ئەڤرۆ نیوز، رێوار مزیری:

رێڤەبەرێ گشتی یێ وەبەرھێنانێ ل پارێزگەھا دھۆکێ بۆ ئەڤرۆ نیوز دیار کر کو پشک کێشان بۆ بەلاڤکرنا دوکانان ل کومەلگەھا خزمەتگۆزاریێن پیشەسازیا ترۆمبێلان ل دەڤەرا ئالۆکا ل سەر خودان پیشەکارێن دەڤەرا پیشەسازی یا بەرۆشکێ ل ھۆلا رێڤەبەریا نەخشەدانانا ئاڤەدانیێ ھاتە ئەنجامدان و گۆت: “دوکانێن کۆمەلگەھا ناڤھاتی دێ د دەمێ دو سالێن داھاتی دا ب دووماھی ھێن”.

کوردو ئیحسان عەبدولسەمەد، رێڤەبەرێ گشتی یێ وەبەرھێنانێ ل پارێزگەھا دھۆکێ دیار کر کو کومەلگەھەکا سەردەم یا خزمەتگۆزاریێن پیشەسازیا ترۆمبێلان ل دەڤەرا ئالۆکا یا دھێتە ئاڤاکرن و پشتی ئەڤ کۆمەلگەھە ب دووماھی دھێت دێ پیشەسازی یا بەرۆشکێ بۆ ڤێ کۆمەلگەھێ ھێتە ڤەگوھاستن و ل جھێ وێ دێ پارکەکا گشتی ھێتە چێکرن.

ناڤھاتی ئاماژە دا وێ چەندێ کو ئەڤ کومەلگەھەکا سەردەم یا خزمەتگۆزاریێن پیشەسازیا ترۆمبێلان ژ ھزار و ٤٤٦ دوکانان پێک دھێت و ئەڤ دوکانە دێ ب شێوێ قست ل سەر ھەمی خودان پیشەکارێن دەڤەرا پیشەسازی یا بەرۆشکێ ھێنە بەلاڤکرن و بۆ ڤێ مەرەمێ ژی پشک کێشان ھاتیە ئەنجامدان و گۆت: “مۆلەتا ڤی پرۆژەی ژ لایێ رێڤەبەریا گشتی یا وەبەرھێنانێ ل پارێزگەھا دھۆکێ ڤە ھاتیەدان کو کۆمپانیا (شاھان) ب کارێ بجە ئینانا ڤی پرۆژەی رابوویە و بڕیارە د دەمێ دو سالان دا ب دووماھی بھێت”.

ئەڤرۆ نیوز، ئەمیر ئەترووشی:

جێگرێ رێڤەبەرێ ئاڤا دەوروبەرێن دھۆکێ راگەھاند، ب کۆژمێ ١٨ ملیۆن یۆرۆیان پرۆژێ ستراتیژی یێ ئاڤا فەیدیێ بۆ کۆمەلگەھا فەیدیێ و پێنج کەمپێن ئاوارە و پەنابەران بەرەڤ دووماھیێ یە و ئاڤا ڤی پرۆژەی دێ ژ سکرێ مووسلێ ھێتە کێشان.

ئەندازیار ڤەگێر ئەحمەد، جێگرێ رێڤەبەرێ ئاڤا دەوروبەرێن دھۆکێ بۆ ئەڤرۆ نیوز دیار کر، پرۆژێ ستراتیژی یێ راکێشانا ئاڤێ ژ سکرێ مووسلێ بۆ پرۆژێ ئاڤا فەیدیێ ب کۆژمێ ١٨ ملیۆن یۆرۆیان ژ لایێ رێکخراوەکا ئەلمانی ڤە دھێتە دروستکرن، دیسا ب کۆژمێ حەفت ملیۆن یۆرۆیان ژی کارەبا پرۆژەی دێ‌ھێتە چێکرن و خەلکێ کۆمەلگەھا فەیدیێ ل گەل گۆندێن وێ و سێ کەمپێن پەنابەران و دو کەمپێن ئاواران دێ مفای ژ ڤی پرۆژەی وەرگرن.

ئەندازیار ڤەگێر خویا ژی کر، پرۆژێ ئاڤا فەیدیێ د ھەر دەمژمێرەکێ دا دێ دو ھزار و ٥٠٠ مەترێن ئاڤێ یێن سێجا ھاڤێژیت و ب پشتەڤانیا رێکخراوا (GIZ) یا ئەلمانی دھێتە چێکرن و دو کۆمپانیێن دھۆکێ ڤی پرۆژەی بجە دئینن و ب چاڤدێریا رێکخراوا (کوکس) یا ئەلمانی و حکومەت ژی وەکو کوردینەیتەر ل سەر پرۆژەی کار دکەت و پرۆژە سێ پێکھاتن، وێستگەھا ئاڤێ و عمبارەکا ئاڤێ کو فرەھیا وێ ١١ ھزار مەترن و ٥٤٠ مەتران یا بلندە و تۆرا ئاڤێ ژی ب درێژیا ١٢ کیلۆمەترانە.

ناڤھاتی ئاشکرا کر، ئەو دیزاینا بۆ ھاتیە کرن کو سکرێ مووسلێ ئاڤا وی کێم بیت زیان ب ڤی پرۆژەی ناکەڤن، بەری پرۆژە بھێتە دروستکرن تێست ھاتینە کرن، ل وی جھێ پرۆژە لێ ھاتیە دروست کرن چو جارا ئاڤ لێ کێم نابیت و ھەر گوھۆڕینەکا دکەڤیتە د سکری دا زیان ب وی پرۆژەی ناکەڤیت و ل دەمەکێ نێزیک دێ پرۆژە ب دووماھی ھێت.

ئەڤرۆ نیوز، ئەمیر ئەترووشی:

رێڤەبەرێ بەرھنگاریا توندوتیژیێ دژی ژنان ل پارێزگەھا دھۆکێ راگەھاند، د ماوێ ئەڤ سالە دا رێژەیا تۆمارکرنا سکالایێن توندوتیژیا دژی ژنان و حالەتێن خوەکۆشتنێ ھەڤبەرکرن ل گەل سالێن بۆری ل پارێزگەھا دھۆکێ بەرەڤ کێمبوونێ چووینە.

ئارام ئەترووشی، رێڤەبەرێ بەرھنگاریا توندوتیژیێ دژی ژنان ل پارێزگەھا دھۆکێ بۆ ئەڤرۆ نیوز دیار کر کو د ماوێ سێ ھەیڤێن ئەڤ سالە دا، ب تنێ دو حالەتێن کۆشتنا ژنان ھاتینە تۆمارکرن و ل سالا بۆری د سێ ھەیڤێن دەستپێکێ دا چار حالەتێن کۆشتنا ژنان ھەبووینە، ھەروەسا ل سالا بۆری د سێ ھەیڤان دا ھەشت حالەتێن خوەکۆشتنێ ھەبووینە و ئەڤ سالە ب تنێ پێنج حالەتن، توندوتیژیا سکسی ژ ١٢ حالەتان بووینە شەش حالەت.

ئارام ئەترووشی خویا ژی کر، د ماوێ سێ ھەیڤان دا ٦٣٨ سکالایێن توندوتیژیێ ل سەرانسەری پارێزگەھا دھۆکێ ھاتینە تۆمارکرن.