ئەڤرۆ نیوز:
رێکخراوا مافێن مرۆڤی یا رۆژهەلاتێ کوردستانێ راگەهاند کو حەفتیا بۆری هێزێن ئیرانێ ل سەر سنوری تەقە ل کۆلبەران کرینە و سێ کۆلبەرێن کورد جانێ خوە ژ دەست داینە و دو کۆلبەرێن دی ژی ب گرانی بریندار بووینە و دوهی ئێک ژ وان ژی ل نەخوشخانێ جانێ خوە ژ دەست دا.
رێکخراوا مافێن مرۆڤی داخواز ژ سازیێن جیهانی دکەت کو فشارێن خوە ل سەر ئیرانێ زێدە بکەن دا هێزێن ئیرانێ دەستان ژ کوشتنا کۆلبەران بەردەن.
ئەڤرۆ نیوز:
رێڤەبەریا خوەسەر یا باکورێ سووریێ راگەهاند کو تورکیا دڤێت دیموگرافیا رۆژئاڤایێ کوردستانێ ب گوهۆریت و مخابن د سەرەدانا خوە یا بۆ تورکیا دا شیرەتکارا ئەلمانیا ژی پشتەڤانی ل پرۆژێ تورکیا کر، ئەو یەک ژ ئالیێ کوردان ڤە ناهێتە قەبوولکرن، چونکو چەندین سالن تورکیا کار بۆ گوهۆرینا دیموگرافیا رۆژئاڤایێ کوردستانێ دکەت و مخابن هندەک وەلات ژی پشتەڤانیێ ل پرۆژێن تورکیا دکەن.
ئه‌ڤرۆ نیوز، مه‌حمود نهێلى:
به‌رپرسێ هوبا چاندنێ ل دێره‌لۆكێ دیاركر، كو ل سنورێ هوبا وان سێ پرۆژه‌یێن خودانكرنا ماسیان یێن ده‌ستوورداى هه‌نه كو ئێك ژ وانا شیانێن خودانكرنا 150 بۆ 200 ته‌نێن ماسیان هه‌نه د ساله‌كى دا.
عسمه‌ت ئیبراهیم به‌رپرسێ هوبا چاندنێ ل دێره‌لۆكێ بۆ ئه‌ڤرۆ نیوز دیاركر، كو ل سنورێ هوبا وان دوو پرۆژه‌یێن خودانكرنا ماسیێن سه‌له‌مون و ئێك پرۆژێ خودانكرنا ماسیێن شه‌بوت هه‌یه و گۆت : ( ئێك ژ وان پرۆژه‌یان شیانێن به‌رهه‌مئینانا 150 ته‌ن بو 200 ته‌نێن ماسیان هه‌یه د ئێك سال دا ئه‌ڤێ یه‌كى ژى كارتێكرنه‌كا باش یا هه‌ى ل سه‌ر پێشڤه‌برنا ئاستێ ئابورى هه‌م یێ خودانێ پرۆژه‌ى هه‌م ژى یێ خه‌لكێ ده‌ڤه‌رێ).
ناڤهاتى دیار ژى كر، كو مه ل ده‌ڤه‌رێ پێدڤى ب كارگه‌هه‌كا شیره‌مه‌نیێ هه‌یه بۆ چێكرنا به‌رهه‌مێن شیرى و گۆت : ( ب ڤه‌كرنا ڤى كارگه‌هێ هه‌م دێ بازارێ ده‌ڤه‌رێ پر كه‌ت ژى به‌رهه‌مێن شیرى هه‌م ژى دێ ده‌لیڤێن كارى بۆ خه‌لكێ ده‌ڤه‌رێ هێنه په‌یداكرن).
