ئەڤرۆ نیوز:
میدیایێن بریتانی بەلاڤكرن، شۆن كونری قارەمانێ فلمێن جێمس بۆندی وەغەر كر.
دەستەیا كەنال و رادیۆیێن (بی بی سی) یا بریتانی دیار کر، ئەڤرۆ شەمبیێ، 31 چریا ئێکێ 2020، هونەرمەند شۆن كونری ئەوێ ب رۆلێ كەسایەتیا جێمس بۆندی ڕادبوو د ژیێ 90 ساڵیێ دا وەغەر كر.
شۆن كونری، سینەماكارەکێ ئوسكوتلەندی بوو، ب كەساتیا نوكەرێ نهێنیێ بریتانی “جێمس بۆندی” یێ ناڤدار بوو، ئێكەم هونەرمەند بوو ئەو رۆلێ مەزن گێرای و پشکداری د حەفت فلمێن ژ وی رەنگی دا كریە.
ئەڤرۆ نیوز:
وەزارەتا ساخلەمیا ھەرێما کوردستانی راگەھاند، د دەمێ ٢٤ دەمژمێرێن بوری دا، ٦٨٩ حالەتێن نوو یێن کۆرۆنایێ و ٢٠١ حالەتێن باشبوونەڤە، دیسان ٢٤ حالەتێن وەغەرکرنێ ھاتینە تۆمار کرن.
ئەڤرۆ شەمبیێ، وەزارەتا ساخلەمیا ھەرێمێ دیار کر: د دەمێ شەڤەک و رۆژەکێ دا ٦٨٩ حالەتێن نوویێن کۆرۆنایێ ھاتینە تۆمار کرن، ژ وان ژی ٢١٤ ل هەولێرێ، ١٠٠ ل سلێمانیێ، ٢٣٢ ل هەلەبجە و ٣٠١ ل دهۆکێ، ١٦ ل راپەرین و ٣٦ ل گەرمیان.
هەروەسا دیار کریە، ٢٠١ کەسێن دی باشبووینە، کو ١١٧ ژ وان ل هەولێرێ، ٣١ ل سلێمانیێ، ٣١ ل گەرمیان و ١٦ ل هەلەبجە ، ٣٦٠ ل دهۆکێ و چار ل راپەرین.
دیسان ٢٤ حالەتێن وەغەرکرنێ ھاتینە تۆمار کرن، ژ وان ژی هەشت ل سلێمانیێ، حەفت ل دهۆکێ، سێ ل راپەرین، پێنج ل هەولێرێ و ئێک ژی ل هەلەبجە.
ھەتا نوکە ٧٦ ھزار و ٢٥ حالەتێن ڤایرۆسێ کۆرۆنایێ ل ھەرێمێ ھاتینە تۆمار کرن، ژ وێ هژمارێ ژی ٤٢ ھزار و ٨٠٩ کەس باشبووینە و دو ھزار و ٤٥٥ کەسان ژی وەغەرکریە.
ئەڤرۆ نیوز:
میدیایێن تورکی دیار کرینە، ژ ئەگەرێ بیڤەلەرزا دوهی یڵ باژێرێ ئیزمیرێ، هەتا نوکە ٢٤ کەسان ژیانا خوە ژ دەستدایە و ٨٠٤ کەس ژی برینداربووینە، هەروەسا میدیایێن یۆنانی ژی بەحسێ وەغەرکرنا دو کەسان و برینداربوونا 9 کەسان کریە.
چەند دەمژمێران پشتی بیڤەلەرزا ئێکێ، بیڤەلەرزا دویێ ژی ب پلا 5.1 یا رێختەرێ روودا کو ل ناڤەندا کوسادس ل نێزیکی دەریا ئیجە بوو، لێ چ زیانێن مەزن تۆمار نەکرن.
میدیایێن یۆنانی بەلاڤکرینە، دو کەسان ل گزیرتا سامۆس ل یۆنان، ژبەر کەتنا دیوارەکی ل دەمێ بیڤەلەرزێ ژیانا خوە ژ دەسدایە دا نەهـ کەس ژی برینداربووینە.
ئەڤرۆ نیوز:
وەزارەتا ساخلەمیا عیراقێ راگەهاند کو د ماوەیێ ٢٤ دەمژمێرێن بۆری دا ٤٨ نەخوشێن دی یێن کۆرۆنایێ ل عیراقێ مرن و هەروەسا هزار و ٩٩٧ کەسێن دی ژی تووشی کۆرۆنایێ بووینە و ب گشتی هەتا نها ل عیراقێ ٤٧٢ هزار و ٦٣٠ کەس تووشی کۆرۆنایێ بووینە کو ژ وان ٣٩٩ هزار و ٦٥٥ کەس چارەسەر بووینە و ١٠ هزار و ٩١٠ کەس ژی مرینە.
