ئەڤرۆ نیوز:
دوهی هێزێن ئیرانێ ل سەر سنورێ رۆژهەلاتێ کوردستانێ ل گەل هەرێما کوردستانێ تەقە ل کۆلبەرێن کورد کرن کو د ئەنجام دا هەتا نها ١١ کۆلبەرێن کورد بریندار بووینە.
رێکخراوا مافێن مرۆڤی یا رۆژهەلاتێ کوردستانێ ژی ئەڤرۆ راگەهاند کو د ناڤا دو مەهێن بۆری دا ئیرانێ پتر ژ ٢٠ کۆلبەرێن کورد کوشتینە و ئەو یەک ژی کارەساتەکا مەزنە.
ئەڤرۆ نیوز:
ل گۆر راپۆرتەکا مالپەرێ سەندیکا هێزێن سووریا دیموکرات ل گەل هێزێن رژێما سووریێ ئەڤرۆ پێکڤە ل باکورێ حەلەبێ دەست ب ئۆپەراسیۆنەکا مەزن ل دژی هێزێن سەر ب تورکیا کرن و شیاینە چەندین دەڤەرێن ژی ژ دەستێ گرۆپێن چەکدارێن سەر ب تورکیا دەرخینن.
بەری نها چەندین بسپۆرێن سیاسی یێن تورکیا ژی دیار کربوون کو پشتی ئدلبێ کورد دێ ل گەل رژێما سووریێ پێکڤە باژێرێ عەفرینێ ژ دەستێ تورکیا و گرۆپێن سەر ب وێ دەرخینن.
لێ پەیڤدارێ هیزێن سووریا دیموکرات ئەو یەک رەتکر و راگەهاند کو وان ل گەل رژێما سووریێ دەست ب چو ئۆپەراسیۆنێن هەڤپشک نەکرینە.
ئەڤرۆ نیوز، بارزان مزووری:
موقەدمێ مافپەروەر هێمن سلێمان بەرپرسێ پەیوەندی و راگەهاندنا رێڤەبەریا پولیسێن پارێزگەها دهوک بۆ ئەڤرۆ نیوز گۆت: (ئەڤە ماوەیەکێ درێژ بوو دیڤچوونا باندەکێ دکەن کو رابووینە ب دزینا پێگوهۆرێن کارەبێ یێن جوتیارا ل قەزایێن شێخان و ئاکرێ و بەردەرەش و مووسل شڤێدی رێکەفتی 17/2/2020 مەفرەزێن پوڵیسێن قەزا شێخان ب هەڤکاری دگەل پولیسێن ئاکرێ د ئوپەراسیونەکێ دا شیان باندەکێ دەستەسەر بکەن کو ژ سێ تومەتباران پێک هاتیە و دانپێدان کرینە ل سەر چەندین تاوانێن دزینا پێگوهۆرێن کشتوکالی و ل دیف بەندێ 443 هەر سێ تومەتبار هاتیە بەندکرن و رەوانەکرن بوو دادگەهێ).
ناڤهاتی خویاکر نێزیک د کونگرەیەکێ روژنامەڤانی دا دێ زانیاریێن زێدەتر ژلایێ راگەهاندنا پولیسێن پارێزگەها دهوکێ ڤە هێنە راگەهاندن .
لدوڤ گوتنێن رێڤەبەرێ بەلاڤکرنا کارەبا شێخان کۆ ل قەزا شێخان زێدەتر 30 پێگوهۆرێن جوتیاران هاتینە دزین.
ئەڤرۆ نیوز:
سیاسەتمەدارێ ناڤدارێ کورد و ئەندامێ بەرێ یێ پەرلەمانێ عیراقێ د. مەحمود ئۆسمان راگەهاند کو دڤێت د کابینا نوو یا حوکمەتێ دا مافێن کوردان و سوننان بهێتە بەرچاڤ وەرگرتن و گۆت: (بێی کوردان چو حوکمەتەک ل عیراقێ سەرکەفتی نابیت، ئەزموونێن بەری نها ل عیراقێ ژی سەلماندینە پشتگوه خستنا کوردان دێ بیتە ئەگەرێ هندێ کو عیراق تووشی قەیرانەکا مەزن ببیت).