ژلایێ خوه ڤه سدقى هاریكى دیاركر، كو پر‌وژێ وێ یێ خودانكرنا ماسیێ سه‌له‌مون شیانێن به‌رهه‌م ئینانا 5 ملیون ماسیێن سه‌له‌مون هه‌یه لێ بكر نین و پرۆژه‌یێن نافخوه یى نینه وان ماسیان لێ بكرن و گۆت: ( نوكه پرۆژێ وان شیانێن به‌رهه‌مئینانا 150 ته‌ن بو 200 ته‌نێن ماسیێن سه‌له‌مون هه‌یه لێ بازارێ ماسیێ وان یێ لاواز بووى ژ به‌ر كو نوكه چه‌ندین كه‌س هه‌نه دچنه ئیرانى ماسیێ مه‌زن و یێ ئاماده د ئینن ب ئه‌رزانتر ژ بازارى دفروشن ئه‌ڤێ یه‌كێ ژى كارتێكرن ل به‌ره‌مى ناڤخوى كریه).
ئەڤرۆ نیوز:
میخائیل بۆگدانۆڤ جێگرێ وەزیرێ دەرڤە یێ روسیا ئەڤرۆ گەهشتە هەولێرێ و بریارە ل گەل بەرپرسێن هەرێما کوردستانێ کۆم ببیت.
چاڤدێرێن سیاسی دیار دکەن کو سەرەدانا بۆگدانۆڤی نها گرنگیەکا خوە یا تایبەت هەیە، چونکو ئالۆزیێن مەزن ل عیراقێ هەنە و پشتی ئەمریکا نها ژی روسیا دڤێت گرنگیەکا زێدە بدەتە هەرێما کوردستانێ، ئەو یەک ژی دێ وەسا کەت کو پێگەهێ هەرێما کوردستانێ بهێزتر ببیت.
ئه‌ڤرۆ نیوز:
شانده‌كێ ئیكه‌تیا ژوورێن بازرگانی یێن ههرێما كوردستانێ ل وه‌لاتێ سریلانكایه ب مه‌به‌ستا زێده‌كرنا په‌یوه‌ندیێن بازرگانی و ئابووری و پرۆتوكۆلێن لێك تێگه‌هشتنێ بۆ كاركرنا هه‌ڤبه‌ش ئیمزا بكه‌ن.
سیروان محه‌مه‌د جێگرێ سه‌رۆكێ ئیكه‌تیا ژوورێن بازرگانیێن ههرێما كورێما كوردستانێ راگه‌هاند: سه‌رۆكێ ئێكه‌تیا ژوورێن بازرگانی یێن ههرێما كوردستانێ ل گه‌ل ژوورێن بازرگانی و خودانكار و به‌رپرسێن سریلاتكا كۆمبوون، ب مه‌به‌ستا زێده‌كرنا لهه‌ڤگوهارتنا بازرگانیێ دناڤبه‌را وان دا، پروتوكۆلێن لیك تێگه‌هشتنی بۆ كاركرنا هه‌ڤبه‌ش ئیمزاكرن.
ناڤبری ئه‌و چه‌نده ژی دازانین نوكه چه‌ندین كه‌ل و په‌ل ژ وه‌لاتێ سریلانكا ل بازارێن ههرێما كوردستانێ هه‌نه و ژلایێ وه‌لاتیانڤه ب شێوه‌یه‌كێ به‌رچاڤ خواست ل سه‌ر هه‌یه، چه‌ندین جورین كه‌ره‌سته‌یێن بیناسازی ژی كۆ ل ههرێما كوردستانێ دهێنه به‌رهه‌م ئینان كۆ ئه‌ڤی وه‌لاتی پێدڤی پی هه‌یه له‌ورا بزاڤا هنارتنێ بۆ كه‌ین بۆ ئه‌ڤێ مه‌به‌ستێ پروتوكۆلێن لێك تێگه‌هشتنێ بۆ كاركرنا هه‌ڤبه‌ش ئیمزا دكه‌ین.
