ئه‌ڤرۆ، ئێقبال عومه‌ر:
مۆزیكژه‌ن گاره‌ خۆشه‌ڤی ئه‌رتیسی، ددیداره‌كێ‌ دا بو ئه‌ڤرۆ دا دیاركرن, ئه‌و ده‌رچوویێ‌ په‌یمانگه‌ها هونه‌رێن جوانه‌ ل دهۆكێ‌ و شیانێن ژه‌نینا چه‌ندین ئاله‌تێن مۆزیكێ‌ هه‌یه‌، وه‌ك رتم و باله‌بان و بلۆل و فلۆت و ئۆرگ و ئیقاع و ده‌ف و ره‌قه‌ و پاركشن و ده‌هول) لێ‌ ژهه‌مویان پتر حه‌زا وی ل سه‌ر( باله‌بان و بلۆل و فلۆتێ‌) هه‌یه‌، نوكه‌ گرۆپه‌كێ‌ گه‌نجێن مۆزیكژه‌ن و سترانبێژ هه‌یه‌ ل ناحیا شێلادزێ‌.
ناڤهاتی گۆت: ئاله‌تێن هه‌وای ژه‌نیارێن وان زۆر دكێمن، ل په‌یمانگه‌ها هونه‌رێن جوان ژی ماموستایێن وان نینن، به‌س یێن فلۆتێ‌ هه‌نه‌، مۆزیكێ‌ ل جیهانێ‌ رۆله‌كێ‌ گرنگ هه‌یه‌ د به‌رهه‌مان دا و زۆر گرنگی پێ‌ دهێته‌ دان، ژبه‌ركو به‌رهه‌م ب مۆزیكێ‌ جهێ‌ خوه‌ دگریت،
و دناڤا مۆزیكێ‌ دا گه‌له‌ك كه‌سێن دی ژی دشێن رۆله‌كێ‌ مه‌زن ببینن، مۆزیك بتنێ‌ ژ ده‌نگان پێك ناهێت،د هه‌مان ده‌م دا گۆتن ژی دناڤ به‌رهه‌مێ‌ مۆزیكی َدا خودان رۆله‌كێ‌ سه‌ره‌كی یه‌ و ب هێزا گۆتنێ‌ به‌رهه‌مه‌ك دشێت ب ژه‌نینا مۆزیكه‌كا خۆش دل و مه‌ژیێ‌ گوهداران پربكه‌ت و بۆ لایێ‌ خوه‌ راكێشیت و به‌ره‌ف خه‌یالان ببه‌ت و بهێزا ژه‌نینا ئاله‌تێن مۆزیكێ‌ به‌رهه‌مه‌ك دشێت دلێ‌ گوهداران خۆش بكه‌ت و بلۆل و ریتم د مه‌ژیێ‌ مرۆڤان دا باندۆرا خوه‌ هه‌یه‌ و ئێكسه‌ر مرۆڤان به‌رب غه‌ریبیێ‌ دبه‌ت، هه‌روه‌سا مۆزیك ده‌رگه‌هێ‌ جیهانا هه‌ستێن مرۆڤان ڤه‌دكه‌ت, هه‌م ب دیتن و هه‌م ب بهیستن،هه‌م ژی ب ساناهی دشێت بكه‌ڤیته‌ ره‌هێن مرۆڤان و وان داناڤا ده‌نگان دا بكه‌ته‌ رێڤنگێ‌ رێكه‌كا دوور.

ئه‌ڤرۆ، نه‌وزاد هلۆری:
ترۆسكه‌ شێرزاد، رۆژنامه‌ڤانه‌كا كچه‌، ب گۆتنا وێ‌ هه‌ر ژ زارۆكینێ‌ وێ‌ حه‌زا كارێ‌ راگه‌هاندنێ‌ هه‌بوویه‌، بۆ جارا ئێكێ‌ رادیۆیا هێلێن ده‌ست ب كاری كریه‌، نوكه‌ ل رۆژناما رووداو كار دكه‌ت، هه‌روه‌سا قوتابیا كولیژا راگه‌هاندنێ‌ یه‌.