ئەڤرۆ نیوز، زنار تۆڤی:
ل پارێزگەها دهۆکێ ئاگر ب شوقەیەکێ کەفت و ب وێ چەندێ ژنەک سۆت و ژیانا خۆ ژ دەستدا.
بێوار عەبدلعەزیز بەرپرسێ راگەهاندنا بەرەڤانیا باژێرێ دهۆکێ بۆ ئەڤرۆ نیوز راگەهاند، ئەڤرۆ ل دەمژمێر ١١:٣٦ خۆلەکێن سپێدێ دا ل تاخێ ماسیکێ یا باژێرێ دهۆکێ ئاگر ب شوقەیەکێ کەفت و ب وێ چەندێ ژنەک سۆتیە و پاشی ژیانا خۆ ژدەستدا.
بەرپرسێ راگەهاندنا بەرەڤانیا باژێرێ دهۆکێ دازانین ژی، تیمێن ئاگرڤەمراندنا بنگەهێ مالتایێ ل جهێ بوویەرێ بەرهەڤبوونە و ئاگر کۆنترۆلکریە، دیسان پۆلیسێن پارێزگەها دهۆکێ دێ دووڤچوون و ئەگەرێن مرن و ئاگربەربوونێ د ڤێ روودانێ دا کەن.
ئەڤرۆ نیۆز، قائید میرۆ:
بڕیارە ئەڤسالە کۆنگرێ سەندیکا رۆژنامەڤانان برێڤەبچیت و نەقیبێ سەندیکایێ ژی دبێژیت، ئەنجوومەن یێ بەرھەڤیان بۆ گرێدانا کۆنگرێ سەندیکایێ دکەت، بەلێ رۆژا رێڤەچوونا کۆنگرەی دیارنینە.
حاکم ئازاد حەمەدەمین، نەقیبێ سەندیکا رۆژڤانێن کوردستانێ بۆ ئەڤرۆ نیۆز دیارکر” بڕیار ھاتیەدان ئەڤسالە کۆنگرێ سەندیکا رۆژنامەڤانان بھێتە ئەنجامدان، چونکە دەمێ گرێدانا کۆنگرێ بسەرڤەچوویە و ئەنجوومەنێ سەندیکایێ ژی بریارا دوماھیێ لدۆر ئەنجامدانا کۆنگرەی د ئەڤسالەدا دەرکریە.
حاکم ئازاد ئاشکراکر” بەری کۆنگرەی دێ کۆنفڕانس بۆ لقێن سەندیکا رۆژنامەڤانان بھێنە رێڤەبرن و کۆنگرەژی دێ پشتی کۆنفڕانسا بڕێڤەچیت، ژبەرکو ھزاران ئەندام چاڤەڕێی رێڤەچوونا کۆنگرەی دکەن، بەلێ رۆژا رێڤەچوونا کۆنگرەی ھێشتا دیارنینە دێ کەنگی بیت.
ئه‌ڤرۆ نیوز، مه‌حمود نهێلى:
به‌رپرسێ پشكا كه‌شناسیا ئامێدیێ بۆ ئه‌ڤرۆ نیوز دیاركر، پشتى بارینا بارانێ د هه‌یانا 24 ده‌مژێرێن بورى دا رێژا بارانێن ئه‌ڤ ساله ل ده‌ڤه‌را ئامێدیێ ژ 700 ده‌رباز كر و پتر ژ 3 میترێن به‌فرێ بارینه.
هاشم یه‌حیا به‌رپرسێ كه‌شناسیێ ل رێڤه‌به‌ریا چاندنا ئامێدیێ بۆ ئه‌ڤرۆ نیوز دیاركر، رێژا بارانێن سه‌نته‌رێ قه‌زا ئامێدیێ پشتى 24 ده‌مژمێرێن بورى دا 23 ملیم هاتین، گه‌هشته 604 ملیمان و گۆت: ( ل سه‌رسنكێ 710 ملیمێن بارانێ و ل چه‌مانكى 707 ملیم و ل دێره‌لۆكێ 599 ملیم و ل كانى ماسێ ژى 628 ملیم باران باریه).