دهۆك، له‌زگین جوقی:
تایبه‌تمه‌نده‌كێ نه‌خۆشیێن خوینێ ل ده‌ڤ زارۆیان به‌حسێ زیانێن ڤه‌خوارنا چایێ ل ده‌ڤ زارۆیان پشتی نان خۆارنێ دكه‌ت و دبێژیت باشتره زارۆك هه‌تا ژیێ پێنج سالیێ چایێ ڤه‌نه‌خۆن وپشتی پێنج سالیێ ژی ده‌مێ نان خۆارنێ نابیت ئێكسه‌ر چایێ ڤه‌خۆن ب كێماسی پشتی خۆارنێ ب سێ ده‌مژمێران ژ نوكه چایێ ڤه‌خوون.
د. عبدولره‌حمان عه‌بدوللا محسن، تایبه‌تمه‌ندێ نه‌خۆشیێن خوینێ ل ده‌ڤ زارۆیان دیاركركو ل ده‌ڤ پتریا وه‌لاتیان داب ونه‌ریته‌ك چێبوویه پشتی نانخوارنێ ئێكسه‌ر چایێ ڤه‌دخوون ئه‌و بخو كه‌رسته‌ك یێ دناڤ چایێ دا دژی مادێ ئاسنی یه، ئانكو خۆارنا مرۆڤ بخۆت چ جۆرێ ئاسنی دناڤ دایه ئه‌و ئاسن پێدڤیه دناڤ رووڤیكێن مرۆڤێ دا بهێنه مێشتن،به‌لێ هه‌كه چایێ پشتی خوارنێ ئیكسه‌ر ڤه‌خۆت ئه‌و مادێ ئاسنی ب وی كه‌رستێ‌دناڤ چایێ ڤه دمینت دگه‌ل ده‌ستئاڤێ ده‌ركه‌دڤیت وناهێلیت بهێته مێشتن، ژبه‌ر هندێ چا ڤه‌خوارن پشتی خوارنێ ئێكسه‌ر باش نینه، چونكو دبیته ئه‌گه‌ر كێم خوینی دروست ببیت، ژبه‌ركو چا ناهێلیت له‌شێ مرۆڤی مفای ژ وان ماده‌یێن دناڤ خوارنێ دا وه‌ربگریت، ژبه‌رهندێ هه‌كه مرۆڤێ مه‌زن بیت ویێ ساخله‌م بیت، ره‌نگه گه‌له‌ك كارتێكرنێ لێ نه‌كه‌ت به‌لێ هه‌ر باش نینه،به‌لێ هه‌كه زارۆكه‌ك بیت وخوارنێ بخۆت و ئێكسه‌ر پشتی نانخوارنێ چایێ ڤه‌خۆت ئه‌و خرابیێن خوه لسه‌ر زارۆكی هه‌نه هه‌تا پشتی 15 سالیێ و پێهه‌ل ژی باش نینه پشتی خوارنێ چایێ ڤه‌خوون، له‌ورا ئه‌م ئاموژگاریان ل خه‌لكێ خوه دكه‌ین خوه ژ چایێ دوور بكه‌ن، بتایبه‌تی ژی پشتی نانخوارنێ، ژبه‌ركو مرۆڤ ده‌مێ خوارنێ دخۆت ئه‌و خوارن دناڤ رووڤیكا دا دهێته مێشتن و له‌شێ مرۆڤی مفای ژێ وه‌ردگریت، به‌لێ ڤه‌خوارنا چایێ پشتی خوارنێ ناهێلیت ئه‌و خوارن ناڤ له‌شی دا بهێته مێشتن.
ئاشكرا كركو هه‌كه ژیێ زارۆكیژ سیێ هه‌تا 15 سالیێ دا چایێ ڤه‌خۆت ده‌مه‌كێ گونجای دا، ئانكو نه پشتی خوارنێ بیت ئێكسه‌ر چو زیانێن وه‌سا نینن بتایبه‌تی ژی هه‌كه پشتی نانخۆارنێ ب سێ هه‌تا چار ده‌مژمێران ژ نوو چایێ ڤه‌خۆت چو زیانێن وه‌سا نابن .
