ھەولێر، قائید میرۆ

ئەندامەکێ کورد یێ لیژنا ئاسایش و بەرگریێ د جڤاتا نوونەرێن عیراقێ دا راگەھاند، وەزیرێ نوو یێ بەرگریا عیراقێ چو داخوەیانی دژی ھێزێن پێشمەرگەی نەداینە و ب چاڤەکێ ئەرێنی سەحدکەتە پێشمەرگەی، دیسا دبێژیت، عیراقێ تشتەک نەمایە ب ناڤێ لەشکرەکێ رێکخستی و د ڤەکۆلینا روودانا سەقلاویە دەرکەفتیە کو پتریا سەربازێن لەشکرێ عیراقێ بندیوارن و دەوامێ ناکەن، ھەروەسا دیارکر، بلا ھەرێم چاڤەڕێی لەشکرێ عیراقێ نەبیت بۆ رزگارکرنا دەڤەرێن بن دەستێ داعش، چونکو پتریا یەکەیێن لەشکرێ عیراقێ ھاتینە ھەلوەشاندن و تنێ ناڤ مایە. شاخەوان عەبدولا، ئەندامێ لیژنا ئاسایش و بەرگریێ ل جڤاتا نوونەرێن عیراقێ بۆ ئەڤرۆ دیارکر، عیراقێ لەشکرەکێ رێکخستی نەمایە و گۆتژی: “عیراق ژ لایێ سەربازی ڤە گەلەک یا لاوازە و لەشکرەکێ ھەی ھەکە نەبیت باشترە، ئەز ب خوە ئەندامێ وێ لیژنەیێ بووم کو ڤەکۆلین ل دۆر روودانا سەقلاویە کری، دەمێ مە ڤەکۆلین دکر گەلەک راستی بۆمە دیاربوون، بۆ نموونە د ڤەکۆلینێ دا دەرکەفت پتریا لەشکرێ عیراقێ بندیوارە، ئانکو ھەکە فەوجەکا لەشکرێ عیراقێ ژ ٤٠٠ سەربازان پێکھاتبیت، تنێ ١٢٠ سەرباز دەوامێ دکەن و لەشکرێ عیراقێ ب تنێ وەکو ناڤ مایە و لەشکرەکێ وەھمی یە”.

ناڤبری زێدەتر گوت: “سەربازێن شیعە د بەرھەڤ نینن بەرگریێ ژ جھێن سونەیان بکەن، سونە ژی د بەرھەڤ نینن بەرگریێ ژ دەڤەرێن شیعەیان بکەن، ژ سەرجەمێ ١٠ فرقێن لەشکرێ عیراقێ، دو فیرقە ژی نەماینە ب دروستی و ھەموو یێن ھاتینە ھەلوەشاندن و تنێ ناڤ ماینە، لەوما نەشیان شەڕێ داعش بکەن و دەڤەرێن خوە رادەستی تیرۆرستان کرن، ژ ئاریشەیێن دی یێن لەشکرێ عیراقێ گەندەلیە، ژبلی ڤێ چەندێ پتریا دەڤەرێن ھاتینە چۆلکرن گرنگی بزانیاریێن ھەوالگیری نەداینە، دەمێ مە ڤەکۆلین دکر، دەرکەفت دەزگەھێن ھەوالگیری زانیاری داینە فەرماندەیێن سەربازی، بەلێ کەسێ گوھێ خوە نەدایە وان زانیاریان و کار پێ نەھاتیەکرن”.

شاخەوانی گۆتژی: “لەشکرێ عیراقێ نەشێت دەڤەرێن بن کۆنتڕۆلا داعش ئازاد بکەتەڤە و بلا ھەرێما کوردستانێ ل ھیڤیا عیراقێ نەبیت، نوکە ئەڤە چەند رۆژەکە ھەوەک بۆ پاقژکرنا دەڤەرا بێجی ژ تیرۆرستێن داعش دەستپێکریە، بەلێ ئەڤە تنێ بۆ ڤەکرنا رێیا پارزینگەھا بێجی یە و پانزین ناگەھیتە بەغدا و دەڤەرێن دی یێن عیراقێ، نوکە عێراق دخوازیت ئەڤێ رێیا بێجی ڤەکەت و ئۆپەراسیۆنەکا لەشکری دەستپێکریە، راستە دبێژن ئەڤە دەستپێکەکە بۆ کۆنتڕۆلکرنا ھەموو وان دەڤەرێن داعش کونترۆلکرین، لێ باوەرناکەم لەشکرێ عیراقێ ئەڤ شیان ھەبن، گەلەک جاران دھێتە گۆتن بۆچی لەشکرێ عیراقێ ھاریکاریا ھێزێن پێشمەرگەی ناکەت د شەڕێ دژی تیرۆرستان دا، یێن ڤان ئاخڤتنان دبێژن ئاگەە ژ لەشکرێ عیراقێ نینە کا لەشکرەکێ چاوایە، ئەزێ ئاگەھدارم ل دۆر رەوشا وی یا ئالۆز و خوزی لەشکرێ عیراقێ ھاریکاریا خوە کربا بلا ھاریکاریا ھەرێما کوردستانێ و ھێزێن پێشمەرگەی نەکەت”.

ل دۆر داخوەیانیا وەزیرێ بەرگریا عیراقێ، ڤی ئەندامێ کورد د لیژنا ئاسایشێ و بەرگریێ دا گۆت: “وەزیرێ بەرگریا عیراقێ ھەڤالەکێ منێ نێزیکە و چو داخوەیانیەک دژی ھێزێن پێشمەرگەی نەداینە و ئەوا ل دەزگەھێن راگەھاندنێ ھاتیە بەلاڤکرن ژی چو راستی بۆ نینە، وەزیرێ بەرگریێ ب خوە ژی بەرسڤا وان دەزگەھان دایە و رۆلێ پێشمەرگەی بلند نرخاندیە، ھەروەسا وەزیرێ بەرگریا عیراقێ ب  دەڤێ خوە یا گۆتیە من (دێ ھەموو بزاڤان کەم بۆ بجھئینانا قانوونێ و رێکخستنەڤەیا لەشکرێ عیراقێ). دیسا نێڕینا وی ھەمبەر ھێزێن پێشمەرگەی نێڕینەکا ئەرێنی یە و ئەو دزانیت پێشمەرگەی چ رۆل ھەبوویە د شەڕێ تیرۆرێ دا”.