ناڤهاتى ئاشكراكر، كو ل بامه‌رنێ كێمترین رێژا بارانێ باریه تا نوكه گه‌هشتیه 517 ملیمان.
و خویاكر، كو ل ئامێدیێ 154 سه‌متیمێن به‌فرێ و سه‌رسنكى 119 سه‌متیم ، ل دێره‌لۆكێ 28 سه‌متیم ، كانى ماسێ 308 سه‌متیم ، ل بامه‌رنێ 108 سه‌متیم و بامه‌رنێ ژى 148 سه‌متیمێن به‌فرێ د هه‌یاما ئه‌ڤ ساله دا بارینه.
ئەڤرۆ نیوز، نەوزاد هلوری:
ژ ئەگەرێ بەفر و بارانەکا زۆر یێن دەمەکێ کێم بەری نوکە، زیان ب چەند جهێن ناحیا چەمانکێ گەهاند، باژێرڤانیا چەمانکێ ژی دیارکر کو ئەو نوکە مژولێ پاقژکرن و ڤەکرنا وان جهانە کو ژ ئەگەرێ لەهیان هاتینە گرتن و خراپکرن.
میاس محەمەد سالح، سەرۆکێ باژێرڤانیا چەمانکێ بۆ ئەڤرۆ نیوز گۆت: دەمەکێ کێم بەر نوکە بەفر و بارانێن زۆر ل دەڤەرا چەمانکێ بارین و بویە ئەگەرێ هندێ هندەک ژ رێیێن سەرەکی ب هەرفن و ئاڤ بچیتە سەر جادە و ناڤا کوڵانان، لەوا باژێرڤانیا چەمانکێ هەر زو ب رێیا تیمەکا تایبەت گەهشتە جهێن لەهی گەهشتیێ و کار بو ڤەکرنا جوک و قەسیس و جهێن لەهیان کر داکو چو زیان ب وەڵاتیان و جهێن گشتی نەگەهیت.
زێدەتر گۆت: دنوکە دا هژمارەکا قەسیسان هاتنە ڤەکرن کو ژ ئەگەرا باران و لەهیان پرببوون، دخوازین کو وەلاتی ل سەر گرتن و دروستونا لەهیان مە ئاگەهدار بکەن داکو تیمێن مە ژی بشین ب زوترین دەم وان جهان پاقژ بکەن.
ئه‌ڤرۆ نیوز:
په‌یڤدارێ وه‌زاره‌تا دارای و ئابووری یا حكومه‌تا هه‌ریما كوردستانێ راگه‌هاند: پروسه‌یا هه‌رتمیا مامۆستایێن گرێبه‌ست گه‌هشتیه قوناغا دوماهیێ.
ئه‌حمه‌د عه‌بدلره‌حمان په‌یڤدارێ وه‌زاره‌تا دارایی و ئابووری یا حكومه‌تا هه‌رێما كوردستانێ راگه‌هاند: لگۆری بریارا ژماره 34 یا جڤاتا وه‌زیران، بریارا دامه‌زراندنێ بۆ مامۆستایێن گرێبه‌ست ده‌ركه‌فتی یه و مه ژی نڤیساره‌ك بۆ وه‌زاره‌تا په‌روه‌ردێ بۆ هیرده‌كاریێن ئه‌وان گرێبه‌ستان بۆ مه فرێ بكه‌ن.
په‌یڤدارێ وه‌زاره‌تا دارایی و ئابووری یا حكومه‌تا هه‌رێما كوردستانێ راگه‌هاند ژی دوماهی نڤیسار دهی گه‌هشتیه ده‌ستێ مه بۆ ئه‌وێ مه‌به‌ستێ مه ژی ئه‌ڤرۆ نڤیساره‌ك كۆ داخاز ژ وه‌زاره‌تا په‌روه‌ردێ كریه گرۆڤێن تایبه‌ت ب مامۆستایێن گرێبه‌ست بۆ مه ره‌وانه بكه‌ن، هه‌ر ده‌مێ ئه‌و زانیاری گه‌هشتنه ده‌ستێ مه، ل زووترین ده‌م دێ پرۆسه‌یا دامه‌زراندنێ بجهـ كه‌ین، لێ ئه‌و پرۆسه‌یا ئیداری ژ چه‌ند قوناغه‌كان پێك دهێت، نوكه ل قوناغا دوماهیێ دایه.