ناڤهاتی زێده‌تر گۆت: مادێ كروڤاین دناڤ چایێ دایه ئه‌ڤ مادده بو زارۆكێن بچووك باش نینه و كارتێكرنێ ل خه‌وا زارۆكان دكه‌ت وهه‌كه خه‌وا زارۆكی بهێته تێكدان ژی باش نینه و دبیت كارتێكرن ل ده‌روونێ زارۆكێ بهێته كرن، هه‌تا ژی مادێ كرۆڤاین دناڤ چایێ و پێپسی و هنده‌ك كه‌ره‌ستێن دی ژی دا هه‌یه ره‌نگه ده‌مێ زارۆك بكاردئینت كارتێكرنَێ ل هه‌ستێ زارۆكی ژی بكه‌ن، ژبه‌ر ڤێ چه‌ندێ باشتر ئه‌وه زارۆك دبن ژیێ پێنج سالیێ دا چایێ ڤه‌نه‌خۆن، باشتره و دسه‌ر پێنج سالیێ دا هه‌تا 15 سالیێ ژی چایێ ڤه‌خوون به‌لێ پشتی نانخۆارنێ ب سێ هه‌تا چار ده‌مژمێران ژنوو داكو زیان نه‌گه‌هیته زارۆكی.
ئه‌ڤرۆنیوز:
تایبه‌تمه‌نده‌كێ نشته‌گه‌ریێن گشتی ل دهۆكێ دیاركركو حاله‌ته‌كێ ده‌گمه‌ن یێ رووڤیكان هاته دین و هه‌موو رووڤیكین بچووك یێن نه‌خۆشه‌كی چبووبوونه د كیسكه‌كی دا و ببوونه رووڤیك هاتبوونه گرتن و ئه‌ڤ حاله‌ته‌گه‌له‌كێ ده‌گمه‌نه و دبێژنێ(كوكون ئه‌بدومینت) و ئه‌و نه‌ساخ هه‌لگرێ ناسنامه‌یا بریتانی بوو و ل دهۆكێ هاته نشته‌رگه‌ریكرن و پشتی ڤه‌گه‌ریانا وی بو بریتنیا ره‌وشا وی گه‌له‌ك باش بوویه.
د. شێرزاد سه‌ید عه‌لی، تایبه‌تمه‌ندێ نشته‌گه‌ریێن گشتی ل دهۆكێ دیاركركوهنده‌ك جاران نه‌خۆشیا ئێشا زراڤ دبیته ئه‌گه‌رێ ڤێ چه‌ندێ، چونكو ل ده‌ستپێكێ نه‌هاتیه ده‌ستنیشانكرن و دبیته ئه‌گه‌ر رووڤیك ستوور دبیت و كیسكه‌كی دروست دكه‌ت و گۆت:نیشانێن ڤێ نه‌خۆشیێ ئه‌ون كو زكێ نه‌خۆشی یێ تژی یه و دلرابوون په‌یدادبیت و زكی َوی ده‌ردكه‌ڤت ژی وگه‌له‌ك جاران وی كه‌سی وه‌كو ئێشانه‌كا نه سرۆشتی هه‌یه و پشتی پشكنین بۆ وی نه‌خۆشی دهێنه كرن دیاردبیت كو رووڤیكێن وی دگرتینه، ئه‌ڤه ژی گه‌له‌ك جۆر هه‌نه، ئه‌وژی رووڤیك دهێنه تێك ئالاندن، یانژی خوین ناچیته د رووڤیكێ دا، چونكو یا گرتیه و دیسان رووڤیك ره‌ش دبیت و ئه‌م قه‌د دكه‌ین و جاره‌كا دی پێكڤه گرێ دده‌ین.
دیاركر ژی ئه‌ڤ حاله‌ته گه‌له‌ك د كێم و ده‌گمه‌نن و ئه‌وێ ل دهۆكێ هاتیه دیتن وه‌كو كیسكه‌كی د زكێ نه‌خۆشی دا بوو د ناڤ ررووڤیكان دا هاتبوو چێكرن وگۆت: ئه‌ڤ نشته‌گه‌ریه ژ 15 ده‌قیقا هه‌تا ده‌مژمێره‌كێ ڤه‌دكێشن و دڤی ده‌می دا رووڤیك ژ كیسكی دهێنه ده‌رخستن و ئه‌ڤ حاله‌ت زۆر دكێمن و زوو ب زوو ناهێنه دیتن.
