌شكرى یێ ئه‌سمانى بۆ ئه‌مریكا.
ژێده‌ره‌كێ به‌رپرس كو نه‌ڤیایه‌ ناڤێ خوه‌ ئاشكرا بكه‌ت گۆت: حوكمه‌تا هه‌رێما كوردستانێ ده‌ست ب ڤالاكرنا فرۆكخانا ناڤبرى كریه‌، پشتى ئه‌مریكا ئه‌و بۆ ڤێ مه‌ره‌مێ ئاگه‌هدار كرینه‌، ئاماژه‌دا هندێ ژى، كۆمپانیه‌كا بیانى دێ بكارێ ڤه‌گۆهاستن كه‌له‌و په‌لێن فرۆكخانا ناڤبرى بۆ جهه‌كێ نه‌دیار رابیت.
هه‌روه‌سا به‌رپرسه‌كێ دى دیاركر، شانده‌كێ هه‌ڤپشك كو سه‌ركردێن وه‌زاره‌تا پێشمه‌رگه‌ى و فه‌رماندێن هێزێن ئه‌مریكى سه‌ر فرۆكخانا حه‌ریرێ دایه‌ ل ئه‌یلونا بۆرى و پشتى هینگێ چار جارێن دى ئه‌و سه‌ره‌دان كرینه‌ ڤه‌، ودیاركر ده‌ڤه‌را حه‌ریرێ گرنگیه‌كا مه‌زن یا ستراتیجى هه‌یه‌ چونكى نێزیكى هه‌ر ژار وه‌لاتێن ئیران و توركیا و سوریا و عیراقێ یه‌، ئه‌ڤه‌ دبیت ئه‌مریكا وێ بنگه‌هى بكه‌ته‌ بنگه‌هه‌كێ له‌شكرى یێ ته‌مام.

ئه‌ڤرۆ نیۆز:
سه‌رۆكێ هه‌رێما كوردستانێ مه‌سعود بارزانى رێككه‌فتنا دهوكێ یا دناڤبه‌را ئالیێن كورادێن رۆژئاڤایا كوردستانێ دا، ب كاره‌كێ دیروكى و گرنگ سالۆخه‌ت دا، هه‌ڤده‌م ده‌ستخوشى ل شه‌ره‌ڤانێن كوردێن كوبانێ یێن به‌روكێن شه‌رێ دژى داعشێ كرن و سه‌ركه‌فتنێن كوردان ل هه‌موو به‌رۆكێن شه‌رى دژى هێرشێن داعشا تیرۆرست سه‌ركه‌فتنا هه‌موو ملله‌تێ كورده‌ و هه‌ر چار پارچێن كورستانێ یه‌.
هه‌روه‌سا سه‌رۆكێ هه‌رێما كوردستانێ مه‌سعود بارزانى پێرۆزباهیا ئیمزاكرنا رێككه‌فتنا د ناڤبه‌را هه‌ردو ئالیێن جڤاتا نیشتیمانیا كوردى و ته‌ڤگه‌را جڤاكێ دیموكراتى كر، سه‌رۆك بارزانى ئاماده‌ى ئیمزاكرنا وێ رێككه‌فتنێ بوو و گۆت: رێككه‌فتنا كورادن ل دهوكێ ته‌مامكه‌را رێككه‌فتنا هه‌ولێرێ 1 و هه‌ولێرێ 2 یه‌.
ل دوماهى سه‌رۆك بارزانى بۆ هه‌ردو ئالیان دوپاتكر، هه‌رێما كوردستانێ هه‌ر چو بزاڤ و شیانێن هه‌بن دێ هاریكارى و پشته‌ڤانیا رۆژئاڤایا كوردستانێ كه‌ت، زێده‌بارى وێ ژى دیاركر، ئه‌ڤ رێككه‌فتنه‌ په‌یامه‌كه‌ بۆ دوژمنێن ملله‌تێ كورد و كه‌سێن گره‌وێ ل سه‌ر به‌رخودانا كوردان دكه‌ن.

ئه‌ڤرۆ نیۆز، بارزان مزوورى:
به‌رپرسێ لقا 9 یا پارتى دیموكراتى كوردستان و میحوه‌رێ نه‌واران تایبه‌ت ئه‌ڤرۆ نیۆز گۆت: دوهى چه‌كدارێن داعشێ یا تیرۆرست هێرشه‌كا دژوار كرنه‌ سه‌ر به‌روكێن شه‌رى ل میحوه‌رێ نه‌واران، به‌لێ پێشمه‌رگێ هه‌رێما كوردستانێ هه‌ر زوور هێرشا وان تێكشكاند.
هه‌روه‌سا سه‌ربه‌ست تروانشى گۆت: ئه‌نجامێ وى شه‌رێ دناڤبه‌را هێزێن پێشمه‌رگه‌ى و چه‌كدارێن داعشێ دا شڤێدى په‌یدابووى 31 چه‌كدارێن داعشێ هاتینه‌ كوشتن و 4 ژ وان تیرۆرستان ب ره‌گه‌ز سعودى نه‌، زێده‌بارى چه‌ندێن ترۆمبێلێن وان ژى كو ل پاش خوه‌ هێلاینه‌ هاتینه‌ سۆتن.

