ئەڤرۆ نیوز:
سکرتێرێ گشتی یێ ناتۆ راگەهاند کو هێرشا موشەکی یا ئیرانێ ل سەر بنگەهێن ئەمریکا ل عیراقێ کریارەکا مەترسیدارە و ئەو یەک دێ بیتە ئەگەرێ هندێ کو رەوشا هەی ئالۆزتر ببیت و رۆژهەلاتا ناڤین بەر ب شەرەکێ دی یێ مەزن ڤە بچیت و گۆت: (ئەم وەکو ناتۆ هێرشا ئیرانێ ب توندی شەرمزار دکەین و داخواز ژ ئیرانێ و ئەمریکا دکەین کو بۆ ئارامیا رەوشا نها کار بکەن و رەوشێ ئالۆزتر نەکەن).
ئەڤرۆ نیوز:
سەرۆکێ هەرێما کوردستانێ نێچیرڤان بارزانی راگەهاند کو ئەو هەموو بزاڤەکێ دکەن دا ئالۆزیێن نها ل دەڤەرێ دوور ژ شەری بهێنە چارەسەرکرن و دیار کر کو هەموو بزاڤان دکەن دا هەرێما کوردستانێ یا پاراستی بیت.
سەرۆکێ هەرێما کوردستانێ ئەو یەک ژی دیار کر کو هەرێما کوردستانێ ژ بەر رەوشا نها یا ئالۆز گەلەک دلگرانە چونکو ئەو یەک کارتێکرنا خوە ل عیراقێ و هەرێما کوردستانێ کریە و گۆت: (مە داخواز ژ هەموو ئالیەکێ کریە کو بزاڤان بکەن دا کار بۆ ئارامیا دەڤەرێ بکەن).
نێچیرڤان بارزانی هەروەسا دیار کو ئەو ل دژی هندێ نە کو عیراق و هەرێما کوردستانێ ببنە مەیدانا ئاریشێن نها و ژ بۆ هندێ ژی ئەو وەکو هەرێما کوردستانێ ل گەل هەموو ئالیەکێ ل جیهانێ و دەڤەرێ د پەیوەندیێ دانە دا رەوش ئارام ببیت.
ئەڤرۆ نیوز، هۆشەنگ تاجر:
رەحمان محەمەدی چاڤدێرێ سیاسی ل رۆژهەلاتێ کوردستانێ بۆ ئەڤرۆ نیوز دیار کر کو نها بەرپرسێن ئیرانێ بابەتێ کوشتنا قاسم سلێمانی و شەرێ ل دژی ئەمریکا کرینە رۆژەڤ و ب نهێنی پیلانەکا خوە یا مەترسیدار ژی بجه دکەن.
ل دۆر پیلانا ئیرانێ ژی ناڤهاتی راگەهاند کو ئیرانێ بریار دایە پتر ژ حەفت هزار گرتیێن کو ژ بەر خوەنیشادانێن ڤێ دووماهیێ ل ئیرانێ هاتبوونە گرتن ل سێدارە بدەت، چونکو نها جیهان هەموو بەحسێ ئالۆزیێن د ناڤبەرا ئیرانێ و ئەمریکا دا دکەت و ئەو یەک ژی دەلیڤەکا باشە دا دەستهەلاتا نها یا ئیرانێ دژبەرێن خوە ژناڤ ببەت.
نەوریج، ئاراس سوبحی:
شه‌ڤا ٥/٦ هەیڤا ئێک ل باژێرێ بێرگین ل رۆژئاڤایێ نه‌رویج ئاگر به‌ردبیته خانیه‌کی د ئه‌نجام دا خانی ب ته‌مامی هاته سۆتن و دایک و ۳ زارۆکێن کورد گیانێ خوە ژ ده‌ستدان.
ل دۆر ئه‌گه‌رێن ئاگر به‌ربوونا ڤی مالێ فیراس موسته‌فا کو ناسیارێ ڤێ خێزانێ یه و خه‌لکێ عه‌فرینێ یه بۆ ئه‌ڤرۆ نیۆز دبێژیت بۆریەکا ئاڤا گه‌رم پەقیا بوو، پاشان ب ئه‌گه‌را شورتێ که‌هره‌بێ ئاگر به‌ربوویه مالێ، د ئه‌نجام دا دایک و ۳ زارۆکێن کورد کو خه‌لکێ باژێرێ عه‌فرینێ نه بوونه قوربانی و گیانێ خوە ده‌ستدان.