ئه‌ڤرۆ نیوز:
د نووترین كارڤه‌دان دا، برایان براكینز، په‌یڤدارێ هێزێن ئه‌سمانی یێن ئه‌مریكی د داخۆیانیه‌كا رۆژنامه‌ڤانی دا راگه‌هاند كو وه‌لاتێ وی پێدانا چه‌كی و مووشه‌كێن فرۆكێن F16 بۆ عیراقێ راگرت.
برایان براكینز گۆت ژی”هه‌ر ده‌مێ ره‌وشا ئه‌منی ل عیراقێ به‌ر ب باشتر بچیت، دێ ئه‌مریكا ده‌ست ب هنارتنا چه‌كی بۆ عیراقێ كه‌ت”.
په‌یڤدارێ هێزێن ئه‌سمانی یێن ئه‌مریكی ئاماژه ب وێ چه‌ندێ ژی كر كو دووماهی كاروانێ چه‌كی كو ئه‌مریكا بۆ له‌شكرێ عیراقێ هنارتی ل رۆژا 14/11/2019 بوو.
ئه‌و چه‌ك و مووشه‌كێن ژلایێ ئه‌مریكا ڤه دهێنه دان بۆ عیراقێ، ل دووڤ رێككه‌فتنه‌كێ بوو د ناڤبه‌را هه‌ردو وه‌لاتان كو ل هه‌یڤا گۆلانا 2016 ب بهایێ ئێك ملیار و 800 ملیۆن دۆلاران هاتیه ئیمزاكرن.
ژ لایه‌كێ دی ڤه، رۆژناما (وول ستریت جۆرنال) یا ئه‌مریكی د راپۆرته‌كا خوه دا ل سه‌ر عیراقێ ئاماژه ب وێ چه‌ندێ كر كو هه‌ردو وه‌زاره‌تێن ده‌رڤه و به‌رگریا ئه‌مریكی مژوولی پلانه‌كێ نه بۆ كێمكرنا هاریكاریێن له‌شكری بۆ عیراقێ.
به‌لاڤكر ژی”هه‌كه هات و بریارا په‌رله‌مانێ عیراقێ ل دۆر ده‌ركرنا هێزێن ئه‌مریكی و بیانی ژ عیراقێ هاته بجهئینان، ئه‌مریكا دێ هاریكاریێن خوه بۆ هێزێن عیراقی ل سالا 2020 ب گۆژمێ 250 ملیۆن دۆلاران كێم كه‌ت”.
كه‌ریم علێوی، ئه‌ندامێ لژنا ئاسایش و به‌رگریێ ل په‌رله‌مانێ عیراقێ ل دۆر وی بابه‌تی راگه‌هاند” هه‌تا نوكه چو نڤیسار نه‌گه‌هشتینه مه ل دۆر راگرتنا ئه‌مریكا بۆ هاریكاریێن له‌شكری بۆ هێزێن عیراقی و ئه‌م یێ ل ژڤانێ دووپاتكرنا ڤی ده‌نگوباسی یان ره‌تكرنا وی ژلایه‌نێن په‌یوه‌ندیدار “.
گۆت ژی”زیاندارا مه‌زن ژ ڤێ بریارا دێ ئه‌مریكا ب خوه بیت و چو كارتێكرن ل عیراقێ نابیت، ژبه‌ركو چه‌ك ب هێزێن عیراقێ دهێته دان به‌رامبه‌ر گۆژمێن دراڤی یێن مه‌زن، گه‌له‌ك وه‌لاتێن دی یێن هه‌ین كو عیراق دشێت رێككه‌فتنێن كرینا چه‌كی دگه‌لدا ئیمزا بكه‌ت”.
