ئەڤرۆ نیۆز، هەرهین محەمەد:

دەرهێنەرێ‌ گەنجێ‌ باژێرێ‌ زاخو (سەهیم عومەر)  ب فلمەكێ‌ دكیومێنتاری ب ناڤێ‌ cornered in molenbeek پشكداری فلمە فیستە ڤالا دهۆك یا نیڤدەولەتی بوویە، ناڤبرى بۆ ئەڤرۆنیۆز دیاركر كو ئەڤ فلمە پشكداری گەلەك فلمە فیستەڤالان بوویە و سێ‌ خەلات ب دەست خوە ڤە ئیناینە.

گۆت ژى”  ئەز ل وێ‌ باوەرێ‌ نینم ئەڤ فلمە ل فیستەڤالا دهۆك یا نیڤدەولەتی خەلاتی ب بەت، چونكو گەلەك فلمێن مەزن پشكدارن د ڤێ‌ فیستەڤالێ‌ دا،  ژڤانە فلمێ‌ (cornered in molenbeek) سوباهی ل دەمژمێر حەفتی ئێڤاری ل سینەما (دهۆك مول) بهێتە نمایشكرن و رۆژا ئەینی ژی ل دەمژمێر سیی ئێڤاری ل هەمان جهى دێ‌ هێتە نمایشكرن”.

 ئه‌ڤرۆ نیوز، نه‌وزاد هلۆرى:

پشتى پێنج رۆژان ژ رێگرتنا حه‌شدا شه‌عبى بو ئینانا په‌یكه‌رێ هونه‌رمه‌ندێ وه‌غه‌ركرى ته‌حسین تاهاى، ئه‌ڤرۆ چارشه‌مبى 11/9/2019 په‌یكه‌ر بۆ ناڤه‌ندا باژێرێ دهۆكێ هاته‌ ڤه‌گوهاستن.

ئه‌ڤ په‌یكه‌ره‌ ژلایێ په‌یكه‌رسازه‌كێ ل باشێكێ هاتیه‌ چێكرن، ل ده‌مێ ئینانا وى، زالگه‌هه‌كا حه‌شدا شه‌عبى په‌یكه‌ر ب په‌یكه‌رساز ڤه‌ ده‌سته‌سه‌ركر، پشتى چه‌ندین بزاڤان، ئه‌ڤرۆ رێ ب ئینانا په‌یكه‌رى بۆ دهۆكێ هاته‌دان و ل پاركا زه‌رى لاند هاته‌دانان، بریاره‌ ل چه‌ند رۆژێن بهێت د رێورسمه‌كى دا په‌رده‌ ل سه‌ر وى په‌یكه‌رى بهێته‌ لادان.

ئه‌ڤین حسێن، به‌رپرسا لقێ دهۆك یێ سه‌ندیكا هونه‌رمه‌ندێن كوردستانێ گۆت: (ب بهانه‌یا وێ یه‌كێ كو په‌یكه‌ر، په‌یكه‌ره‌كێ شوونوارى یه‌، ده‌مێ پێنج رۆژایە ژ لایێ حه‌شدا شه‌عبى  ده‌ست ب سه‌ردا هاتبوو گرتن، به‌لێ  پشتى ئه‌م ل گه‌ل هێزێن ئه‌منى و سەندیکا هونه‌رمەندان ل مووسل ئاخفتین و بۆ وان دایه‌ دیاركرن كو په‌یكه‌ر نه‌یێ شوونوارى یه‌، به‌لكو یێ هونه‌رمه‌نده‌كێ وه‌غه‌ركرى یێ به‌رنیاس یێ پارێزگه‌ها دهۆكێ، ل دووماهیێ رێ ب په‌یكه‌رى هاته‌ دان و نوكه‌ گه‌هشتیه‌ دهۆكێ و دێ د رێورسمه‌كێ دا په‌رده‌ ل سه‌ر هێته‌ راكرن).