ناڤێت وان:
دایک، مه‌لک جان هۆرو ٤۳ سال
زارۆک ، نورجان عوسمان ۱٥ سال، رهلات عوسمان ۱۰ سال، نوجین عوسمان ۸ سال
ئه‌ڤ خێزانه به‌ری ٥ سالا ب ئه‌گه‌رێ شه‌رێ ناڤخوەیی ل سووریێ ئاواره دبین و نه‌رویجێ ئاکنجی نه ببوون.
ئەڤرۆ نیوز:
بەرپرسێن وەزارەتا ناڤخوە یا ئیرانێ راگەهاندن کو ژ بەر ئاریشەکا تەکینیکی فرۆکەکا ئوکراینی ل نێزیکی فرۆکەخانا تەهرانێ کەفتیە خوارێ و د ئەنجام دا پتر ژ ١٧٠ کەسان جانێ خوە ژ دەست داینە.
رێکخراوا مافێن مرۆڤی یا رۆژهەلاتێ کوردستانێ ژی راگەهاند کو ٥ وەلاتیێن کورد یێن خەلکێ باژێرێ مهابادێ یێ رۆژهەلاتێ کوردستانێ ژی د وێ فرۆکێ دا بووینە و جانێ خوە ژ دەست داینە.
ئه‌ڤرۆ نیوز:
پشتی كۆمبوونا سیێ سه‌رۆكاتیێن هه‌رێما كوردستانێ د راگه‌هاندنه‌كێ دا دلته‌نگیا خو ل سه‌ر ئه‌وان روودانێن ده‌ڤه‌رێ ده‌ربری و مه‌ترسیا تیرۆرێ به‌رفره‌هـ بوویه و گه‌فێن راسته‌قینه بۆ سه‌ر هه‌رێما كوردستانێ و عیراقێ و ده‌ڤه‌رێ هه‌یه.
سێ سه‌رۆكاتیێن هه‌رێما كوردستانێ ل سه‌ر پێشهاتێن سپێده‌هیا ئه‌ڤرۆ، ئاماژه ب وێ چه‌ندێ دایه كۆ رێكارێن سه‌ربازی ب چ شێوه‌یه‌كی ئاریشان چاره ناكه‌ت، هه‌ڤده‌م داخاز ژ هه‌موو لایه‌نان دكه‌ین هه‌رێما كوردستانێ ژ هه‌ڤركیان دوور بێخن.
د چارچوڤێ كۆمبوونێن خول یێن خودا، ئه‌ڤرۆ 8/1/2020 هه‌ر سێ سه‌رۆكاتیێن هه‌رێما كوردستانێ كۆمبوون.
د وێ كۆمبوونێ دا دوماهی پێشهاتێن هه‌رێما كوردستانێ و عیراقێ و ده‌ڤه‌رێ ئێخستنه به‌ر دانوستاندنان و هه‌لسه‌نگاندنێن هوور بۆ روودا و هه‌لویستێن حوكمه‌تا هه‌رێما كوردستانێ كرن، دڤی چارچوڤه‌یی دا هه‌ر سێ سه‌رۆكایه‌تیێن هه‌رێمێ، دلته‌نگیا خۆ بۆ گه‌شه‌كرنا روودانێن ده‌ڤه‌رێ ده‌ربری د ده‌مه‌كیدایه مه‌ترسیا تیرۆرێ به‌رفره‌هـ بوویه و گه‌فێن راسته‌قینه بۆ سه‌ر هه‌رێما كوردستانێ و عیراقێ و ده‌ڤه‌رێ هه‌نه.
ده‌ربارێ روودانێن چه‌ند رۆژێن بوری ب تایبه‌تی پێشهاتێن سپێده‌هیا ئه‌ڤرۆ، هه‌رێما كوردستانێ ته‌ئكید دكه‌ت كۆ رێكارێن سه‌ربازی ب چ ئاوایی ئاریشه‌یان چاره ناكه‌ت.
