ئەڤرۆ نیوز:
دەزگەهێن راگەهاندنا ئەمریکا دیار دکەن کو ترامپ یێ رژدە ل گەل ئیرانێ دەست ب قۆناغەکا نوو یا دانوستاندنان بکەت، لێ وەزیرێ دەرڤە یێ ئەمریکا مایک پۆمپیۆ سەرەدانا سعوودیێ و ئیماراتێ دکەت و ئارمانجا وی ژی ئەوە دا بەرەیەکێ ل دژی ئیرانێ ئاڤا بکەت.
چاڤدێرێن سیاسی ژی دیار دکەن کو هەلویستێ ترامپی و پۆمپیۆی ل هەمبەر ئیرانێ ژیک جودانە و ژ بەر هندێ ژی هەتا نها ئەمریکا ب کریاری نەشیایە ل دژی ئیرانێ تشتەکێ بکەت.
ئەڤرۆ نیوز:
ئەڤرۆ رۆژا دوشەمبی ٢٤-٦-٢٠١٩ لژنا رێکخستنا رێورەسمێن راگەھاندنا ئەنجامێن ئەزموونێن گشتی یا سەر ب وەزارەتا پەروەردەیا حوکمەتا ھەرێما کوردستانێ، روونکرەکێ ل سەر وێ کچا بالا پوش بەلاڤ دکەت.
د ڤێ روونکرنێ دا ھاتیە جھێ داخێ یە ھندەک کەسان ل تورێن جڤاکی پێخەمەت ھندەک مەرەمێن دیارکری چەندین شروڤە و گۆتنێن نە دروست ل سەر دیمەنێن وان رێورەسمان به‌لاڤ كرينه کو ئەو کچا قوتابیا بالاپوش ب ئەنقەست بریە رێزێن پشتێ.
لەورا یا فەرە ب راگەھینن کو ئەو کچا بریە رێزێن پشتێ چ پەیوەندی ب بابەتێ جلوبەرگێن وێ ڤە نەبوو بەلکو د رێکخستنا قوتابیێ، رێزێن ئێکێ و دویێ و سیێ ڤە ھەبوو ئەو ئەو کچا بالاپوش ل رێزا دویێ ھاتیە و رێزا پێشیێ تنێ بۆ قوتابیێن رێزا ئێکێ ھاتین ھاتبوو تەرخانکرن لەورا داخواز ژ وێ ھاتیە کرن بەر ب جھێ خوە یێ دروست براوستیت، دیسان ئەگەر ھەر بوچوونەکا دی ل پشت ڤێ چەندێ بایە رێ ب وێ نە دھاتە دان ل وی ھولێ ھەمیێ ئامادە بیت، لەورا وەزارەتا پەروەردێ وەک مافێ خوە یێ قانوونی دێ ھەموو رێکارێن قانوونی دەرھەقێ وان کەسان وەرگریت یێ ناڤزراندنا وان بکەت.
ئەڤرۆ نیوز:
سیرگێی شویگو وەزیرێ بەرەڤانیێ یێ روسیا راگەهاند کو سەرۆکێ روسیا ڤیلادەمیر پوتین فەرمان دایە لەشکرێ مە کو خوە بۆ شەری بەرهەڤ بکەن، نها هەموو هێزێن مە یێن ئەسمانی، ئەردی و دەریایی خوە بۆ هەر شەرەکێ ل دەڤەرێ بەرهەڤ کرینە.
ئەو یەک د دەمەکێ دایە کو چەند رۆژن روسیا پشتەڤانیێ ل ئیرانێ دکەت و دبێژیت ئەو ئامادەیە ژ بۆ شکاندنا سزایێن ئەمریکا ل سەر ئیرانێ سەپاندی هاریکاریا وی وەلاتی بکەت.
ئەڤرۆ نیوز:
پارتیا دیموکراتی یا گەلان (هەدەپە) راگەهاند کو پشتی سەرکەفتنا ئەکرەم ئیمام ئوگلۆی رەوشەکا نوو ل تورکیا و ئستەنبولێ هاتیە پێش و ژ بۆ چارەکرنا پرسا کوردی و پرسێن دی یێن تورکیا دڤێت ئاکپارتی خوە بۆ قۆناغەکا نوو ئامادە بکەت.
