ئەڤرۆ نیوز:
دەزگەهێن راگەهاندنا ئورۆپا دیار دکەن کو پشتی هێرشا ڤێ دووماهیێ یا ئیرانێ ل سەر گەمیێن پەترۆلێ ل دەریا عومان ئەمریکا دەست ب بزاڤەکا نوو ل دژی ئیرانێ کریە، ئەمریکا بزاڤا هندێ دکەت کو بەرەیەکێ بهێز ل دژی ئیرانێ دروست بکەت، چونکو ئەمریکا نەڤێت ب تنێ شەرێ ئیرانێ بکەت.
ل ئالیێ دی فەرماندارەکێ پاسدارێن ئیرانێ ژی راگەهاند کو ئەمریکا هەتا نها ژی پشتراست نینە کا دێ د شەری دا سەرکەفتی بیت یان نە؟ ژ بەر هندێ ژی بریارا شەری ل دژی ئیرانێ نەدایە.
ئەڤرۆ نیوز:
سەزایی تەمەلی هەڤسەرۆکێ گشتی یێ پارتیا دیموکراتی یا گەلان (هەدەپە) راگەهاند کو هەلبژارتنا نێچیرڤان بارزانی وەکو سەرۆکێ نوو یێ هەرێما کوردستانێ پێنگاڤەکا دیرۆکی یە و ئەم وەکو هەدەپە پیرۆزباهیێ ل جەنابێ نێچیرڤان بارزانی دکەین و هێڤیدارین د ئەرکێ خوە یێ نوو دا سەرکەفتی بیت.
ناڤهاتی ئەو یەک ژی دیار کر کو ئەم باوەر دکەین نێچیرڤان بارزانی دێ رۆلەکێ باش بۆ ئاشتیێ ل تورکیا ژی بگێریت چونکو بەری نها ژی بزاڤێن وی بۆ هندێ هەبووینە و کەسەکێ خوەدان ئەزموونە و ئەم هێڤیا سەرکەفتنێ بۆ جەنابێ نێچیرڤان بارزانی سەرۆکێ هەرێما کوردستانێ دخوازین.
ئه‌ڤرۆ نیوز، نه‌وزاد هلۆرى:
ل ده‌ستپێكا هه‌یڤا ره‌مه‌زانا پیروز ب مه‌ره‌ما عومرێ هژمارەکا زۆر ل عومرەکارێن کوردستان و پارێزگەها دهۆک قه‌ستا وه‌لاتێ سعودیێ كریه، بریار بو چه‌ند روژان به‌رى جه‌ژنێ بزڤرن مال، به‌لێ هێشتا نه‌زڤرینه مال، كه‌سوكارێن وان دده‌ن دیاركرن كو ئه‌گه‌را سه‌ره‌كى دزڤریت بو نه‌بوونا فروكان.
كه‌مال رێكانى، دایكا وى ب مه‌ره‌ما عومرێ نوكه ل سعودیێ یه بۆ ئه‌ڤرۆ نیوز گۆت: (دایكا من ل گه‌ل هژماره‌كا زور ژ خه‌لكێ دێرالوك و شێلادزێ كو پترى 20 كه‌سانن ب مه‌ره‌ما عومرێ ل گه‌ل ئێك ژ كومپانیێن حه‌ج و عومرێ چووینه سعودیێ، به‌لێ هێشتا نه‌زڤرینه مال).
زێده‌تر گۆت: (ده‌وروبه‌رێن 13ێ ره‌مه‌زانێ ئه‌و چووینه عومرێ، دڤیا پشتى 15 روژان هاتبانه مال، به‌لێ ئه‌ڤه پترى 20 رۆژ بورین و هێشتا نه‌زڤرینه مال، ئه‌م دخوازین كو كه‌سوكارێن مه ب سلامه‌تى بزڤرن، هه‌ر چه‌نده ده‌نگو هه‌یه ئه‌ڤرۆ بزڤرن مال، به‌لێ هه‌تا نوكه هێشتا چ دیار نینه).
عه‌بدولجه‌بار ته‌مه‌ر، ئه‌و ژى وه‌لاتیه‌كێ دێرالوكێ یه دیاركر كو كوره‌ك و چه‌ند هه‌ڤاله‌كێن وى ژى ب مه‌ره‌ما عومرێ چووینه سعودیێ و هێشتا نه‌زڤرینه مال و زێده‌تر گۆت: (ب گوره‌ى ئاخفتنێن وان كه‌سێن كو چووینه عومرێ، ئه‌گه‌را سه‌ره‌كى یا نه‌زڤرینا وان دزڤریت بو نه‌بوونا فروكه‌یان، له‌ورا دخوازین كو كێشا وان بهێته چاره‌سه‌ركرن و ب زووترین ده‌م بزڤرنە مال).