هه‌رێما كوردستانێ ل گه‌ل ئارامكرنا ره‌وشێ و دانوستاندنێ و چاره‌كرنا دیپلوماسیانه ئاریشه و سه‌قامگیری و ئارامیێ دایه، داخازێ ژ هه‌موو لایه‌كی دكه‌ین هه‌رێما كوردستانێ ژ هه‌ڤركیان دوور بێخن.
هه‌رێما كوردستانێ ب پشته‌ڤانیا هیزێن هه‌ڤپه‌یمانێن نێڤ دوله‌تی ل عیراقێ و هه‌رێماكوردستانێ بۆ به‌رده‌وامیا به‌رهنگاربوونا تیرۆرێ و ریب ری بوونا وان ب پێدڤی دزانیت، تایبه‌ت ل چه‌ند هه‌یڤێن بوری لڤینێن تیرۆری زۆر بووینه، له‌ورا داخازێ ژ جڤاكا نێڤ دوله‌تی ب چ شێوه‌یه‌كی رێكێ نه‌ده‌ت تیرۆر سه‌رهلبده‌ته‌ڤه.
ئه‌ڤرۆ نیوز، مه‌حمود نهێلی:
به‌رپرسێ هوبا چاندنا دێره‌لۆك دیار كر، كو به‌رهه‌مێ مریشكا خۆمالی ل سنورێ هوبا وانا 100% پێدڤیاتێن خه‌لكی دابین دكه‌ت و پێدڤی ب مریشكێن ده‌رڤه‌نابین هه‌كه سیسته‌مه‌ك هه‌بیت بۆ راگرتنا ئینانا مریشكا ده‌رڤه.
عسمه‌ت ئیبراهیم به‌رپرسێ هوپا چاندنێ ل دێره‌لۆك بۆ ئه‌ڤرۆ نیوز دیاركر، كو ل سنورێ هوبا وانا 13 هولێن خودانكرنا مریشكا هه‌نه و گۆت: هه‌ر پرۆژه‌یه‌كی شیانێن خودانكرنا 10 هزار بۆ 12 هزار مریشكان هه‌یه كو د هه‌یاما 45 رۆژان دا دهێنه به‌رهه‌می و فروتنێ.
ناڤهاتی دیاركر، كو ئه‌ڤ به‌هه‌رمێ مریشكێن نافخوه‌یی 100% دێ پێدڤیاتێن وه‌لاتیێن هه‌موو قه‌زایێ دابین كه‌ت و دشیاندایه بهێنه هنارتن بۆ ده‌رڤه‌ی ده‌ڤه‌رێ. و گۆت: گازندا خودانێن ڤان پرۆژه‌یان ئینانا مریشكێن ده‌رڤه‌یه و له‌ورا پێدڤیه سنوره‌ك بۆ ئینانا مریشكێن ده‌رڤه بهێته دانان و گرنگی ب به‌رهه‌مێ خۆمالی بهێته دان چونكه ئه‌ڤ به‌رهه‌مێ ده‌رڤه بارا پتری ب كێر خوارنێ ناهێت و دبیته ئه‌گه‌رێ نه‌خوه‌شیان و گه‌هاندنا زیانێن ساخله‌میێ.
ناڤهاتی دیار ژی كر، بۆ رێگری كرنێ ژ ڤێ یه‌كێ حوكمه‌ت دشێت ل سه‌ر هنده‌ك جهان ب سه‌پینیت كو بتنێ مریشكێن نافخوه‌یی بكار بینن وه‌ك ده‌زگه‌هێن میری و نه‌خوشخانا و هه‌روه‌سا جهێن سه‌ربازی بۆ وێ یه‌كێ خودانێن پرۆژه‌یان زیان نه‌گه‌هنێ.