گونای کوبیلای پەیڤدارێ هەدەپێ راگەهاند کو دڤێت ئاکپارتی بەرنامێ خوە یێ چارەسەریێ پێشکێش بکەت، چونکو ب شەری چو پرس ناهێنە چارەکرن و ژ بەر هندێ ژی ئەم داخوازا دەستپێکرنا قۆناغەکا نوو دکەین.
ئەڤرۆ نیوز ، عەلی حاجی :
د داخویانیەکێ دا رێڤەبەرێ ناحیا دەرکارێ بۆ ئەڤرۆ نیوز ئاشکەرا کر دماوەیێ دو روژان دا ٦ ساروخێن فروکێن سوپایێ تورکیا ل چیایێ خامتیری کەڤتینە و زێدەباری وێ چەندێ ژی روژانە دهێتە توپباران کرن.
زێرەڤان موسای زێدەتر گوت : دوهی روژا ئیک شەمبێ و ئەڤرۆ ل روژا دوو شەمبێ فروکێن سوپایێ تورکیا شەش جاران ب ساروخان چیایێ خامتیر توپباران کرینە ؍ پێنچ ژ وان ل گوپیتکا چیایێ ناڤبری داینە ئێک ژی ل ئاقارێ گوندێ شەرانشێ ؍ زێدەباری هندێ ژی ل چار روژان دووف ئێک دا توپخانەێن سوپایێ تورکیا ئەو دەڤەر توپباران کرینە؍ ئەو توپباران کرنە ژی هەمی ل دانێ سپێدێ بوینە ؍ ئەڤە ماوەیەکە سوپایێ تورکیا بوردومانا چیایێ خامتیری دکەت و هەتا نوکە ئەم ئەگەرێ وێ چەندێ ژی نوزانین کا ئەگەر چنە سوپایێ تورکیا توپباران کرن بو وی چیایی زێدەکرینە .
ل دوماهیێ گوت ژی : چیایێ خامتیری ۵ هەتا ۷ کێلومەتران ژ سەنتەرێ ناحیا دەرکارێ یێ دوورە ؍ پێتڤی یە ئەڤ شەرە ژدەڤەرێن مه دوور بکەڤیت و مە پێ خوەش نینە روژانە دەڤەرێن مە دهێنە توپباران کرن ؍ژبەری ماوەیەکێ جوتیارەکێ دڤیا گەرەنتیێ بدەینێ دا کو بچیت ۸۰۰ دارێن خوەیێن گیلاسا بەرهەمێ وان ژێڤەکەت ؍ من نەشیا گەرەنتیێ بدەمێ وی جوتیاری .
https://m.youtube.com/watch?v=9oGItiHzDz8&feature=share
ئه‌ڤرۆ نيوز:
ب تۆمه‌تا گه‌نده‌ليێ حوكمێ 18 سالان زيندانى بۆ سه‌رۆكێ به‌رێترێ يێ زانكۆيا نه‌ورۆز ده‌رچوويه، به‌لێ هه‌تا نها نه‌هاتيه ده‌سته‌سه‌ركرن.
مالپه‌رێ رووداو ل سه‌ر زارێ په‌يامنێرێ خوه ل دهۆكێ به‌لاڤكريه: ب گۆره‌ى ئه‌و پێزانينێن ب ده‌ست رووداو كه‌فتين، سێ تاوان خستينه پال د. ئازاد سه‌عدون، سه‌رۆكێ به‌رێترێ يێ زانكۆيا نه‌ورۆز، پشكه‌ك ژ وان تۆمه‌تا په‌يوه‌ندى ب بابه‌تێ گه‌نده‌ليێ ڤه هه‌يه و ل سه‌ر وان سێ تۆمه‌تا بێ ئاماده‌بوونا وى هاتيه دادگه‌هكرن و حوكمێ 18 سالان زيندانى بۆ ده‌ركه‌فتيه.
ل دووڤ گۆتنا دادوه‌ر عه‌بدولره‌حمان، سه‌رۆكێ دادگه‌ها تاوانێن 2 ل دادگه‌ها دهۆكێ، ل سه‌ر هه‌رسێ تۆمه‌تان سێ جاران هاتيه دادگه‌هكرن و بۆ هه‌ر ئێك ژ وان تاوانان حوكمێ شه‌ش سال زيندانى بۆ ده‌ركه‌فتيه.