پێشتر ژی دۆنالد ترامپ سه‌رۆكێ ئه‌مریكا گه‌فێن ژناڤبرنا ئابوورێ عیراقێ كربوون و دیاركر بوو هه‌كه بریارا ده‌ركرنا هێزێن ئه‌مریكی ژ عیراقێ بهێته بجهئینان، دێ هه‌موو پارێ عیراقێ ل به‌نكا فیدرالی یا ئه‌مریكی راگریت.
ئه‌ڤرۆ، بارزان مزووری:
كلارا عودیشو، سه‌رۆكا لیستا ئه‌نجومه‌نێ گه‌لی كلدانی و سریانی و ئاشوری ل په‌رله‌مانێ كوردستانێ بۆ ئه‌ڤرۆ نیوز گۆت:مه هنده‌ك په‌رله‌مانتار ل په‌رله‌مانێ عیراقێ یێن هه‌ین ئه‌و كو ب ده‌نگێ شیعان بووینه په‌رله‌مانتار، به‌لێ نوونه‌راتیا مه‌سیحیان ناكه‌ن.
كلاراییێ زێده‌تر گۆت” هه‌رسێ په‌رله‌مانتارێن مه‌سیحی یێن سه‌ر ب لیستا (بابلیون) ب هزاره‌ها ده‌نگێن شیعا ل نه‌جه‌ف و كه‌ربه‌لا بووینه په‌رله‌مانتار و دبێژن حوكمه‌ت یا شیعایه وئه‌و نه‌شێن كێشه و پێتڤیێن مه‌سیحیان دابین بكه‌ن. ل حوكمه‌تا به‌غدا مه مه‌سیحیان چ پوستێن مه‌زن نینن ب تنێ هنده‌ك رێڤه‌به‌رێن فه‌رمانگه‌هێن بچووكن هه‌رچه‌نده په‌رله‌مانێ عیراقێ و حوكمه‌تێ د نها دا چ گرنگیا خو نه‌مایه ژبه‌ر وێ چه‌ندێ ره‌وشا مه‌سیحیان ل به‌غدا یا خرابه”.
گۆت ژی” هه‌تا نها سه‌رژمێریا مه‌سیحیان ل عیراقێ یا دیار نینه، به‌لێ به‌ری 2003 نێزیكی دو ملیون مه‌سیحی ل عیراقێ هه‌بوون د نها دا تنێ نێزیكی 150 هزار یێن ماین ئه‌وژی هه‌موو ل كوردستانێ دژین رێژه‌كا كێم زڤرینه ده‌شتا مووسلێ لبن ده‌ستهه‌لاتداریا پێشمه‌رگه‌ی دانه ود ره‌وشه‌كا باش دا دژین، وه‌لاتیێن مه‌سیحی ل به‌غدا نه‌ماینه ئه‌وێن ماین رێژه‌كا گه‌له‌ك كێمن وپتریا وان دانعه‌مرن وكچ و كورێن وان هه‌موو ل كوردستانێ و ده‌رڤه‌ی عیراقێ نه ئه‌ڤه ئه‌و مه‌سیحی نه یێن خودان ملك و ئوتێل و كارگه‌هێن مه‌زن و هه‌تا نها نه‌فرۆتینه و یێ بزاڤێ دكه‌ن وان ملكێن خوه بفروشن وئه‌وژی عیراقێ بهێلن ژبه‌ركو ئه‌و خوه‌نیشادانێن به‌غدا گه‌له‌ك زیان ب مه‌سیحیان گه‌هاندیه و ره‌وشا ئه‌منی گه‌له‌ك یا خرابه”.
ئه‌ڤرۆ نیوز:
رۆژنامه‌كا سعودی به‌لاڤكر كو ئه‌مریكا دانوستاندان ل گه‌ل ههرێما كوردستانێ دكه‌ت ب مه‌ره‌ما دانانا بنگه‌هێن سه‌ربازی و زێده‌كرنا سه‌ربازێن خوه ل هه‌رێمێ.