ئەڤرۆ نیوز،بارزان مزووری:
سەنگەر گوران، رۆژنامەڤان و چالاکڤان ل قەزا بەردەرەش بۆ ئەڤرۆ نیوز گۆت: ئەڤرۆ دەمژمێر 1:40خۆلەک ب شەڤ رێکەفتی 8/1/2019 موشەکەکا وەلاتێ ئیرانێ ل سنورێ دناڤبەرا بەردەرەش و پارێزگەها مووسل لجهەکێ بێ زیان دکەڤیت، ناڤهاتی خویاکر تیمەکا هێزێن ئێمناهیێ سپێدێ سەرەدانا وی جهی كر و پاشماوێن موشەکا ئیرانێ کوم ڤەکرن بۆ ئەنجام دانا پشکنینێ ل سەر، ناڤهاتی گۆت وێ موشەکێ ج زیانێن گیانی لپشت خۆ نەهێلاینە بتنێ جهێ لێ کەفتی زیان ب وی عەردی گەهاندینە. لدوڤ زانیاریێن مالپەرێن ئیرانی کۆ ئەو مووشەک بناڤێ ” فاتیح ” 313 دووریا 500 کیلۆمەتر دبریت.
ئه‌ڤرۆ نیوز، ناجی به‌ده‌ل:
ئه‌ندامێ لژنا دارایی یا جڤاتا نوونه‌رێن عیراقێ دیاركر به‌نك و رێكخراوێن نێڤ دوله‌تی یێن دارایی و ئابووری ل بن كونترۆلا ئه‌مریكادانه هه‌رده‌ما بڤێت دشێت ره‌وشا هه‌ر وه‌لاته‌كی ژلایێ ئابووری ڤه لاواز بكه‌ت.
د. ئه‌حمه‌د سه‌فار ئه‌ندامێ لژنا دارایی یا جڤاتا نوونه‌رێن عیراقێ دیاركر ل سالا 2008 رێكه‌تنا چارچوڤه‌یێ ستراتیژی كو رێكه‌تنه‌كا ئه‌منی و دارای و ئابووری و ته‌كنولوژی بوو، عیراقێ ئیمزاكریه ل گه‌ل ئه‌مریكا لگۆری وێ رێكه‌تنێ عیراقێ چاره‌نڤیسێ خۆ ژلایێ ئابووری و دارایی و ئه‌منی ڤه راده‌ستی ئه‌مریكا كر، چونكو وی ده‌می دو ژمارێن به‌نكی ل به‌نكا فیدرالیا ئه‌مریكاڤه‌كرن، ژماره‌یا به‌نكی ل سه‌ر ناڤێ وه‌زاره‌تا دارایی یا عیراقێ بناڤێ سندۆقا پشته‌ڤانیا عیراقێ و پاراستنا وێ ژ لایێ ئه‌مریكاڤه، ژمارا دی یا به‌نكا مه‌ركه‌زیاعیراقێ یه، یا دیار و رونه داهاتێ عیراقێ پشت به‌ستن ل سه‌ر پترۆلێ كریه و هه‌موو ئه‌و پترۆلا عیراق دفرۆشیت پاره‌یێ وێ دچیته به‌نكا فیدرالیا ئه‌مریكا ل سه‌ر ئه‌ڤان ژمارێن به‌نكێ و به‌نكا ناڤه‌ندیا عیراقێ ڤه دگوهیزیت وه‌ك دۆلار و دكه‌ته دینار بۆ وه‌زاره‌تا دارایی بۆ دابینكرنا مووچه و پێدڤێن حوكمه‌تێ، پاراستنا وێ سندۆقێ د ستویێ ئه‌مریكا دایه.
ئه‌ندامێ لژنا دارایی یا جڤاتا نوونه‌رێن عیراقێ دیاركر ژی هه‌كه
پاراستنا ئه‌مریكا بهێته راكرن ل سه‌ر وان پاره‌یێن عیراقێ ل ئه‌مریكا، ئه‌ڤه ئه‌و ده‌و‌له‌تێن عیراق قه‌ردارا وان دێ ده‌ست ب سه‌ر دا گرن كو پتری 60 ده‌وله‌تانن، زێده‌تری 1250 ملیار دۆلاران عیراق قه‌ردارا وانه.
