ئەڤرۆ نیوز:
وەزارەتا دارایی و ئابوری یا حوکمەتا ھەرێما کوردستانێ خشتێ بەلاڤکرنا مووچێ ئەوان وەزارەتێن بەری جەژنێ ئاشکرا کر.
ل دووڤ خشتێ وەزارەتا دارایی بریارە سوبەھی رۆژا سێشەمبی ٢٨ ئەیارا ٢٠١٩ مووچێ ھەیڤا ئادارا ئەڤ سالە دێ ھێتە بەلاڤ کرن و دیوانا وەزارەتا پێشمەرگەی و لیوایێن سەر ب وێ ڤە دێ سوبەھی مووچێ خوە وەرگرن.
ھەمان ژێدەر ئەو چەندە ژی دیارکر رۆژا چارشەمبی ٢٩-٥-٢٠١٩ مووچێ یەکێن ٧٠ و ٨٠ یێن پێشمەرگەی دێ ھێتە بەلاڤ کرن، و ٣٠-٥-٢٠١٩ مووچێ وەزارەتا پەروەردێ دێ ھێتە بەلاڤ کرن.
ئەڤرۆ نیوز، بارزان مزووری:
ھەڤال محەمەد رێڤەبەرێ ناحیا کەلەکچی بۆ ئەڤرۆ نیوز دیار کر، ئەڤرۆ سپێدێ ٢٧/٥/٢٠١٩ تیمێن دروستکرنا پرۆژەی دەست ب قوناغا دووماھیێ کر قوناغا قێرکرنێ بکوژمێ ٨٠٠ ملیون دینارا قوناغا بەری نھا یا دروستکرنا ئوڤەرپاسێ بکوژمێ ٩٠٠ ملیون ھاتبوونە دابینکرن سەرجەمێ وان ١ ملیار و شەش سەد ملیون دینار بوون، سوزێ دەینە خەلکێ خۆ بۆ ماوێ ١٥ رۆژێن دی ئەڤ پرۆژە ب فەرمی ھێتە ڤەکرن.
ھەڤال محەمەد ئاماژە ب وێ چەندێ ژی کر ئەڤ ئوڤەرپاسە گەلەک یا گرنگە ژ بەر کو دکەڤیتە سەر رێیا نیڤدەولەتی و ھاتنوچوونا ھەموو باژێرێن کوردستانێ لێ دبورن دیسان ھاتنوچوونا دەڤەرا کەلەکچی ھەموویان ھاتنوچوونا وان ل سەرە بتنێ ژمارا وان ترومبێلێن بارھەلگر یێن ناحیێ زێدەتری ١٨٠٠ ترومبێلن دگەل زێدەتری ٣ ھزار ترومبێلێن بچیک، ژ بەر راوەستانا ڤی پرۆژەی چەندین رویدانیێن ھاتنوچونێ لپشت خوە ھێلاینە.
ئەڤرۆ نیوز، نەوزاد هلوری:
ئەڤرو نیڤرۆ وەلاتیەکێ گوندێ گیزێ ل سنوورێ قەزا ئامێدیێ، مارەکێ مەزن ل چیایێ گارەی و نێزیک گوندێ گیزێ کوشت، ب گورەی ئاخفتنێن وی ئەڤ مارە یێ مەترسی و ژەهرداربوو.
عەبدال رەمەزان گیزی، ئەو وەلاتیە کو مار کوشتی بو ئەڤرۆ نیوز گوت: (ب مەرەما چونا گڤارکا من قەستا ئاقارێ گۆندێ خوە ل چیایێ گارەی کر، ژ نیشکەکێڤە مارەکێ مەزن کەفتە بەر سینگێ من و بزاڤ دکر کو بهێتە من، بەلێ سوپاس بو خودێ نەشیا بهێت و د ئەنجام دا من کوشت).
زێدەتر گوت: (ئەڤ مارە ژ جورێ کورەمار بو، گەلەکێ ب مەترسی بو، مارەکێ ژەهردارە و هەرکەسێ یان تشتێ پێڤە بدەت دێ مریت یان کارتێکرنەکا خراپ لسەر کەت. ژبەرڤێ من کوشت).
