ئەڤرۆ، ھەژار مەعروف:

چاڤەرێ دھێتەکرن پشتی دو گەرێن دی ھەڤرکیێن خولا یا تەپا پێ یا عیراقێ بو یانێن پلا نایاب بھێنە راوستاندن بوو دەمەکێ درێژ ژبەر پشکداریێن ھەلبژارتیێ عیراقی د ھەردو قارەمانیێن کەنداڤی و قارەمانیا ئاسیا دا.

ژێدەرەکی ژ ئێکەتیا تەپا پێ یا عیراقی د داخویانیەکا تایبەت دا بۆ رۆژناما ئەڤرۆ دیارکر پشتی دو گەرێن دی دبیت خولا عیراقێ بوو ماوێ ٤٥ رۆژان بھێتە راوستاندن ژبەر پشکداریا ھەلبژارتیێ عیراقێ د قارەمانیا کەنداڤی ل سعودیێ و قارەمانیا ئاسیا ل ئوسترالیا و ئەڤ دەمێ ژبو وێ چەندێ یە ھەلبژارتیێ عیراقێ بەرھەڤیەکا باش بکەت.

ناڤبری ئەو چەندە ژی دیارکر کو ھژمارەکا یانا دێ ب ڤێ بریارێ دلگران بن لێ ئەو بەرژەوەندا ھەلبژارتیێ عیراقێ  ل سەر ھەموو بەرژەوەندا د دانن.

د قارەمانیێن کەنداڤی دا خولێن وەلاتێن سعودی، ئیمارات، کوێت و قەتەر بوو ماوێ ٢٨ رۆژان دێ ھێنە راوستاندن ژبەر پشکداریا ھەلبژارتیێن وان و بتنێ ل عیراقێ دێ ٤٥ رۆژ بن.

ئەڤرۆ، ھۆگر محەمەد:

گەشتا یانا ریال مەدرید یا ئسپانی و ھەلگرا ناسناڤی بو لێڤەرپول یا ئنگلیزی دێ دیتنا جەماوەری بخو کێشیت د یاریێن گەرا سیێ دا ژ قوناغا کومان یا قارەمانیا یانێن ئوروپا قارەمانێن خولان دەمێ ئەڤ شەڤە دھێتە کرن کو د ڤێ یاریا وان دا ھەڤرکیەکا ب ھێز دھێتە پێشبینیکرن چونکو ھەردو یانا ١٥ جاران ناسناڤێ ڤێ قارەمانیا ئێکێ ل ئوروپا ب دەستخوەڤە بریە نمرا پیڤای دەە جاران ل سەر ناڤێ ریال مەدریدە.

یاریکەرێن د ناڤا پێکھاتیێ راھێنەرێ ئایرلەندا ژوری دا براندان رودجرز دێ بزاڤێ کەن قەرەبویا خوسارەتیا خوە یا یاریا بوری بکەن ھەر چەندە سێ خال ھەنە ژ سەرکەفتنا یاریا ئێکێ د گەل لودوگوریست یا بولگاری، لێ ئەف چەندە یا ب ساناھی نابیت ھەمبەر یانەکا وەکو ریال مەدرید ئەوا دەستپێکەکا سەرکەفتی د ڤێ قارەمانیێ دا تومارکری ب دو سەرکەفتنا و زێدەتر ئارمانجێن یاریکەرێ وێ یێ پرتوگالی ب ھێز کرنا ھەلویستێ خوە دکەت پشتی شیای نمرا خوە وەکھەڤی یا ستێرا بەرێ یا یانێ رائول گونزالیسی لێ بکەت ب ٧١ گولان د ڤێ قارەمانیێ دا، لێ کارلو ئەنشلوتی راھێنەرێ ریال یێ خەمبارە ب نە پشکداریا یاریکەرێ وی یێ ویلزی گارس بێل د ڤێ یاریێ دا و دبیت د کلاسیکو یا ھەمبەر بەرشەلونە دا ب ئەگەرا ھنگافتنێ.