ئەڤرۆ نیوز ، زنار تۆڤی:
پشكا چالاكیێن قوتابخانان یا په‌روه‌ردا دهۆك رۆژئاڤا ئه‌ڤرۆ 17/2/2020 ب چاڤدێرى و به‌رهه‌ڤبوونا عومه‌ر عه‌لى تاها رێڤه‌به‌رێ گشتى یێ په‌روه‌ردا پارێزگه‌ها دهۆكێ و عومه‌ر ئه‌حمه‌د قاسم رێڤه‌به‌رێ په‌روه‌ردا دهۆك رۆژئاڤا و فادیا عه‌بدولقادر رێڤه‌به‌را په‌روه‌ردا دهۆك رۆژهه‌لات و هژماره‌كا زۆر یا به‌رپرسێن حزبى و حكومى و مێهڤان و سه‌رپه‌رشتیار و مامۆستا و قوتابیان، پێشانگه‌ها شێوه‌كارى و كارێن ده‌ستى بۆ قوتابخانێن بنه‌ره‌ت و ئاماده‌یى ڤه‌كر.
پشتى به‌رهه‌ڤبوویان گه‌ریانه‌ك ل ناڤ پێشانگه‌هێ كرى و كارێن قوتابیان ژ نێزیك دیتین دیارى ل سه‌ر قوتابخانێن سه‌ركه‌فتى هاتنه به‌لاڤكرن.
كه‌ڤر كه‌مال به‌رپرسێ پشكا چالاكیێن قوتابخانان بۆ ئەڤرۆ نیوز دیار كر : كو ئەڤ شالە 6400 قوتابیان ژ 92 قوتابخانان پشكدارى د ڤێ پێشانگه‌هێ دا كریه و كارێ وان ژ لایێ لیژنه‌كا بسپۆر ڤه هاته هه‌لسه‌نگاندن و ئه‌ڤ ساله پشكدارى گه‌له‌كا باشبوو و هه‌روه‌سا كارێن باشى ژى ژ لایێ قوتابیان ڤه هاتبوونه دروستكرن و گۆت:( 16 قوتابخانێن سه‌ركه‌فتى ژ هه‌رسێ قوناغێن بنه‌ره‌ت 1 بۆ 6 و بنه‌ره‌ت 7 بۆ 9 و ئاماده‌یى ژ ئالیێ مه ڤه هاتنه خه‌لاتكرن).
ئه‌نجامێن پێشانگه‌هێ ب ڤى ره‌نگى بوون:
سه‌ركه‌فتیێن قۆناغا بنه‌ره‌ت (1-6):
قوتابخانا هه‌كار سه‌ركه‌فتیا ئێكێ
قوتابخانا راژان سه‌ركه‌فتیا دووێ
قوتابخانا زڤڕین سه‌ركه‌فتیا سیێ
قوتابخانا شاخكێ سه‌ركه‌فتیا چارێ
قوتابخانا مالتا ژێرى سه‌ركه‌فتیا پێنجێ
سه‌ركه‌فتیێن قۆناغێن (7، 8 و 9):
قوتابخانا سه‌رده‌م سه‌ركه‌فتیا ئێكێ
قوتابخانا چنار سه‌ركه‌فتیا دووێ
قوتابخانا زانكۆ سه‌ركه‌فتیا سیێ
قوتابخانا هه‌ڤند سه‌ركه‌فتیا چارێ
قوتابخانا وان سه‌ركه‌فتیا پێنجێ
قوتابخانا كه‌زان سه‌ركه‌فتیا پێنجێ دوباره
سه‌ركه‌فتیێن قۆناغێن ئاماده‌یى:
ئاماده‌یا دهۆك یا كچان سه‌ركه‌فتیا ئێكێ
ئاماده‌یا شه‌هید مه‌لا ئه‌مین سه‌ركه‌فتیا دووێ
ئاماده‌یا ئاواز سه‌ركه‌فتیا سیێ
ئاماده‌یا كه‌ژین سه‌ركه‌فتیا چارێ
ئاماده‌یا سه‌فین سه‌ركه‌فتیا پێنجێ
نيشاندان