ب گوری ئاخفتنێن وی، ئەڤ مارە نێزیکێ میترونیڤان درێژە و گەلەک ژی ستوورە و زێدەتر گوت: (ئەڤ مارە د سروشت دا د کورتن، بەلێ د ستویرن، ئەڤە ئێکەم مارە هندە مەزن ئەز دبینم و دکوژم، پێشتر ژی من گوهلێ نەبویە ل دەڤەرێ مارێن هوسا مەزن هاتبنە کوشتن و دیتن).
ئه‌ڤرۆ نيوز:
په‌يڤدارێ حوكمه‌تا هه‌رێما كوردستانێ، سه‌فين دزه‌يى ئه‌ڤرۆ دوشه‌مبى 27/5/2019 رۆژێن بهێنڤه‌دانا جه‌ژنا ره‌مه‌زانێ ب فه‌رمى راگه‌هاند.
سه‌فين دزه‌يى گۆت” بهێنڤه‌دانا فه‌رمى يا جه‌ژنا ره‌مه‌زانى دێ ژ رۆژا ئێكشه‌مبيێ 2/6/2019 ده‌ستپێكه‌ت و ل رۆژا ئێكشه‌مبى 9/6/2019 ده‌واما فه‌رمى يه”.
گۆت ژى” بريارا بهێنڤه‌دانێ بۆ هه‌موو داموده‌زگه‌هێن حكومى يه، ژبلى هه‌ردو وه‌زاره‌تێن په‌روه‌ردێ وخواندنا بلند، ژبه‌ر كارناما خوه وئه‌زموونان، به‌رنامێ خوه دێ دارێژن”.
ئه‌ڤرۆ نیوز:
ب تۆمه‌تا گه‌نده‌لیێ وهه‌ده‌ردانا سامانێ گشتى، حوكمێ زیندانكرنێ ب حه‌فت سالان بۆ وه‌زیرێ به‌رێ یێ ره‌وشنبیرى ل عیراقێ هاته ده‌ركرن.
وه‌زیرێ به‌رى یێ ره‌وشه‌نبیرى ل عیراقێ، ئه‌سعه‌د هاشمى، سه‌ر ب حزبا ئیسلامى ڤه ژ لایێ ده‌سته‌یا ده‌ستپاكیێ هاتبوو تۆمه‌تباركرن وسزایێ زیندانكرنێ ب حه‌فت سالان ل سه‌ر هاته سه‌پاندن.
فه‌رمانگه‌ها ڤه‌كۆلینان یا سه‌ر ب ده‌سته‌یا ده‌ستپاكیێ ل عیراقێ راگه‌هاند” ئه‌و سزایه ل سه‌ر هاشمى هاته سه‌پاندن ژبه‌ر ئه‌نجامدانا وى بۆ تاوانا ب هه‌ده‌ردانا سامانێ گشتى وزیان گه‌هاندن ب به‌رژه‌وه‌ندیا گشتى”.
دیاركر ژى” دادگه‌ها تاوانان ل ده‌ڤه‌را كه‌رخ ل به‌غدا ئه‌و سزایه ب شێوێ غیابى بۆ وى وه‌زیرێ به‌رێ ده‌ركریه ژ به‌ر به‌لاڤكرنا چه‌كێن جۆراوجۆر بێ ئه‌گه‌ره‌كێ ره‌وا”.
ده‌سته‌یا ده‌ستپاكیێ به‌لاڤكر” بریارا دادگه‌هێ ل رۆژا 8/6/2019 دێ پلا دووماهیێ وه‌رگریت، ل دووڤ مادێ 340 ژ قانوونا سزایان ل عیراقێ، كو ژ بلێ فه‌رمانا ده‌سته‌سه‌ركرنێ بۆ تۆمه‌تبارێ ره‌ڤى، دێ ده‌ست ب سه‌ر مال ومولكێ وى یێ ڤه‌گوهاستى ونه‌ڤه‌گوهاستى هێته گرتن”.