ئەڤرۆ نیوز، زنار تۆڤی:
دەزگەهێ لوتکە یێ کاروبارێن پەنابەران راگەهاند، گەنجەکێ هەرێما کوردستانێ کو ئاکنجیێ باژێرێ زاخۆ بوویە، ب رێیا دەربازبوونێ ژ رووبارێ درینا ل سنۆرێ وەلاتێ سربیا وەغەر کریە.
ئەڤرۆ شەمبیێ، دەزگەهێ لوتکە دیار کر: کۆچبەرەکێ کورد یێ ب ناڤێ ئاراز سەلیم کو د ژیێ ٢٤ سالیێ دابوو، پشتی کوردستان بجههێلای و ب شێوەیەکێ نە قانوونی بەرەف وەلاتێن ئورۆپا برێکەفتی، ل ئێڤاریا رۆژا پێنجشەمبی ل گەل سێ کۆچبەرێن دیتر ل دەمێ دەربازبوونێ ژ رووبارێ درینا ل سنورێ وەلاتێ سربیا بەری بگەهیت وەغەر کریە.
هەروەسا گۆتیە ژی، ب مەرەما هاریکاری و ب ساناهیکرنێ بۆ دیتنا تەرمێ کورێ وان، کەسوکارێن ئارازی پەیوەندی ب دەزگەهێ لوتکە کریە و دەزگەهێ لوتکە ژی دێ هاریکار بیت بۆ دیتنا تەرمێ وی گەنجی.
ئەڤرۆ نیوز:
سەرۆکێ هەرێما کوردستانێ نێچیرڤان بارزانی ژ بەر وەغەرا د. نەجمەدین کەریم پارێزگارێ شەرعی یێ کەرکووکێ پەیامەک بەلاڤکر و راگەهاند کو ژ دەستدانا نەجمەدین کەریم ژ بۆ مە و گەلێ کوردستانێ خەمەکا مەزنە. سەرەخوشیێ ل هەڤژین و زارۆیێن د. نەجمەدین کەریم، خەلکێ کەرکووکێ و هەموو خەلکێ کوردستانێ دکەم و هەڤخەمێ وانم.
سەرۆکێ هەرێما کوردستانێ هەروەسا دیار ژی دکەت کو د. نەجمەدین کەریم هەر د ژیەکێ گەنج دا پشکداری د شۆرەشێ دا کریە و دەمێ بارزانیێ نەمر نەخوش کەفتی ژی د. نەجمەدین کەریم ل ئەمریکا وەکو نوشدار خزمەت کر و کەسەکێ دلسوز بوو و گەلێ کوردستانێ چ دەمەکێ خەبات و دلسوزیا د. نەجمەدین کەریمی ژبیر ناکەت.
ئەڤرۆ نیوز:
وەزارەتا دەرڤە یا روسیا بەری دەمەکێ راگەهاند کو هەکە شەرێ ل هەرێما قەرەباخێ بەردەوام بیت ئەو دێ پشتەڤانیا ئەرمەنستانێ کەن.
وەزارەتا دەرڤە یا روسیا راگەهاند کو بەردەوامیا شەرێ ل قەرەباخێ دێ کارتێکرنا خوە ل هندەک دەڤەرێن دی ژی کەت و دێ مەترسیا خوە بۆ روسیا هەبیت، ژ بەر هندێ ژی هەکە شەر بەردەوام بیت دێ روسیا پشتەڤانیا ئەرمەنستانێ کەت.
وەزارەتا دەرڤە یا روسیا جارەکا دی داخواز ژ هەر دو ئالیێن شەری ژی کر کو پێگیریێ ب ئاگربەستێ بکەن و شەری بدەنە راگرتن.
ئەڤرۆ نیوز:
مەسرور بارزانی سەرۆکێ حوکمەتا هەرێما کوردستانێ ژ بەر وەغەرکرنا د. نەجمەدین کەریم پارێزگارێ شەرعی یێ کەرکووکێ پەیامەکێ بەلاڤ دکەت ئەڤە ژی دەقێ پەیاما سەرۆکێ حوکمەتێ یە:
به‌داخ و پەژارەیەکی زۆره‌وه، هه‌واڵى كۆچى دوایى کەسایەتیی نیشتمانپەروەر و تێکۆشەری دیار و بە هەڵوێستی کوردستان (دكتۆر نه‌جمه‌دین كه‌ریم)م پێگەیشت. د.نەجمەدین لە سەردەمی شۆڕشی ئەیلوولەوە وەک پێشمەرگەیەک و سەرکردەیەکی یەکێتی قوتابیانی کوردستان و دواتریش لە دەرەوەی وڵات، رۆڵێكى گرنگیی لە خه‌باتى رزگاریخوازى گه‌لى كوردستان و ناساندنی پرسی کورد لە نێوەندە دیپلوماسیی و ئەکادیمییە جیهانییەکاندا هەبوو. لە دواى ئازادکردنی عێراقیش لە رژێمی دیکتاتۆریی، وەک پارێزگاری کەرکووک، جێدەستی لە قووڵكردنه‌وه‌ى گیانى بەیەکەوه‌ژیانى ئاشتییانەی نێوان پێكهاته جیاوازه‌كان و داکۆکیکردن لە پرسە نیشتمانییەکان دیار بوو. پرسه و سه‌ره‌خۆشى خۆم له بنه‌ماڵه به‌ڕێزه‌كه‌ى و خه‌ڵكى كوردستان و بەتایبەتی شاری کەرکووک ده‌كه‌م و هاوبه‌شى خه‌میانم، خواى مه‌زن گیانى به به‌هه‌شت شاد بكات و ئارامییش بە هەموومان ببەخشێت.
