ئەڤرۆ نیوز، لەزگین، رەمەزان:

قایمقامێ قەزا شنگال دیار کر کو د دەمێ دو رۆژان دا رووبەرەکێ مەزن یێ دەخلۆدانێ جۆتیاران ھاتیە سۆتن و داخوازێ ژ حوکمەتا عیراقێ دکەن ل سەر کەیسا سۆتنا دەخلۆدانێ جوتیاران بھێتە دەنگ و پەرێن ڤەکۆلینێ بھێنە ڤەکرن، ھەروەسا ژ ئالیێ خوە ڤە پێکھاتا مەسیحیان ل پەرلەمانێ کوردستانێ ژی ژ بەر ھەمان ئەگەر ھۆشداریێ ددەتە بەغدا.

مەحما خەلیل، قایمقامێ قەزا شنگالێ بۆ ئەڤرۆ نیوز دیار کر کو ئەڤە دو رۆژن ئاگرەکێ مەزن بەردبیتە دەخلۆدانێ جۆتیاران ل ھەموو پارێزگەھا نەینەوا بت ایبەتی ژی ل شنگالێ وەسا دیارە کەسانیێن تێکدەر یێن کارەساتا ب سەرێ شنگالێ ئێناین دەست د ڤێ چەندێ دا ھەنە داکو خەلک بھێتە بێ بەھرکرن ژ مفایێ دەخلۆدانی، ئەڤ کارەساتێن سۆتنا دەخلۆدانی پێدڤی ب ڤەکۆلینێ نە و داخوازێ ژ حوکمەتا عادل عەبدولمەھدی و حوکمەتا ھەرێما کوردستانێ دکەن ل سەر ڤێ کەیسا سۆتنێ راوەستن و رێ یێن چارەسەریێ بھێنە دیتن و ڤەکۆلین بھێتە ئەنجامدان، چونکی ھەتا نوکە ب ھزارەھان دونەمێن ئەردێ جۆتیاران ل سنوورێ قەزا شنگالێ یێن ھاتینە سۆتن.

ناڤھاتی ئاماژە دا وێ چەندێ کو پێدڤیە ھاریکاریەکا لوجستی بۆ مووسل بھێتە کرن ژ بەر ڤان روودانێن سۆتنا دەخلۆدانێ و ھاریکاریا وان جۆتیاران بھێتە کرن یێن دەخلۆدانێ وان ھاتیە سۆتن و ئامیرێن چاندنێ بھێنە دابینکرن و پەرێن ڤەکۆلینێ ل سەر سۆتنا دەخلۆدانی بھێنە ڤەکرن و ب ھووری ڤەکۆلین بھێتە کرن بۆ سزادانا وان کەسێن ب ڤێ کارێ تێکدەر رادبن.

ژ ئالیێ خوە ڤە روبینا تیاری، ئەنداما پەرلەمانێ کوردستانێ ژ پێکھاتا مەسیحیان بۆ ئەڤرۆ نیوز دیار کر کو ل دەشتا نەینەوا خێزانێن مەسیحی زڤرینە سەر جھێن خوە و دەست ب کارێ چاندنێ کریە و رووبەرەکێ مەزن یێ گەنمی ھاتیە چاندن ل دەشتا نەینەوا، ژ بەر کو ژێدەرێ ژیانا وانایە، بەلێ پشتی سۆتنا گەنمێ جوتیارێن کورد ل سنوورێ کەرکووکێ مەترسیەکا مەزن ل سەر گەنمێ جۆتیارێن مەسیحی ل دەشتا نەینەوا دروستبوویە کو بھێتە سۆتن.

ناڤھاتیێ خویا کر کو ل دەشتا نەینەوا ژی وەک کەرکووکێ گەنمێ جۆتیارا ھاتیە سۆتن، بەلێ رێژەکا مەزن نەبوویە و گۆت: “مەسیحیان ب رێیا نونەرێن خوە ھۆشداری دایە حوکمەتا عیراقێ ل دۆر مەترسیا سۆتنا گەنمێ جۆتیاران، ژ بەر کو حوکمەتا عیراقێ بەرپرسە ژ سۆتنا گەنمێ جوتیارێن کورد و مەسیحی، نوکە ھێزێن ملیشیاتان ل دەشتا نەینەوا ھەنە ھەر زیانەکا ب مەسیحیێن دەشتا نەینەوا و بەرھەمێن وان یێن چاندنێ بکەڤیت حوکمەتا عیراقێ بەرپرسە و مە ل سەر ڤێ چەندێ ئاگەھدار کرینە”.