په‌يامنێرێ رووداو دبێژيت: “سه‌ره‌راى بڕيارا ده‌سته‌سه‌ركرنێ ژ لايێ دادگه‌هێ ڤه، به‌لێ هه‌تا نها نه‌هاتيه ده‌سته‌سه‌ركرن، ژ ئه‌گه‌رێ ديار نه‌مانا وى، ب گۆره‌ى پێزانينێن رووداو نها ئه‌و ژ ده‌رڤه‌يى وه‌لاتى يه. د هه‌ر حاله‌ته‌كى دا هه‌كه ب ڤه‌گه‌ريته هه‌رێما كوردستانێ ب گۆره‌ى قانوونێ دێ مافێ وێ چه‌ندێ هه‌بيت ل دادگه‌هێ به‌ره‌ڤانيێ ژ خوه بكه‌ت”.
ئه‌ڤرۆ نيوز:
سه‌رۆكێ فراكسيۆنا پارتى ديموكراتى كوردستان ل په‌رله‌مانێ كوردستانێ راگه‌هاند كو بنكێ جه‌ماوه‌رى يێ حزبا وى پێ خۆش نينه كۆمه‌لا ئيسلامى پشكداريێ د كابينا نوو يا حوكمه‌تا هه‌رێما كوردستانێ دا بكه‌ت.
ئۆمێد خۆشناو، سه‌رۆكێ فراكسيۆنا پارتى ديموكراتى كوردستان ل په‌رله‌مانێ كوردستانێ و ئه‌ندامێ شاندێ بلندێ پێكئينانا كابينا نوو، بۆ مالپه‌رێ فه‌رمى يێ پارتى ديموكراتى كوردستان راگه‌هاند كو دانوستاندن ل گه‌ل وان لايه‌نێن بڕيار داى پشكداريێ د كابينا نوو دا بكه‌ن، نها مه‌سرور بارزانى يێ راسپارتى بۆ پێكئينانا كابينا نوو “چاڤه‌رێ ناڤێن به‌ربژارێن لايه‌نان دكه‌ت”.
ئۆمێد خۆشناو راگه‌هاند ژى هه‌ر لايه‌نه‌كێ ناڤێ به‌ربژاران ل ده‌مێ دياركرى يێ خوه دا ناڤان پێش كێش نه‌كه‌ت، “پرۆسا پێكئينانا حوكمه‌تێ ژ به‌ر وان ناهێته پاشخستن و د ده‌مێ خوه دا دێ ب رێڤه چيت”.
سه‌رۆكێ فراكسيۆنا پارتى ديموكراتى كوردستان ل په‌رله‌مانێ كوردستانێ ئاماژه ب وێ چه‌ندێ ژى كر كو به‌رى ده‌ستپێكرنا بهێنڤه‌دانا هاڤينێ يا په‌رله‌مانى (1ى تيرمه‌هێ هه‌تا 1ى ئيلۆنێ) په‌رله‌مانێ دێ كۆم بيت و باوه‌ريێ ب كابينا نوو يا حوكمه‌تا هه‌رێما كوردستانێ ده‌ت، “چو رێگريه‌ك ل هه‌مبه‌ر پێكئينانا حوكمه‌تا هه‌رێما كوردستانێ دا نينه”.
ده‌رباه‌رى بۆچوونا پارتى ل سه‌ر پشكداريكرنا كۆمه‌لێ د كابينا نوو يا حوكمه‌تێ دا، ئومێد خۆشناو گۆت: “من چو بابه‌تێن ژ وى ره‌نگى ژ سه‌ركرداتيا سياسى نه‌زانينه كو پێ خۆش بيت يان نا كۆمه‌ل پشكدارى كابينا نوو بكه‌ت، به‌لێ بنكێ جه‌ماوه‌رى يێ پارتى و ئه‌ندام و ده‌نگده‌رێن وێ پێ خۆش نينه كۆمه‌ل پشكدارى د كابينا نوو يا حوكمه‌تا هه‌رێمێ دا بكه‌ت”.
ئه‌ڤرۆ نيوز:
ئه‌ڤرۆ جڤاتا نوونه‌رێن عيراقێ دێ ده‌نگى ل سه‌ر ته‌مامكرنا پێكهاتێ حوكمه‌تێ ده‌ت.