ژ لایێ خوە ڤە مەلا سەمیان، رێڤەبەرێ حەج و عومرێ ل دهۆکێ بو ئەڤرۆ نیوز گۆت: (ئاریشا گیرۆ بوونا عومرەکارێن دهۆکێ دزڤریت بو عیراقێ کو پێش و پاش کەفتیە دژڤانێ زڤرینێ دا، بریارە گەشتەک ئەڤرۆ و ئێک ژی سوبەهی ب رێیا فروکخانا هەولێرێ بزڤرنە مال).
ئەڤرۆ نیوز:
وەزارەتا بەرەڤانیێ یا ئەمریکا راگەهاند کو ئارمانجا سەرەکی یا روسیا ژ فرۆشتنا سیستەمێ مۆشەکی بۆ تورکیا ئالۆزکرنا پەیوەندیێن مە ل گەل وی وەلاتی یە و ئەم ب چو رەنگەکێ رێ نادەین روسیا ئاریشێن نوو د ناڤبەرا مە و تورکیا دا دروست بکەت.
ل ئالیێ دی وەزارەتا دەرڤە یا ئەمریکا ژی راگەهاند کو دڤێت تورکیا خوە ژ کڕینا مۆشەکێن روسی دوور بکەت، چونکو تورکیا ئەنداما ناتۆ یە و نابیت کارەکێ بکەت کو ببیتە ئەگەرێ دەرکرنا وێ ژ ناتۆیێ.
ئەڤرۆ نیوز:
بەرەڤانێ ھەلبژارتیێ ھولەندا و یانا ئەیاکس ئەمستردام ماتیس دی لگیت پشتی ل وەرزێ ئەڤ سالە شیای ئاستەکێ بلند ل گەل یانا خوە قارەمانیا چامپیونیز لیگ و خۆلا ھولەندا دا پێشکێش بکەت ببو جھێ گرنگیا ھژمارەکا مەزن یا یانێن بەرنیاس ل سەر ئاستێ ئورۆپا .
مالپەرێ توتو مێرکاتو یێ ئیتالی بەلاڤەکریە یانا پاریس سانجێرمان نێزیکترە ژ ھەر یانەکا دی بۆ ئیمزاکرنا ھەڤبەستا دی لگیت پشتی شیای د ھەڤرکیا دەستڤە ئینانا ئەوی یاریزانی دا ب سەرکەفیت ل سەر مەزنێن ئورۆپا ئەوژی یانێن یوڤانتوس یا ئیتالی و لیڤەرپول و مانچێستەر یوناید ئینگلیزی و بەرشەلۆنا ئیسپانی و بایرن میونیخ ئەلمانی کو ئەوان یانان ھەموویان ب فەرمی ھەڤبەست پێشکێشی ئەوی یاریزانی کربوو لێ پاریس شیا ل دووماھیێ د ھەڤرکیا ئەوی یاریزانی دا ب سەرکەڤیت پشتی وی یانا فرەنسی کوژمێ ھەلوەشاندنا ئەوی یاریزانی پێشکێشی یانا ئەیاکس ئەمستردام کری و ھەردیسان ل گەل موچەیەکێ سالانە ١٥ ملیون یورۆ.
ئەوێ رۆژنامێ ئاشکراکریە ژی مینو رایولا رێڤەبەرێ کاروبارێن وی یاریزانی پەیوەندی ب رێڤەبەرێ وەرزشی یێ یانا پاریس سانجێرمان کریە بوو دەمێ ئیمزاکرنا ھەڤبەستا ئەوی یاریزانی .
ئەڤرۆ نیوز:
سەرۆکێ فراکسیونا بەرەیا ترکومانی ل پەرلەمانێ کوردستانێ دیارکر دانا وەزارەتەکێ بۆ پێکھاتەیێ ترکومان و مەسیحیان د کابینەیا نوو یا حوکمەتا ھەرێما کوردستانێ دا ئێکلا بوویە.
زێدەتر ئایدن مەعروف دیارکر، ھێشتا ژڤانێ کومبوونا مەسرور بارزانی ئەوێ ھاتیە راسپاردن بۆ پێئینانا حوکمەتا ھەرێمێ دگەل پێکھاتەیێ ترکومان و مەسیحیان نەھاتیە ئاشکرا کرن لێ بەری نوکە ئەوان رێککەفتن کریە بۆ دانا دو وەزارەتا بۆ ترکومان و مەسیحیان ئێکلا بوویە لێ نەھاتیە دیارکرن دێ چ وەزارەت بن.