ئه‌ڤرۆ نیۆز، قائید میرۆ
فه‌رمانده‌كێ فه‌رمانده‌یا زێره‌ڤانی راگه‌هاند، شه‌ڤا بۆری هێزێن پێشمه‌رگه‌یی ل ده‌ڤه‌را خازر ئێرشه‌كا تیرۆرستێن داعش شكاندیه‌ و حه‌فت چه‌كدارێن داعش هاتینه‌ كوشتن.
عه‌قید ئه‌میر كێشكه‌یی، فه‌رماندێ پێشمه‌رگه‌یێن زێره‌ڤانی ل میحوه‌ری خازر ب ئه‌ڤرۆ نیۆز راگه‌هاند، ده‌مژمێر نه‌هی شه‌ڤا بۆری، چه‌كدارێن داعش ل میحوه‌رێ خازر ژ لایانڤه‌ ئێرشكره‌ سه‌ر هێزێن پێشمه‌رگه‌ی و بۆده‌مێ پێنج ده‌مژمێران شه‌ڕ دنێڤبه‌را پێشمه‌رگه‌ی و داعش یێ به‌رده‌وامبوو.
عه‌قید ئه‌میر گۆتژی” د ئه‌نجامێ شه‌ڕێ شه‌ڤا بۆری، هێزێن پێشمه‌رگه‌ كارین ئێرشا داعش بشكنێنن و گورزه‌كا كوژه‌ك ل تیرۆرستێن داعش بده‌ن و حه‌فت چه‌كدارێن داعش هاتنه‌ كوشتن و دوو ژ كوشتیێن داعش خه‌لكێ ده‌رڤه‌ی عێراقێ نه‌.

ئه‌ڤرۆ نیۆز:
ژێده‌ره‌كێ ئاگه‌هدار ل ناڤه‌ندا باژێرێ مووسل دیاركر، 11 ته‌رمێن سه‌ركردێن چه‌كدارێن تیرۆرستێن داعشێ گه‌هشتنه‌ نوشداریا داد ل نه‌خوشخانا مووسل، هه‌ڤده‌م خویاكر وان سه‌ركردێن داعشێ پشكدارى د شه‌رى دوهیێ چیایێ شنگالێ دا كر بوو و هه‌موو هاتینه‌ كوشتن.
ژێده‌ره‌ێ نه‌ڤیایى ناڤێ خوه‌ ئاشكرا بكه‌ت گۆت: چه‌كدارێن داعشێ ئه‌ڤرو سپێدێ ته‌رمێن 11 سه‌ركردێن خوه‌ ئیناینه‌ نه‌خوشخانا مووسل و یا دیار بوو وانا گه‌له‌ك ب گرنگى و چاڤدێرى ل وان ته‌رمان دكرو داخوازا پاراستنا ته‌رمێن وانا دكر، چونكى ئه‌و هنده‌ك كه‌سایه‌تیێن گرنگێن چه‌كدارێن وانن.
هه‌روه‌سا گۆت: چه‌كدارێن داعشێ ته‌رمێن چه‌كدارێن خوه‌ ل مه‌یدانا شه‌رى دهێلن یان د ڤه‌گوهێزن بۆ بته‌له‌عفه‌رێ، به‌لێ هه‌كه‌ كه‌سێن گرنگ و خودان پلێن بلندێن و سه‌ركرده‌بن دئیننه‌ نه‌خوشخانا مووسل.

ئه‌ڤرۆ نیۆز، قائید میرۆ
سه‌رۆكێ رێكخراوا سكالا و چاڤدێری دبێژیت، چو چاره‌سه‌ر نه‌ماینه‌ بۆ ئێكلاكرنا پرسا جڤاتا پارێزگه‌ها سلێمانیێ و پێدڤیه‌ جڤاتا نوكه‌ بهێته‌ هه‌لوه‌شاندن و جڤاته‌كا نوو بهێته‌ هه‌لبژارتن.
شڤان زه‌نگه‌نه‌، سه‌رۆكێ رێكخراوا سكالاو چاڤدێری ئه‌ویه‌كژی بۆ ئه‌ڤرۆ نیۆز خویاكر، بڕیاربوو سبه‌ی د كۆمبوونا خوه‌دا یا ده‌هێ جڤاتا پارێزگه‌ها سلێمانیێ پرسا هه‌لبژارتنا جڤاتێ ئێكلا بكه‌ت، به‌لێ لایه‌نێن سیاسی نه‌گه‌هشتینه‌ چو رێكه‌فتنان، له‌وڕا سبه‌ی ئه‌ف پرس ناهێته‌ ئێكلاكرن، ب دیتنامه‌ دێ پرسا پارێزگه‌ر و جڤاتا پارێزگه‌ها سلێمانیێ وه‌كی خوه‌ بمینه‌ و یه‌كێتی نیشتیمانی كوردستان و بزاڤا گۆڕان هه‌ردووك رژدن لسه‌ر وه‌رگرتنا پۆستێ پارێزگه‌ری.
نافهاتی خویاژیكر، مه‌ ل دادگه‌ها سلێمانیێ سكالا لسه‌ر سه‌رۆكێ ده‌مكیێ جڤاتا پارێزگه‌ها سلێمانیێ تۆماركریه‌ و رۆژا 20/10 ئێكه‌م رۆنشت هاته‌ ئه‌نجامدان، به‌لێ دادگه‌هێ بڕیاردا رۆنشت بهێته‌ پاشئێخستن بۆ رۆژا 11/11/2014ێ، هه‌تا بگه‌هنه‌ رێكه‌فتنێ.