ترۆسكێ‌ بۆ ئه‌ڤرۆ گۆت: ئه‌ز ب حه‌ز چوومه‌ دناڤ راگه‌هاندنێ‌ دا و پتری ساله‌كێ‌ ب خۆبه‌خش من كاركریه‌، به‌لێ‌ د ئه‌نجام دا شیام خوه‌ پێ بگه‌هینم و په‌یاما خوه‌ ژی بگه‌هینمه‌ جڤاكی، نوكه‌ ل رۆژناما رووداو كاردكه‌م، دیسان ل كه‌نالێ‌ ئه‌ستیره‌ ژی ل هه‌ولێر كاردكه‌م، هه‌ڤده‌م دوارێ‌ ڤیدیۆگرافیك و فوتۆگرافه‌ریێ‌ ژی دا كار دكه‌م، و پێدڤی یه‌ مرۆڤ ده‌ستان ژ خه‌ونێن خوه‌ نه‌ به‌رده‌ت، وان ئاسته‌نگان بۆخوه‌ نه‌كه‌ت بهانه‌ كو دكه‌ڤنه‌ د به‌رسنگێ‌ مرۆڤی دا، و ب دیتنا من د نوكه‌ دا راگه‌هاندنا كوردی یا پره‌ ژ كێماسیان، ئه‌ڤه‌ زێده‌باری وێ‌ یه‌كێ‌ كو د یاسا رۆژنامه‌ڤانیێ‌ دا ئه‌رك و مافێن رۆژنامه‌ڤانان وه‌كو پێدڤی نه‌هاتینه‌ پاراستن، له‌وا گرنگه‌ یاسا رۆژنامه‌ڤانیێ‌ بهێته‌ راستڤه‌كرن، لێ‌ زێده‌باری هه‌موو ئاسته‌نگ و كێماسێن راگه‌هاندنا كوردی، به‌ر ب باشترڤه‌ دچیت.
ل دووماهیێ‌ گۆت: چوو كه‌سان هاریكاریا من نه‌كریه‌ كو هاتیمه‌ دناڤ راگه‌هاندنێ‌ دا، و هه‌تا نوكه‌ من هه‌ڤژینی پێكنه‌ئینایه‌ و هزر ژی تێدا نه‌كریه‌، به‌لێ‌ ئه‌گه‌ر من پێكئینا دخوازم ل گه‌ل كه‌سه‌كێ‌ پێكبینم كو هزر و بیر و ره‌فتارێن مه‌ نێزیكێ‌ هه‌ڤبن ب تایبه‌تی ژ روویێ‌ كاری ڤه‌، من ل به‌ره‌ پشتی كولیژا راگه‌هاندنێ‌ ب دووماهی دئینم كارێن خوه‌ به‌رفره‌هتر لێ‌ بكه‌م.
ناڤهاتی ، دژیێ‌ 22 سالیێ‌ دایه‌ و ل باژێرێ‌ هه‌ولێرێ‌ دژیت، ژبلی راگه‌هاندنێ‌، ل دوارێ‌ جڤاكی ژی روله‌كێ‌ به‌رچاڤ هه‌یه‌.

ئه‌ڤرۆ,ره‌مه‌زان هه‌رنی:
سترانبێژا باكوورێ‌ كوردستانێ‌ ره‌وشه‌ن چه‌لكه‌ر د دیداره‌كێ‌ دا بۆ رۆژناما ئه‌ڤرۆ گۆت: “من ئه‌لبۆمه‌كا نوو دروستكریه‌ بناڤێ‌ (تۆڤ) ژ 10 تراكان پێكدهێت كو سترانێن ڤێ‌ ئه‌لبۆمێ‌ ب شێوه‌زارێن كرمانجیا باكوور و به‌هدینی هاتینه‌ گۆتن و پشتی چه‌ند رۆژێن دی دێ‌ ئێك ژ سترانێن به‌رهه‌مێ‌ خوه‌ یێ‌ نوو كلیپ كه‌م”.
ره‌وشه‌نێ‌ خویا كر كو ئه‌ڤه‌ ئه‌لبۆما وێ‌ یا دویێ‌ یه‌ و هه‌لبه‌ستێن ڤێ‌ ئه‌لبۆمێ‌ گه‌له‌ك ژ یا دی جوانتر و ب هێزترن و گۆت: “زێده‌باری به‌لاڤكرنا ئه‌لبۆمان ل سالا 2019 من چه‌ندین سترانێن سنگل ژی ب ناڤێن (ئازیزه‌كه‌ك، بنگۆڵ، ده‌سماڵامن، كراسێ‌ ته‌) به‌لاڤكرن”.