ناڤھاتی ئەو چەندە ژی دیارکر ئەو دێ پێداگیریێ ل سەر وەرگرتنا پوستێ ھاریکارێ سەرۆکێ ھەرێمێ کەن و دبیت ئەو دگەل وەزارەتەکێ ڤی پوستی ژی بۆ پێکھاتەیان وەرگرن لێ د کومبوونێن بھێت دا ئەو دێ دانوستاندنێ ل سەر ڤێ چەندێ کەن دەمێ ب فەرمی ژڤانێ کومبوونێ دھێتە دیارکرن.
ئەڤرۆ نیوز:
پشتی یانا ریال مەدرید ھەڤبەستا یاریزانێ گەنچ یێ ھەلبژارتیێ ژاپونێ و یانا توکیو یا وی وەلاتی تاکیفۆسا کوبو ئیمزا بکەت کو ل دیڤ ژێدەرێن رۆژنامەڤانی یێن وەلاتێ ژاپونێ وەسا دیارکربوون ئەو یاریزان دێ ھەڤبەستا یانا بەرشەلۆنا ئیمزا کەت لێ د دەنگوباسەکێ نە چاڤەرێکری دا رێڤەبەرێ کاروبارێن ئەوی یاریزانی رێککەفتن ل گەل یانا ریال مەدرید کر پشتی وێ یانێ کوژمەکێ مەزنتر پێشکێشی ئەوی یاریزانی و یانا ئەوی کری.
تاکیفۆسا کوبو یێ ١٨ سالی ئەوێ بەرنیاس ب میسی ژاپونێ پشتی ئیمزاکرنا ھەڤبەستا خوە ل گەل ریال ئیمزاکری د داخویانیەکێ دا بۆ دەزگەگێن راگەھاندنێ دیارکر شانازی ب خوە دبیت ئاستێ ئەوی بەراوبکەن و میسی لێ ھێشتا گەلەک مایە ھەتا ئەو ب گەھتە ئاستێ وی ستێرا جیھانی میسی لێ یا گرنگ نوکە ئەوە ئەو ھزر ل پاشەرۆژا خوە یا نوو بکەت ل گەل یانا خوە ریال مەدرید .
زێدەتر ئەوی یاریزانی سەبارەت ھاتنا خوە بۆ یانا ریال مەدرید و نە ئیمزاکرنا ھەڤبەستا بەرشەلۆنا رەتکر ل ڤی دەمی .
تاکیفوسا کوبو ل ژیێ ١٠ سالی پەیوەندی ب یانا بەرشەلۆنا کربوو لێ ل ھاڤینا ٢٠١٥ ڤەگەریابوو وەلاتێ خوە ژبەر ئەو سزایێن یانا بەرشەلۆنا ل وێ سالێ توش بوویێ ژلایێ فیفا ڤە پشتی ھەڤبەست ل گەل یاریزانێن ل بن ١٨ سالی دا ئیمزاکری کو زوربەیا رۆژنامەیێن وەلاتێ ئیسپانیا و ژاپونێ وەسا دیارکر بوو یاریزان ل گەگوھاستنێن ھاڤینا ئەڤ سالە دێ ھەڤبەستا بەرشەلۆنا ئیمزا کەت لێ د دەنگوباسەکێ نە چاڤەرێکری دا یانا ریال مەدرید ھەڤبەستا ئەوی یاریزانی ئیمزاکر پشتی شیای کوژمەکێ زێدەتر پێشکێشی ئەوی یاریزانی و یانا ئەوی بکەت.
ئەڤرۆ نیوز:
پلە بلندکرنا ناف ھێزێن پێشمەرگەیا کوردستانێ دەسپێکر و د ڤی چارچوڤەی دا ھەموو رێکارێن قانوونی بۆ ڤێ مەرەکێ ب دووماھی ھاتینە.
زێدەتر د ڤی چارچوڤەی دا لیوا بابەکر فەقێ بەرپرسێ راگەھاندنا وەزارەتا پێشمەرگەی دیارکر ل دووڤ وان رێنمایێن بۆ پلە بلندکرنا ھێزێن پێشمەرگەی دەرکەفتین دەسپێکرینە ژ بەرکو د ماوێ شەرێ تیرورستێن داعش دا ھەموو پلە بلندکرن ھاتبوونە راگرتن، لێ نوکە پلەیێن ٢٠١٦ و ٢٠١٧ دەسپێکرینە ئەوێن ئەف مافە ھەی و پشتی ماوەیەکێ دی دێ پلە بلندکرنا ٢٠١٨ ژی دەسپێبکەت.