مه‌سرور بارزانى
سه‌رۆكى حكومه‌تى هه‌رێمى كوردستان
2020/10/31
ئەڤرۆ نیوز، زنار تۆڤی:
ژ پێخه‌مه‌ت پاراستنا گیانێ وەلاتیان، ئەڤە سێ رۆژە پۆلیسێن هاتنوچوونا پارێزگه‌ها دهۆكێ هۆشداریێ دده‌نه شۆفێران، داکو ماسك و ده‌ستگۆركان بکاربینن، ل ئێكشه‌مبیا بهێت هه‌ر شۆفێره‌كێ پێگیریێ ب وان رێنمایان نه‌كه‌ت دێ هێتە سزادان.
موقه‌دمێ مافپەروەر ئازاد تاها په‌یڤدارێ رێڤەبەریا هاتنوچوونا پارێزگه‌ها دهۆكێ بۆ ئەڤرۆ نیوز دیار کر: ئه‌ڤ كارێ ئه‌م ئه‌نجام دده‌ین ژ بۆ پاراستنا گیانێ خه‌لكێ مەیە، ئەڤە سێ رۆژە پۆلیسێن هاتنوچوونا پارێزگه‌ها دهۆكێ ل هه‌موو قه‌زا و ناحیان هۆشداریێ ددەنە شۆفێران كه‌رەستێن خۆپاراستنێ وه‌ك ماسك و ده‌ستگۆركان بکاربینن.
ناڤهاتی گۆت ژى: ل ئێكشه‌مبیا بهێت هه‌وه‌ك دێ هێتە ئه‌نجامدان و هه‌ر شۆفێره‌كێ پێگیریێ ب رێنمایان نه‌كه‌ت دێ هێته سزادان و ئه‌ڤ سزادانه ژ بریارێن وه‌زاره‌تا ناڤخۆ یا حوکمه‌تا هه‌رێما كوردستانێ دەرچووینە، لەوما دخوازین شۆفێر پێگیریێ ب وان رێنمایان بكه‌ن.
ئەڤرۆ نیوز:
رێڤەبەرێ پەیمانگەها پاستۆر یا فرەنسی، یا تایبەتە ب ڤەکۆلینێن نەخۆشیێن ڤەگوهاستی راگەهاندیە، جۆرەکێ مرۆڤان هەیە، هەتا نوکە تووشی ڤایرۆسێ کۆرۆنایێ نەبووینە، د دەمەکێ دا کو وان مامەلە ل گەل تەشبویان دا هەبوویە.
ئاریج توتۆلیان رێڤەبەرێ پەیمانگەها پاستۆر یا فرەنسی د وارێ زیندەزانی، مایکرۆئۆرگان و ڤاکسینان دا ڤەکۆلینان دکەت دیار کریە: ئەڤە دەمەکێ زۆرە وان هزر کرییە کو گرۆپەکێ خەلکی یێن هەین ب چ شێوەیان تووشی کۆرۆنایێ نابن و ئەگەر ژی هێشتا یێ روون نینە.
ناڤهاتی ئاشکرا کر ژی، لدووڤ وان کەرەستێن ل بەر دەستێ وان، ئەو هێشتا نەشێن رۆن بکەن کا بۆچی ئەو گرۆپێن خەلکی تووشی کۆرۆنایێ نابن، چونکی ئەو نەشاینه بگەهنە ئەنجامەکی بۆ تێگەهشتن ل شێوە و ئالیێن بایۆلۆژی ب وێ بەرگریا کو وان کەسان هەی.
لدووڤ هندەک ڤەکۆلینان کو د دەمێ بوری دا ئەنجامداینە، پشکەکا مرۆڤان خودان جینەکا تایبەتن و رێکێ ب ڤایرۆسێ کۆرۆنایێ نادەن د لەشێ مرۆڤاندا گەشێ بکەت.
نيشاندان