ئه‌ڤرۆ نيوز، نيوار محه‌مه‌د سه‌ليم:
بڕياره سوبه‌هى ده‌مژمێر حه‌فت ب ده‌مێ هه‌ولێر، دادڤانێ كوريا باشوور كيم دونگ جين، فيركا ده‌سپێكێ يا ياريا دووماهيێ د ناڤبه‌را هه‌ردو يانێن هه‌ولێر و قادسيه يا كوێتى ل ياريگه‌ها راشد بن مه‌كتوم ل ئيمارات ژ قاره‌مانيا كاسا ئێكه‌تيا لێ بده‌ت.
سه‌عد عه‌بدولئه‌مير ژ ئه‌نجامێ هه‌بوونا دو كارتێن زه‌ر ژ تيما هه‌ولێر پشكدار نابيت و ژ يانا قادسيه ژى گۆمان يا ل سه‌ر پشكداريا هه‌ر ئێك ژيێ نايژيرى عه‌بدولا شه‌هيۆ و يێ كوێتى حه‌مه‌د ئه‌مان د گۆمانێ دانه كا دێ پشكداريێ كه‌ن يان نه.
هه‌ولێر گه‌هشتبوو ياريا دووماهيێ پشتى ل ياريگه‌ها خوه وه‌كهه‌ڤبووى ل گه‌ل يانا كيتجى يا هۆنگ كۆنگى و ل ياريگه‌ها وێ سه‌ركه‌فتن تۆمار كرى ب ئه‌نجامێ 2-1 و گه‌هشته ياريا دووماهيێ و قادسيه ژى ژ لايێ خوه ڤه گه‌هشتبوو ڤێ قووناغێ پشتى ل به‌رى دووماهيێ سه‌ركه‌فتن ل سه‌ر حنێرا قاره‌مانيێ بيرسيبورا جايابورا ل ياريگه‌ها وێ تۆمار كرى ب ئه‌نجامێ 4-2 و ل ياريگه‌ها خوه ژى ب شه‌ش گۆلان بێ به‌رامبه‌ر.
يانا هه‌ولێر پشكا شێرى يا جهێ پشته‌ڤانا ب به‌ردكه‌ڤيت ب به‌هانه‌يا وێ چه‌ندێ كو ل ياريگه‌ها وێ يه كو رێژا (90%) يه، ژ سه‌ر جه‌مێ 7800 كورسيان، حه‌فت هزار بۆ هه‌ولێرن و 800 بۆ قادسيه يا كوێتى. به‌لێ ب گۆره‌ى داخۆيانا رێبين ره‌مزى به‌رپرسێ راگه‌هاندنێ ل يانا هه‌ولێر رێژا پێدڤى يا جه‌ماوه‌رێ يانێ ئاماده نابيت ژ به‌ر كێشا ئابوورى يا هه‌رێمێ، د هه‌مان ده‌م دا دێ شاشه‌كا مه‌زن داننه نيڤا ياريگه‌ها شه‌هيد فره‌نسۆ هه‌ريرى دا كو جه‌ماوه‌ر ل وێرێ ته‌ماشه‌ى ياريێ بكه‌ت.
به‌رى نوكه يانا هه‌ولێر ئه‌وا ل 1968 هاتيه دامه‌زراندن جاره‌كێ يا گه‌هشتيه دووماهيا ڤێ قاره‌مانيێ د مێژوويا عيراقێ دا، به‌لێ تووشى خوساره‌تيه‌كا مه‌زن ببوو ل ياريگه‌ها خوه هه‌ر ل ده‌ستێ تيما كوێت يا كوێتى، ژ لايێ خوه ڤه قادسيه ئه‌وا ل سالا 1960 هاتيه دامه‌زراندن دو جاران گه‌هشتيه ياريا دووماهيێ و هه‌ردو جاران خوساره‌ت بوويه، يا ئێكێ ل سه‌ر ده‌ستێ ئتيحاد يا سورى 4-2 ب په‌نه‌لتيانێ پشتى ده‌مێ ياريێ ب وه‌كهه‌ڤى ب گۆله‌كێ ب دووماهى هاتى و جارا دويێ ل گه‌ل هه‌ڤوه‌لاتيا خوه كوێت يا كوێتى ل 2013 ب دو گۆلان بێ به‌رامبه‌ر.
هه‌تا نوكه هه‌ولێر 11 جاران كه‌فتيه به‌ر تيمێن كوێتى و ژ وان ژى كوێت، قادسيه، عه‌ره‌بيه و كازمه و تێدا دو سه‌كه‌فتن و چار خوساره‌تى و پێنج وه‌كهه‌ڤى تۆماركرينه.
ل سالا بۆرى هه‌ر چه‌نده خولا عيراقێ ب ته‌مامى نه‌هاته كرن، به‌لێ تيما هه‌ولێر و شورته ژ سه‌ركه‌فتيێن ئێكێ هاتنه هه‌ژمارتن و ئه‌ڤ ساله ژى هێشتا چو يارى نه‌كرينه ژ به‌ر ڤێ قاره‌مانيێ هاتينه پاشخستن و تيما قادسيه سالا بۆرى كاسا سۆپه‌ر يا كوێتى و خول و كاسا وه‌لى عه‌هد بربوون و ل كاسێ ژى ل گه‌ل كوێت ب په‌نه‌لتيانێ خوساره‌ت ببوو، ئه‌ڤ ساله ژى شه‌ش يارى كرينه و چاران سه‌ركه‌فتيه و وه‌كهه‌ڤيه‌ك و خوساره‌تيه‌ك هه‌نه.
ل سالا 2004 ئه‌ڤ قاره‌مانيه يا ب رێڤه‌چووى كو تێدا جه‌يش يا سورى ناسناڤێ ئێكێ ب ده‌ست خوه ڤه ئينابوو، به‌رى فه‌يصه‌لى يا ئوردونى ل سالێن 2005 و 2006 ڤى ناسناڤى ب ده‌ست خوه ڤه بينيت و پاشان ژى هه‌ڤالا وێ شه‌باب يا ئوردونى ل سالا 2007 ب ده‌ست خوه ڤه‌ئينا و پاشان مه‌حره‌ق يا به‌حرێنى ل 2008 و كوێت يا كوێتى 2009 و پاشان ئتيحاد يا سورى ل 2010، ناساف كارشى يا ئۆزپاكستانى ژ ل سالا 2011 ناسناڤى ب ده‌ست خوه ڤه بينيت و پاشان ژى كوێت يا كوێتى ل 2012 و 2013 هژمارا پيڤاى شكاند كو دبيته تيما ئێكانه سێ جاران ڤى ناسناڤى دبه‌ت.
بۆ زانين ئه‌ڤ ياريه دێ ل كه‌نالێ bein sports 8 هێته په‌خشكرن و ئه‌م وه‌كو ئه‌ڤرۆ نيوز دێ بزاڤێ كه‌ين ب ره‌نگه‌كێ ئێكسه‌ر په‌خش كه‌ين و هه‌كه به‌رهه‌ڤ ژى نه‌بووين دێ لينكێن ياريێ دانين ل سه‌ر ئه‌نترنێتى ته‌ماشه بكه‌ن.
نيشاندان