د. ئه‌حمه‌د سه‌فار ئه‌ندامێ لژنا دارایی یا جڤاتا نوونه‌رێن عیراقێ گۆت: ئه‌و بریارا جڤاتا نوونه‌رێن عیراقێ دایی، كو بریاره و نه‌شێت وه‌ك یاسایێ كار بكه‌ت و یاسا بهێزتره، ئه‌و بریار دێ چیت بۆ حوكمه‌تێ كۆ حوكمه‌تێ ئه‌و ریكه‌تن ئیمزاكریه و دڤێت ئه‌وێ رێكه‌تنێ هه‌لوه‌شینیت، لێ حوكمه‌تا نوكه یا كاربرێكه‌ره و ده‌سه‌لاتێن نه ئیمزاكرنا چ رێكه‌تنان یان هه‌لوه‌شاندنا وان نینه، دڤێرێ دا وێ بریارا جڤاتا نوونه‌ران چ رامان و بهایێ خو نینه، ئه‌و بریار بتنێ لایه‌نێ سه‌ربازی گرتیه و گرێدایی ئابوور و دارایی نینه.
د. ئه‌حمه‌د سه‌فار گۆت ژی هه‌كه ئه‌مریكا ڤیا سزاییێ دانیته سه‌ر عیراقێ ئه‌وی ده‌می دێ كاره‌ساته‌كا مه‌زن سه‌ر هه‌لده‌ت و ئابوورا عیراقێ بخو هه‌لوه‌شایه و دێ وێرانتر لێ هێت و بهایێ دراڤێ عیراقێ ژی داكه‌ڤیت.
ئه‌ندامێ لژنا دارایی یا جڤاتا نوونه‌رێن عیراقێ دازانین ئه‌مریكا مه‌زاختیێن زۆرقوربانیێن زۆرداینه ل عیراقێ هوسا ب ساناهی ده‌رناكه‌ڤیت و راده‌ستی لایه‌نه‌كێ دی بكه‌ت، یان سزایا بێخته سه‌ر عیراقێ هه‌ر ده‌ما ئه‌مریكا پێنگاڤه‌كا هوسا هاڤێت دێ ده‌لیڤه بۆ هنده‌ك وه‌لاتێن دی خوش بیت مایتێكرنێ و جهێ خۆ ل عیراقێ بكه‌ن، ئه‌ڤ چه‌نده پتر كۆ گۆتن و به‌حسكرنا سزایان پتر ترساندن و فشاره‌كه و نه‌زێده‌تر.
د.ئه‌حمه‌د سه‌فاری ل سه‌ر به‌نكا ناڤه‌ندی دیاركر به‌نكا ناڤه‌ندیا عیراقێ رۆژانه 250 ملیۆن دۆلاران دئیخته بازاری بۆ هه‌ڤسه‌نگكرنا بهایێ دۆلاری هه‌مبه‌ر دینارێ عیراقی كۆنترۆلا ره‌وشا دارایی پێ دكه‌ت، هه‌رده‌ما به‌نكا ناڤه‌ندی ئه‌و پاره نه ئێخسته د بازاری دا دێ دۆلار كێم بیت و بهایێ وێ بلند بیت و بهایێ دینارێ داكه‌فیت.
ئه‌ڤرۆ نیوز:
مورگان ئورتاكوس په‌یڤدارا وه‌زاره‌تا ده‌رڤه‌یا ئه‌مریكا راگه‌هاند: مایك پومپیو وه‌زیرێ ده‌رڤه‌یێ ئه‌مریكا و مه‌سرور بارزانی سه‌رۆكێ حوكمه‌تا هه‌ریما كوردستانێ ل سه‌ر هێرشێن ئیرانێ بۆ سه‌ر هێزێن ئه‌مریكا و هه‌ڤپه‌یمانان ل هه‌رێما كوردستانێ و عیراقێ په‌یوه‌ندیه‌كا ته‌له‌فونی ئه‌نجام داینه.
دوێ راگه‌هاندنێ دا ئه‌و چه‌نده هاتیه دیاركر پومپیو و مه‌سرور بارزانی به‌حسێ دوماهی پێشهاتێن ده‌ڤه‌ری و ئه‌و هێرشیێن هاتینه كرن بۆ سه‌ر بنگه‌هێن سه‌ربازی یێن ئه‌مریكان ل عیراقێ رێكه‌تن ل په‌یوه‌ندیێ دا بن ل سه‌ر ئه‌ڤێ ره‌وشێ.
نيشاندان