ته‌حسین ته‌ها ئێكه‌ ژ هونه‌رمه‌ندێن ناسیار ل كوردستانێ و خه‌لكێ ده‌ڤه‌را ئامێدیێ یه‌، روله‌كێ به‌رچاڤ د هونه‌رێ كوردى دا هه‌یه‌ و ب قوتابخانا هونه‌رى ل ده‌ڤه‌را به‌هدینان دهێته‌دانان. فره‌هیا په‌یكه‌رێ هونه‌رمه‌ند ته‌حسین ته‌هاى سێ مه‌ترن و شه‌ش متران ژى یێ بلنده‌.

ئەڤرۆ نیوز ، زنار تۆڤی:

سوباهى پێنجشەمبی 12/9/2019 دێ فلمێ پێشوازیا مرنێ ل حەفتەمین فلمە فیستەڤالا دهۆک یا نێڤدەولەتی هێتە نشاندان.

 نه‌سرین عابدین، ده‌رهێنه‌را فلمێ پێشوازیا مرنێ بۆ ئەڤرۆ نیوز دیار کر”ئەڤ سالە حه‌فتەمین فلمه‌ ڤیسته‌ڤالا دهوك یا نێڤدەولەتی‌ گه‌له‌ك باشه‌ و ب جوانى یا ب رێڤه‌ دچیت، ئه‌ڤ سالە فیستەڤال ژ هه‌موو گه‌رێن دى باشتره‌ و گه‌له‌ك تشتێ جوان هاتینە نیشاندان، فلمێ من ل پشكا پانورامادا یه‌ كو سوباهى دێ هێته‌ نیشاندان”.

گۆت ژى” ئەڤ فلمه ل 2014 ێ هه‌تا 2017 ل قوناغا وێنه‌گرتنێ دا بوو، ئه‌ڤساله‌ ب دوماهی هاتیه‌ و بۆ جارا ئێكێ دێ ل فلمە ڤیسته‌ڤالا دهۆکێ هێته‌ نیشاندان”.

دیاركر” فلمێ من ل سه‌ر قاره‌مانیا پێشمه‌رگێ کوردستانێ یە‌ و ئەڤ فلمە دێ هه‌ڤركیێ ل سه‌ر خه‌لاتێن ڤیسته‌ڤالێ كه‌ت”.

دهێته‌ زانین حەفتەمین فلمه‌ ڤیسته‌ڤالا دهۆكێ ل 9/9/2019 هاته‌ ڤه‌كرن و هه‌تا 16/9/2019 دێ یا به‌رده‌وام بیت.

 ئەڤرۆ نیوز ، زنار تۆڤی:

ئەڤرۆ چارشەمبی د حەفتەمین گەرا فلمە فیستەڤالا دهۆکێ دا  ب بەرهەڤبوونا رەخنەگرێن سینەمایی یێن کورد و بیانی پانێلێ تابلۆیەک ل دۆر رەخنەگرێن فلمان د سینەما کوردی دا ل هۆلا کۆنفرانسان هاتە گێران.بەرهەڤکەرێن وێ پانێلێ تیشک خستنە سەر چەندین تەوەران و ئەو هوکار بەحس کرن، یێن کو دبنە ئەگەرێ پێشخستنا سینەما کوردی.

ئەمی غۆلامی، مامۆستایێ زانکۆیێ و رەخنەگرێ کورد ژ رۆژهەلاتێ کوردستانێ بۆ ئەڤرۆ نیوز گۆت” دڤێت گرنگیەکا تایبەت ب رەخنا سینەمایی بهێتە دان و دڤێت هەیڤانە ئەڤ جۆرە پانێلە بهێنە پێشکێش کرن، ژ پێخەمەت ئاستێ سینەما کوردی بەرەف پێشڤە بچیت، چونکی هەموو کار و بابەت ب رەخنا ئاڤاکەر پێش دکەڤن و گوهۆرینێن باش و بنەرەت تێدا پەیدا دبن”.