دەربارەی ئەوێن پلە بلندکرن ل دووڤ رێنمایێن وەزارەتا پێشمەرگەی ڤەدگرن دیارکر، سەربازی ژ سالەکێ بۆ دو سالایە و ئەفسەرێ لەشکەری ژ سێ سالایە، و پلا رائید ژ چار سالایە، و عەمید شەش سالن ل دووڤ خشتێ بۆ وان ھاتیە دیارکرن.
ئەڤرۆ نیوز:
سەرۆکێ جڤاتا پارێزگەھا کەرکووکێ دیارکر پشتی پارتی و ئێکەتی رێککەفتنێ دکەن ئەو دێ کومبوونا جڤاتا پارێزگەھا کەرکووکێ ئەنجامدەن.
زێدەتر رێبوار تالەبانی دیارکر، بریاربوو ل رۆژا چارشەمبا بوری جڤاتا پارێزگەھا کەرکووکێ ل بەغدا کومبیت لێ ئەڤ چەندە روونەدا پێخەمەت دانا دەستھەلاتان بۆ پارێزگارێ بەروەخت یێ کەرکووکێ راکان جبوری پشتی جڤاتا وەزیرێن عیراقێ ل سەر ڤێ چەندێ رازی نەبووى ئەڤ دەستھەلاتێن زێدەتر بۆ پارێزگارێ ب وەکالەت يى كه‌ركووك بھێنە دان.
دیسان سەبارەت بەرنامێ نوو یێ جڤاتا پارێزگەھا کەرکووکێ ناڤھاتی دیارکر، پێگوھۆر ئەوە پشتی پارتی و ئێکەتی رێککەفتنێ ل سەر پێکئینانا حوکمەتا نوو یا ھەرێما کوردستانێ دکەن دەربارەی کێشەیا کەرکووک ژی بھێتە ئێکلا کرن داکو دگەل بەغدا ژی گوتوبێژان بکەین بۆ چارەسەکرنا رەوشا کەرکووکێ و دەڤەرێن کێشە ل سەر و ھەردەمێ پارتی و ئێکەتی رێککەفتن وی دەمی بێ گۆمان دێ جڤاتا پارێزگەھێ کومبوونا خوە کەت.
ئەڤرۆ نیوز:
ئەڤرۆ رۆژا شەمبی رێککەفتی ١٥-٦-٢٠١٩ مەسرور بارزانی ئەوێ ھاتیە راسپاردن بۆ پێکئینانا حوکمەتا نوو یا ھەرێما کوردستانێ پێشوازی ل مارتن جایگەر، وەزیرێ دەولەتێ بۆ ھاریکاریا دارایی گەشەپێدانا کومارا ئەلمانیا فیدرال و شاندێ دگەل دا کر.
د ڤێ دیدارێ دا کو بالیوزێ ئەلمانیا ل عیراقێ و قونسلێ وی وەلاتی ل ھەولێرێ ژی ئامادەبوون بەحس پەیوەندیێن ناڤبەرا ھەرێمێ و ئەلمانیا دا ھاتە کرن و دووماھی پێشھاتێن سیاسی یێن دەڤەرێ ژی ھاتە گوتوبێژ کرن.
ژلایێ خوە ڤە مەسرور بارزانی پەسنا رولێ وەلاتێ ئەلمانیا د پشتەڤانیا ھەرێما کوردستانێ و بلند نرخاند ژلایێ سەقامگیری و ئاسایشێ ڤە، و ھەرێما کوردستانێ د خوازیت ھەردەم کێشێن خوە ب رێیا گوتوبێژان و د چارچوڤێ دەستورێ عیراقێ دا دگەل بەغدا چارەسەر بکەت و ب ڤێ چەندێ رەوشا ئەمنی و ئاسایشا دەڤەرێ دێ خورتر بیت.
ژلایێ خوە ڤە مارتن جایگەر وەزیرێ دەولەتێ بۆ ھاریکاریا دارایی گەشەپێدانا کومارا ئەلمانیا فیدرال پیروزباھیا مەسرور بارزانی کر پشتی ھاتیە راسپاردن بۆ پێکئینانا کابینەیا نوو یا حوکمەتا ھەرێما کورستانێ و سوز دا زێدەتر کاربکەن د ھەموو بواران دا پشتەڤانیا ھەرێما کوردستانێ بکەن و پەیوەندیێ، ھەردولا ژی بھێزتر بکەن.
نيشاندان