ب گۆره‌ى به‌رنامێ كارێ كۆمبوونێ كو ده‌سته‌يا سه‌رۆكاتيا جڤاتا نوونه‌ران به‌لاڤكريه، بڕياره ئه‌ڤرۆ په‌رله‌مان كۆم ببيت و برگا ئێكێ ژى ده‌نگدانه ل سه‌ر ئه‌و ناڤێن بۆ وه‌زاره‌تا ناڤخۆ و به‌ره‌ڤانيێ هاتينه پێشكێشكرن ب مه‌ره‌ما ته‌مامكرنا پێكهاتا كابينا عادل عه‌بدولمه‌هدى.
هه‌روه‌سا بڕياره د كۆمبوونێ دا، ده‌نگ ل سه‌ر راستڤه‌كرنا قانوونا ده‌ست ب سه‌رداگرتن و به‌ردانێ دا بده‌ت، هه‌رديسا خواندنا ئێكێ بۆ پرۆژێ قانوونا ئازاديا بيروبۆچوونان و پرۆژێ قانوونا ئۆلۆمپيا نشتيمانى بهێته كرن. ژبلى وێ چه‌ندێ ژى دێ دانوستاندنێ ل سه‌ر پرۆژێ قانوونا دادگه‌ها فيدرال ته‌مام كه‌ن.
ئه‌ڤه دده‌مه‌كى دايه كو هێشتا وه‌زاره‌تێن ناڤخۆ و به‌ره‌ڤانى و داد و په‌روه‌رده ل به‌غدا دبێ وه‌زيرن، چه‌ند جاران ژى په‌رله‌مان بۆ ئێكلاكرنا ناڤێن به‌ربژاران بزاڤێن كۆمبوونێ داينه، به‌لێ ژ ئه‌گه‌رێ هه‌ڤركيێن لايه‌نێن سياسى شكه‌ستن ئينايه.
ئه‌ڤرۆ نيوز:
ئه‌ڤرۆ ئێكشه‌مبى 23/6/2019 یاداشته‌ك د ناڤبه‌را ئێكه‌تیا ژوورێن بازرگانی و ئابووریی یا هه‌رێما كوردستانێ و ئه‌مریكا دا هاته ئیمزا كرن و نێچیرڤان بارزانی سه‌رۆكێ هه‌رێما كوردستانێ د په‌یڤه‌كێ دا ل رێوره‌سمان ئيمزاكرنێ راگه‌هاند، هیڤیدارم ئه‌ڤ یاداشته د خێرا كوردستان و ئه‌مریكا و عیراقێ دا بیت و هوون دشێن ل ڤیرێ هه‌رێما كوردستانێ وه‌ك ده‌رگه‌هه‌كی بۆ بازارێ مه‌زنێ عیراقێ بكاربینن.
نێچیرڤان بارزانی دیار كر هاتنا هه‌وه د ڤێ قوناغێ دا نه ب تنێ بۆ هه‌رێما كوردستانێ، به‌لكو بۆ عیراقێ ژی یا گرنگه، نیشانا دوستایه‌تی و پشته‌ڤانیا هه‌وه‌یه، مه په‌یوه‌ندیێن دوور و درێژ يێن ل گه‌ل ئه‌مریكا هه‌ین و گۆت:( پشته‌ڤانیا ئه‌مریكا بۆمه د شه‌رێ تیرۆرێ دا هاریكاریا سه‌ره‌كی یا سه‌رۆكه‌فتنێ بوو و رۆله‌كێ مه‌زن د پاراستنا كوردستان و عیراقێ دا هه‌بوو و مه پێكڤه به‌رگری ژ ئازادی و دیمۆكراسیێ كرن و ئه‌م پێكڤه دژی دوژمنێ ژیان و شارستانیێ و مرۆڤاتیێ راوه‌ستیاین).
سه‌رۆكێ هه‌رێما كوردستانێ ئاماژه دا، نوكه قوناغا پشتی داعشێ یه و قوناغا خزمه‌تكاری و ئاڤه‌دانكرنێ یه و چاڤه‌رێینه كه‌رتێ تایبه‌ت و وه‌به‌رئینانا ئه‌مریكا رۆله‌كێ مه‌زن ل ڤێرێ بگێرن و گۆت:(پشته‌ڤانیا پيشه‌سازى و بازرگانی و وه‌به‌رئینانا ئه‌مریكا دێ بیته فاكته‌رێ سه‌قامگیری و رێزگرتنێ ل قوربانیێن مه هه‌موویان ل عیراقێ).
نيشاندان