ئه‌ڤرۆ نیوز:

وه‌زاره‌تا دارایى وئابوورى ل هه‌رێما كوردستانێ ل دۆر داخۆیانیه‌كا ئه‌ندامێ په‌رله‌مانێ عیراقێ  د. رێبوار كه‌ریم بۆ رادیوا ده‌نگێ ئه‌مریكا رۆهنكرنه‌ك به‌لاڤكر.

وه‌زاره‌تا دارایى د رۆهنكرنا خوه‌ دیارككر، ئه‌ڤرۆ ئه‌ینیێ 19/4/2019 د چاڤپێكه‌فتنه‌كێ دا ل پشكا كوردى ل ده‌نگێ ئه‌مریكا، ئه‌ندامێ په‌رله‌مانێ عیراقێ د رێبوار كه‌ریم راگه‌هاند كو (حوكمه‌تا هه‌رێما كوردستانێ پارێ مووچێ فه‌رمانبه‌رێن هه‌رێمێ كو ژ به‌غدا هاتیه‌ بۆ تشتێن دى د مه‌زێخیت ول دووڤ پێزانینێن مه‌ یێن داینه‌ وه‌به‌رهێنه‌ران). وه‌كو وه‌زاره‌تا دارایى ل هه‌رێما كوردستانێ دخوازین ڤان چه‌ند خالان بێخینه‌ به‌رچاڤێ وى په‌رله‌مانتارێ به‌رێز ووه‌لاتیێن هه‌رێما كوردستانێ كو ئه‌و پاره‌ د چ دا هاتیه‌ مه‌زاختن:

• حوكمه‌تا هه‌رێمێ هه‌یڤانه‌ ل پێنجێ هه‌مى هه‌یڤان مووچه‌ى به‌لاڤ دكه‌ت وئه‌ڤ هه‌یڤه‌ ئه‌و رۆژه‌ كه‌فته‌ د ئه‌ینیێ دا ودو رۆژان گیروبوو.
• حوكمه‌تا عیراقێ بۆ هه‌یڤێن 1 و 2 سالا 219 گۆژمێ 317 ملیار دینار هنارتینه‌ بۆ هه‌رێما كوردستانێ ب وان مووچێن هه‌یڤێن 10 و 11 سالا 2018 پێ هاتینه‌ دان ب سیسته‌مێ پاشكه‌فتا مووچه‌ى.
• ل هه‌یڤا 3 سالا 2019 گۆژمێ 453 ملیار دینار هاتن كو مووچێ هه‌یڤا 12 سالا 2018 پێ هاته‌ دان بێ پاشكه‌فتا مووچه‌ى كو مووچێ بێ پاشكه‌فت هه‌یڤانه‌ پێدڤى ب 881 ملیار دینارایه‌ وگۆژمێ 200 ملیار دینار بۆ تمامكرنا هه‌یڤێن 1 و 2 هاتیه‌ كو بۆ مووچێ وه‌زاره‌تا پێشمه‌رگه‌ وده‌رماله‌ وجوداهیا مووچێ مووچه‌خۆران بكارهاتیه‌ و ب چو شێوه‌كى بۆ چو بابه‌ته‌كێ دى نه‌هاتیه‌ بكارئینان وهه‌موو ئه‌و ئاخڤتن وده‌نگوباسێن نه‌ راست ره‌ت دكه‌ین وچو بنه‌مایه‌ك بۆ نینه‌.

 دیاركر ژى ” هه‌یڤانه‌ حوكمه‌تا هه‌رێمێ د ناڤبه‌را 5 هه‌یڤێ هه‌تا 25 هه‌یڤێ مووچێ فه‌رمانبه‌ران وخانه‌نشینان به‌لاڤ دكه‌ت ول ڤێ هه‌یڤێ ژى 23/4/2019 دووماهى رۆژا به‌لاڤكرنا مووچێ ڤێ هه‌یڤێ یه‌”.