رۆژناما شه‌رقولئه‌وست ژ زارێ چه‌ند به‌رپرسێن رۆژئاڤایی” هنده‌ك پێشنیاز بۆ زێده‌كرنا هه‌بوونا له‌شكرێ یێن هه‌ین، ژوان ژی هه‌ر دانوستاندنه‌كا ل گه‌ل به‌غدا بهێته ئه‌نجامدان دڤێت ل سه‌ر پرسێن دی ژی بهێنه كرن نه تنێ بیاڤێ له‌شكری، به‌لكو ل دۆر په‌یوه‌ندیێن ئابووری ژی، زێده‌باری هاندانا قۆلپا ناتۆی كو رۆله‌كێ كاریگه‌رتر د شه‌رێ دژی داعشێ دا هه‌بیت”.
دیاركر ژی” ژ وان پێشنیازان، ئه‌نجامدانا دانوستاندنان ل گه‌ل سه‌رۆكایه‌تیا ههرێما كوردستانێ ل دۆر دانانا بنگه‌هێن له‌شكری ل نێزیك سلێمانیێ و ل باشوورێ هه‌ولێرێ و ل نێزیك هه‌له‌بجه و زێده‌كرنا هژمارا سه‌ربازێن ژ 500 سه‌ربازان بۆ دو هزار سه‌ربازان، زێده‌باری وان پێنج هزار سه‌ربازێن ل عیراقێ ب خوه هه‌ین”.
وێ رۆژناما ل سه‌ر زارێ هژماره‌كا دبلۆماتكاران به‌لاڤكر ژی كو نوكه هه‌بوونا له‌شكری یا ئه‌مریكی ل رۆژئاڤایێ عیراقێ و ل رۆژهه‌لاتا سووریێ یا هه‌ی، ژ به‌ركو پتریا هێزێن ئه‌مریكی ئه‌وێن ژ رۆژهه‌لاتا فوراتێ ل ده‌ستپێكا ئه‌ڤ ساله هاتینه ڤه‌كێشان، ل ههرێما كوردستانێ ماینه و هژمارا سه‌ربازێن ئه‌مریكی ل نێزیك بیرێن په‌ترۆلێ ژ هزار سه‌ربازان بووینه 500 سه‌رباز”.
ژلایه‌كێ دی ڤه لایه‌نێن سیاسی یێن شیعی د به‌رده‌وامن ل سه‌ر داخوازا ڤه‌كێشانا هێزێن ئه‌مریكی ژ عیراقێ، ریاز مه‌سعودی، ئه‌ندامێ په‌رله‌مانێ عیراقێ ژ لیستا سائیروون راگه‌هاند” عیراق پێدڤیه ب هه‌بوونا بنگه‌هێن له‌شكری یێن ئه‌مریكی نینه و پێدڤیه لایه‌نێن سیاسی له‌زێ بكه‌ن د ده‌ستنیشانكرنا سه‌رۆكێ نوو یێ وه‌زیران تاكو حوكمه‌تا داهاتی بشێت بریارا په‌رله‌مانێ عیراقێ یا ده‌ركرنا هێزێن بیانی و ب تایبه‌تی یێن ئه‌مریكی بجهبینیت و نه‌خشه رێیه‌كێ بۆ بجهئینانا وێ بریارێ دانیت”.
ناڤبری دیاركر” ئه‌م ل عیراقێ نوكه پێتڤی نینین ب هه‌بوونا بنگه‌هێن له‌شكری یێن ئه‌مریكی و بیانی و ده‌ركه‌فتنا وان ژ عیراقێ یا گرنگه و پێدڤیه لایه‌نێن سیاسی ل سه‌ر كه‌سایه‌تیه‌كی بۆ پۆستێ سه‌رۆَكێ وه‌زیران ب رێككه‌ڤن تاكو حوكمه‌ته‌كا ب هێز پێك بینیت كو ئه‌و حوكمه‌ت بشێت بریارا په‌رله‌مانی ل دۆر ده‌ركرنا هێزێن بیانی بجهبینیت و عیراق نه بیته مه‌یدانا شه‌رێ هه‌رێمایه‌تی”.
نيشاندان