ھەر د ڤێ کوما دویێ دا یانا بال یا سویسری دێ بیتە مێڤانا یانا لودوگویتس رازاگراد یا بولگاری ھەر چەندە ئەرکێ یانا بولگاری یێ ب ساناھی نابیت چونکو دێ ل دووری جھێ خوە ب ٣٥٠ کیلومێتران یاریا خوە کەت د گەل ڤێ یانا ل قوناغا ڤەبر و دەربازبونێ سەرجەمێ دو یاریان ب شەش گولان بەرامبەر دو گولان خوسارەت بووی.

د کوما ئێکێ دا دێ ھەڤرکیەکا ب ھێز ھێتە کرن د ناڤبەرا ھەر چار یانێن پشکدار یێن ھەر ئێک ژ وان سێ خال ھەین پشتی ب دووماھی ھاتنا دو یاریێن بوری کو یانا ئەتلەتیکو مەدرید یا ئسپانی دێ مێڤانداریا یانا مالمو یا سویدی کەت و د ڤێ یاریێ دا یانا ئسپانی یا ب نیازە بەردەوامیێ ب دەتە ئاست و سەرکەفتنێن خوە ل ناڤا یاریگەھا خوە ڤیسنتی کالدیرون و یاریکەرێ وێ یێ ھێلا ناڤین ماریو سوارێز خویاکریە ئەف یاریە بو وان گەلەک یا گرنگە ژبو پاراستنا جھێ خوە و ل ھەمبەر یانا مالمو ئەوا بو جارا دویێ ناسناڤێ خولا سوید ل دەستپێکا ڤێ ھەیڤێ مسوگەر کری دێ ھەمی شیانا مەزێخیت پێخەمەت دیارکرنا ھەبونا خوە د قارەمانیێ دا.

ھەر د ڤێ کومێ دا یانا یانا یوڤانتوس ئارمانجێن وێ ئەون ھەبونا خوە یا پێشکەفتی د خولا ئیتالیا دا ڤەگوھێزیتە د ناڤا قارەمانیا ئوروپی دا دەمێ دبیتە مێڤانا یانا ئولومپیاکوس یا یونانی ھەر چەندە د دووماھی یاریا خوە یا خولا ئیتالیا دا وەکھەڤ بویە د گەل یانا ساسولو.

د کوما چارێ دا یانا بروسیا دورتموند یا ئەلمانی دێ بزاڤان کەت پاشکەفتنا خوە یا د خولا ئەلمانیا دا بەرزەکەت د ناڤا یاریگەھا یانا گەلاتا سەری یا تورکی دا تایبەت پشتی ئەو ھێزا راھێنەرێ یانا ئەلمانی یورگن کلوب دخواستی بو ڤەگەریای ب بەرھەڤبونا مارکوس رویس و ئەیلکای گوندوگان و یێ ئەرمینی ھنریخ مخیتاریان و د بەرامبەر دا یانا گەلاتا سەرای یا تورکی خودانا دو خالان د دو یاریێن بوری دا شیانێن وێ دێ ھێتە مەزاختن پێخەمەت گەشکرنا ھیڤێن خوە بو ب دەستڤە ئینانا پلێتەکا دەربازبونێ ژ ڤێ کومێ بو قوناغا دویێ و تومارکرنا سەرکەفتنێ بەری یاریا ڤان ھەردو یانا ل حەفتیا بھێت ل ناڤا یاریگەھا یانا ئەلمانی.

ھەر د ڤێ کومێ دا یانا ئەرسینال دێ ب گەشتەکا نێزیک چیت بو کرنا یاریێ ئەوژی د گەل یانا ئەندرلاخت یا بەلجیکی.

د کوما سیێ دا یانا بایرن لێڤەرکوێزن یا ئەلمانی خودانا سێ خالان دێ پێشوازیا یانا زینت سان بترسبورگ یا روسی خودانا چار خارلان ل سەرکێشیا سەرێ لیستا کومێ کەت و دیسان موناکو یا فرەنسی دێ ھەڤرکیا یانا بنفیکا یا پرتوگالی کەت.