ئه‌ڤرۆ نیوز:
ئه‌ڤرۆ ئه‌زموونێن دووماهیێ یێن رێزا 12 ئاماده‌یى ل سه‌رانسه‌رى هه‌رێما كوردستانێ ده‌ستپێكر و ئێكه‌م وانا پشكا زانستى، وانا زینده‌وه‌رزانى بوو.
پشتى ب دووماهى هاتنا ئه‌زموونا ئێكێ، وه‌زاره‌تا په‌روه‌ردێ د په‌یچێ خوه دا ل تۆرا جڤاكى یا فه‌یسبووكى، به‌رسڤا راست وپرسیارێن ئه‌زموونێ به‌لاڤكرن.
هژمارا پرسیاران 50 پرسیار بوون وهه‌موو هه‌لبژاردنن، ئه‌ڤه ل خوارێ به‌رسڤێن راست یێن وان پرسیارانه كو وه‌زاره‌تا په‌روه‌ردێ به‌لاڤكرین:
ئەڤرۆ نیوز:
ھێرشبەرێ کورد و یاریزانێ یانا ھاتیا سپور یا تورکی مێرکان ئایدین شیا سەرکێشیا یانا خوە بکەت بوو دەربازبوونێ بوو یاریا دووماھیا قوناغا پلەی ئوڤ یا پلا ئێک یا تورکیا بوو دەربازبوونێ بۆ خۆلا پلا نایاب پشتی ئەو یاریزانێ کورد شیای گولا سێ بوو یانا خوە ل خولەکا ٦ ژ دەمێ زێدەکری توماربکەت .
د چارچوڤێ یاریێن قوناغا پلەی ئوڤ یا تورکیا دا بوو سەرکەفتنێ بۆ خولا پلا نایاب یانا ھاتیا سپور شیا د یاریا خوە یا دوێ دا سەرکەفتنەکا گرنگ ل سەر یانا ئەدەنە دەمیر سپور توماربکەت ب سێ گولان بەرامبەر دو گولان کو د یاریا ئێکێ دا ھەردو یانە بێ گۆل وەکھەڤبوون ، د یاریا دوێ دا یانا ھاتیا سپور یا پێشکەڤتی بوو ھەتا دەقیقا ٣+٩٠ ب دو گولان بەرامبەر گولەکێ لێ ل دەقیقا ٤+٩٠ یانا ئەدەنە گولا وەکھەڤیێ تومارکر و ب وێ گولێ ئەو یانە دەربازی یاریا دووماھیێ د بوو لێ ئەوان گەلەک ب وێ گولێ کەیفخوشی نەبر دەمێ یاریزانێ کورد مێرکان ئایدین شیای ئێک ژ گرنگترین گولا بۆ یانا خوە ل وەرزێ ئەڤ سالە توماربکەت دەمێ شیای ب سەرێ گولا سیێ بوو یانا خوە توماربکەت و دەربازی یاریا دووماھیا قوناغا پلەی ئوڤ بکەت .
ھەژی گوتنێ یە مێرکان ئایدین ل وەرزێ ئەڤ سالە ھەڤبەستا یانا ھاتیا سپور ئیمزاکریە و ل یاریێن قوناغا ئێکێ نەشیا پشکداری ل گەل ئەوان بکەت پشتی توشی ھنگافتنەکێ بووی و ل یاریێن قوناغا دوێ شیا ١١ گولان بوو یانا خوە توماربکەت.
ئه‌ڤرۆ نيوز:
وه‌زاره‌تا پێشمه‌رگه راگه‌هاند رازیبوون هاتیه كرن ل سه‌ر پله بلندكرنا هێزێن پێشمه‌رگه‌ى.
سه‌نته‌رێ راگه‌هاندنا وه‌زاره‌تا پێشمه‌رگه د رۆهنكرنه‌كێ دا ئاماژه ب هاتنا رازیبوونێ بۆ پله بلندكرنا پێشمه‌رگه‌ى دكه‌ت.
