ھەولێر، قائید میرۆ:
بڕیارە ل دووماھیا ئەڤ سالە کۆنگرێ ئێکێ یێ جڤاتا بلندا دادوەریێ ل ھەرێما کوردستانێ بھێتە ئەنجام دان و د ڤێ کۆنگرەێ دا پێداچوون ل دەستھەلاتا دادوەریێ ل ھەرێما کوردستانێ بھێتە کرن و ب شێوەیەکێ سەردەمیانە قانوونێن تایبەت ب دادوەریێ بھێنە راستڤە کرن.
پەیڤدارێ جڤاتا بلندا دادوەریێ ل ھەرێما کوردستانێ حاکم ئومێد محسن بۆ رۆژناما ئەڤرۆ گۆت نوکە کار یێ ژ بۆ بەرھەڤ کرنا ڤێ کۆنگرەی دھێتە کرن و ھەتا دووماھیا سالێ دێ بەردەوام بین ل سەر وەرگرتنا بۆچوونێن جۆدا، ھەتا بزانین چ گوھۆڕین بھێنە کرن، دیار ژی کر کو د کۆنگرەی دا دێ بڕیار ل سەر چاوانیا راستڤەکرنا قانوونێن داخوازکارێ گشتی و قانوونا ھژمار ٢٣ یا سالا ٢٠١١ یا دەستھەلاتا دادوەریێ و قانوونا تیرۆرێ و قانوونا توندوتیژیا خێزانێ و زۆر قانوونێن دیتری ھێتە دان، ب رێیێن جۆدا کار بۆ پتر دەولەمەند کرنا کۆنگرەی دھێتە کرن، ب تایبەتی ئەڤ قانوونێن ل بەغدا ھاتینە راستڤە کرن، دێ بزاڤان کەین، وەکو بەغدا راستڤە کرن بۆ بھێتە کرن و ل گەل ئێک بھێنە گونجاندن.
حاکم ئومێد محسن گۆت ژی کارێ دادوەری بێ لایەنیە و ئەو کەسێ دھێتە ھەمبەر دادگەھێ دادوەر ب ئێک چاڤ بەرێ خوە دەتە ھەردو لایەنان، پیشەیا دادوەری ئەوە بێ لایەنی پێڤە دیاربیت و ب ئێک چاڤ سەرەدەریێ ل گەل ئاریشان بکەت، گورەی قانوونێ ھەکە دادوەر یێ نەخۆش بوو یان ژ لایێ دەروونی ڤە یێ تورە بیت نەچارە دەست ژ کارێ خوە بەردەت و دادوەرەکێ دی ڤێ بادەکێ ب رێڤە ببەت، لەوڕا نابیت وەلاتی ترس ژ دادگەھێ ھەبیت و بلا خەلک بزانن دادگەە جھێ دادپەروەریێ یە.
نيشاندان