ئەڤرۆ نیوز، ئەمیر ئەترووشی:

بەرپرسێ راگەھاندن و پەیوەندیان ل رێڤەبەریا بەرەڤانیا باژێری ل پارێزگەھا دھۆکێ راگەھاند، رێڤەبەریا مە ٥٠ تیم بۆ پاراستنا دەخلودانێ جۆتیارێن پارێزگەھا دھۆکێ ژ روودانێن ئاگری داناینە و ب شەڤ و رۆژ دێ د خزمەت دابن بۆ ھەر روودانەکا نەچارڤەرێکری.

رائیدێ مافپەروەر بێوار عەبدولعەزیز، بەرپرسێ راگەھاندن و پەیوەندیان ل رێڤەبەریا بەرەڤانیا باژێری بۆ ئەڤرۆ نیوز دیار کر کو زێدەباری ھەبوونا تیمێن تەنگاڤیان یێن ئاگرڤەمراندنێ، پێدڤیە جۆتیار ب خوە ژی چاڤدێریا گەنمێ خوە بکەن و رێنمایێن رێڤەبەریا وان جێبەجێ بکەن و دەراسێن دروونا گەنمی ب شەڤ و رۆژ کارنەکەن و بێھنا وان بھێتە دان و ئاگر ژی ل نێزیکی گەنمی نەھێتە ھەلکرن.

ناڤھاتی ئاشکرا ژی کر کو تیمێن وان ل ھەموو قەزایان ھاتینە جێگیرکرن و ھەتا وان ھندەک تیم بۆ پارێزگەھا نەینەوا ژی رەوانەکرینە بۆ پاراستنا دەخلودانی ژ روودانێن ئاگری.

ئەڤرۆ، ئەمیر ئەترووشی:

رێڤەبەرێ پەیوەندی و راگەھاندنێ ل وەزارەتا ئەوقاف و کاروبارێن ئایینی راگەھاند، ئەڤە نێزیکی نەھـ سالانە وان داخوازا دانانا سندۆقا کۆمکرنا زەکات و فترەیان کریە، بەلێ ھەتا نوکە نەھاتیە دانان و ئەنجوومەنێ وەزیران ئەڤ داخوازیە راگرتیە.

مەریوان نەقشەبەندی، رێڤەبەرێ پەیوەندی و راگەھاندنێ ل وەزارەتا ئەوقاف و کاروبارێن ئایینی یا حوکمەتا ھەرێما کوردستانێ بۆ ئەڤرۆ نیوز دیار کر کو ل سالا ٢٠١٠ وان وەکو وەزارەتا ئەوقاف و کارۆبارێن ئاینی ب شێوەیەکێ فەرمی داخواز ژ ئەنجوومەنێ وەزیرێن حوکمەتا ھەرێما کوردستانێ کر سندۆقەکا تایبەت بۆ کۆمکرنا زەکات و فترەیان بھێتە دانان کو ل ھەرێما کوردستانێ ب کۆژمێ نێزیکی ٣٠ ملیۆن دۆلاران دھێتە تەخمینکرن، بەلێ داخوازا وان ل ئەنجۆمەنێ وەزیران ھاتیە راگرتن.

ناڤھاتی ئاماژە دا وێ چەندێ کو سالانە ئەڤ کۆژمێ ٣٠ ملیۆن دۆلاران یێ زەکات و فترەیان ب ھەدر دچیت و ب شێوەیەکێ درۆست ناگەھیتە ھەژار و دەستکۆرتان و ئەگەر ئەڤ سندۆقە بھێتە دانان و ھەموو دەولەمەند پارێ خوە یێ زەکاتێ یێ سالانە بکەنە تێدا و ب شێوەیەکێ دادپەروەرانە ل سەر ھەژاران بھێتە بەلاڤکرن، رێژا ھەژاریێ ل ھەرێما کوردستانێ دێ ب رێژەکا مەزن بەر ب کێمیێ چیت.

ئەڤرۆ نیوز، لەزگین جوقی:

رۆژنامەڤانەکێ ئێزدی دیار کر کو پشتی ٣/٨/٢٠١٤ێ ب دەھان بازرگانێن کەیسا ئێزدیان دەرکەفتینە و ئەو بازرگان بتنێ بۆ خوە پارەی ب کەیسا جینوسایدا شنگالێ کۆم دکەن.

مەیسەر ئادانی، رۆژنامەڤانی ئێزدی ل قەزا شنگال بۆ رۆژناما ئەڤرۆ دیار کر کو ئەڤ بارزگانێن کەیسا جینوسایدا شنگالێ فێر بووینە ھەر جار دێ ئێک ژ وان قوربانیەکا بن دەستێن تیرۆرستێن داعش رەوانەی دەولەتەکێ کەت بۆ ڤەگوھاستنا چیرۆکا وێ و دێ بۆ مەرەمێن خوە یێن تاکە کەسی بکارئینت داکو پارە پێ کۆم کەت و گۆت: “ئەڤە بۆ دەمێ پێنج سالانە ئەڤ فلمە دووبارە دبیت چەندین جاران مە بزاڤ کرینە دەنگێ قوربانی و رزگاربوویێن بن دەستێن تیرۆرستێن داعش بگەھینین، لێ ھێشتا گوھداریا مە نەھاتیە کرن، مە خواست چارەسەریەک بھێتە دیتن رێگری ل وان کەسان بھێتە کرن یێن بازرگانیێ ب کەیسا جینوسایدا شنگالێ دکەن”.

ناڤھاتی گۆت: “ئەم دگەلداینە بۆ ھەموو رزگاربوویێن بن دەستێن تیرۆرستان باج بھێنە دروستکرن و ھیچ رزگاربوویەکا ئێزدی بێ ئاگەھداریا نڤیسینگەھا رزگارکرنا رەڤاندیێن ئێزدی بۆ وەلاتان نەھێنە رەوانەکرن، چونکو رزگاربوویێ دھێنە ئیستغلال کرن و ئەوێ ڤێ کاری ژی دکەن ب تنێ مەرەما وان ئەو پارەی بۆ خوە بناڤێ رزگاربوویان و کەیسا شنگالێ کۆم بکەن”.