پشتى ده‌مه‌كى ژ چاڤه‌رێبوونێ وهه‌بوونا گرفتان د رێنمایێن پله بلندكرنێ ژ ئه‌گه‌رێ قه‌یرانا ئابوورى وشه‌رێ سه‌پاندیێ داعشێ، ل دووماهیێ پله بلندكرن ده‌ستپێكر، د ئێكه‌م بریار ژى دالیستا پله بلندكرنا نه‌ورۆز وئه‌یلۆلا 2016 هاته وه‌زاره‌تا پێشمه‌رگه. ئه‌و لیسته وه‌كو خوه رازیبوون ل سه‌ر هاتیه كرن وچاڤه‌رێ دهێته كرن ب زووترین ده‌م دا ده‌ست پێ بهێته كرن.
ئەڤرۆ نیوز، بارزان مزووری:
سەرۆکێ جڤاتا پارێزگەھا نەینەوا بۆ ئەڤرۆ نیوز ئاشکرا کر، جڤاتا پارێزگەھا نەینەوا ب ھەڤکاری دگەل دەزگەھێ خێرخوازیێ بارزانی و وەزارەتا کۆچ و کۆچبەران یا عیراقێ ئەڤرۆ ٢٦/٥/٢٠١٩ ھاریکاریێن مادی ل سەر ١١٦ کەسوکارێن وان کەسێن ل ٢١ی نیسانا ٢٠١٩ یەختا وان ل جزیرا گەشتیاری د ناڤ سەنتەرێ مووسلێ دا وەرگەڕیای و د ئاڤێ دا خەندقین؛ بەلاڤکرن.
سەیدۆ چەتۆ، سەرۆکێ جڤاتا پارێزگەھا نەینەوا خویا ژی کر، ژ لایێ وەزارەتا کۆچ کۆچبەران ڤە ئاھێن خوارنێ دگەل پێدڤیێن ناڤ مالێ بۆ وان ھاتنە دابینکرن و گۆت: “دەزگەھێ خێرخوازیێ بارزانی ب ھەماھەنگی ل گەل جڤاتا پارێزگەھا نەینەوا ژی ھاریکاریێن مادی ل سەر کەسوکارێن وان بەلاڤکرن”.
گۆتژی: “ھەر خێزانەکێ ٢٠٠ ھزار دینار بۆ ھاتە دان”.
ئەڤرۆ نیوز، عەلی حاجی:
بریکارێ سەرۆکێ باژێرڤانیا زاخۆ دیار کر، نوکە کار کرن ل سەر چەند پرۆژەکان ل قەزا زاخۆ بەردەوامە و چەند پرۆژەک ب دووماھی ھاتینە و کەفتینە د خزمەتا وەلاتیان دا و دبێژیت: بڕیارە د دەمەکێ نێزیک دا پشکەکا دی یا پرۆژان ژ لایێ باژێرڤانیا زاخۆ ڤە ب دووماھی بھێن و دو پارک ژی بھێنە دروستکرن.
ئەندازیار دیندار سالم، بریکارێ سەرۆکێ باژێرڤانیا زاخۆ بۆ ئەڤرۆ نیوز دیار کر، کار کرن ل سەر جاددەیا ئوڤەرپاسا زاخۆ ب دووماھی ھاتیە و ئەو جاددەیا ل بەرامبەر ئامادەیا زاخۆ ھەتا دەستپێکا جاددەیا ئوڤەرپاسا زاخۆ ژی ب دووماھی ھاتیە و گۆت: “نوکە کارکرن ل سەر ئوڤەرپاسا زاخۆ ب دووماھی ھاتیە و دێ کەڤیتە د خزمەتا وەلاتیان دا”.
ئەندازیار دینداری گۆتژی: “د نوکە دا ئەم یێ کار ل سەر دروستکرنا دو پارکان ل ھەر ئێک ژ تاخێن شقا و بێدارێ ل سەنتەرێ قەزا زاخۆ دکەین و ئەو پرۆژە ژی د قووناغێن دەستپێکێ یێن کارکرنێ دانە، ئەڤ پرۆژە ھەموو ل سەر پێشینەیا ھەیڤانە یا باژێرڤانیا زاخۆ دھێنە ئەنجامدان و راستەوخۆ ژی ژ لایێ تیمێن مە ڤە ل باژێرڤانیا زاخۆ دھێنە ب رێڤەبرن”.
نيشاندان