ئەڤرۆ نیوز:
وەزیرێ دەرڤە یێ روسیا سیرگێی لاڤرۆڤ راگەهاند کو چو گرۆپێن چەکدار یێن ئۆپۆزسیۆنا سووریێ ل ئدلبێ نەماینە و هەموو بووینە ئەندامێن ئەلنوسرا و گرۆپێن تیرۆرستی رۆژ ب رۆژێ خوە ل ئدلبێ بهێز دکەن و ئەم ئێدی ل هەمبەر وێ رەوشێ بێدەنگ نابین.
وەزیرێ دەرڤە یێ روسیا بێی کو ئاماژە ب تورکیا بکەت دیار کر کو یێن بەری نها سۆز دابوون کو دێ رەوشا ئدلبێ ئارام کەن، سۆز خوە بجه نەئینان و ژ بەر هندێ ژی زوو یا درەنگ دێ هێرشی ئدلبێ کەین و دێ ژ تیرۆرستان پاقژ کەین.
ئەڤرۆ نیوز، زنار تۆڤی:
ئەندامەکێ پەرلەمانێ کوردستانێ ژ فراکسیۆنا پارتی دیموکراتی کوردستان، بۆ ئەڤرۆ نیوز دیار کر فراکسیۆنا پارتی دیموکراتی کوردستان ل پەرلەمانێ کوردستانێ پرۆژە قانوونەک بۆ راستڤەکرنا قانوونا سەرۆکاتیا ھەرێما کوردستانێ بەرھەڤ کریە، ھەر چەندە نوکە پارتی د دانوستاندنان دایە ل گەل بزاڤا گۆران و ئێکەتیێ و ئالیێن دیتر یێن کوردستانی، چونکی پارتی دڤێت ئەڤ پرۆژە یێ نیشتیمانی بیت و ھەموو ئالیێن سیاسی یێن کوردستانی پشکداریێ د راستڤەکرنا پرۆژە قانوونا سەرۆکاتیا ھەرێمێ دا بکەن و دیسان ھەموو ئالی ل سەر رازی بن و رێکبکەڤن، ژ نوو ئەم دێ وی پرۆژەی دەینە سەرۆکاتیا پەرلەمانێ کوردستانێ و کار دێ ل سەر ھێتە کرن، ھەر چەندە ئەو پرۆژە یێ ئامادەیە، لێ ھێشتا مە نەدایە سەرۆکاتیا پەرلەمانێ کوردستانێ.
رێڤینگ ھرۆری زێدەتر دبێژیت: پارتی ل گەل بزاڤا گۆران دێ شێت ڤێ پرۆژە قانوونێ ل پەرلەمانێ کوردستانێ دەرباز کەت و پەسەند کەت، ھەروەسا پارتی حەز ناکەت، زێدەتر دەمی ب بورینیت، ھەر چەندە پارتی نەڤێت بێی ئێکەتیێ پرۆژە قانوونا سەرۆکاتیا ھەرێما کوردستانێ راستڤەکەت، لەوما ئەم دخوازین ئێکەتی ژی پشکداریێ تێدا بکەت، دیسان ل دەستپێکێ دا دێ قانوونا راوەستاندنا دەستھەلاتا سەرۆکێ ھەرێمێ ھێتە لابرن و ھەروەسا د ماوێ بوری دا ب قانوونەکێ دەستھەلاتێن سەرۆکێ ھەرێمێ ھاتبوونە بەلاڤەکرن ل سەر پەرلەمانی و دادوەریا گشتی و جڤاتا وەزیران، دێ ئەو قانوون ژی ھێتە ھەلوەشاندن، جارەکا دی قانوونا سەرۆکاتیا ھەرێما کوردستانێ دێ ھێتە کارا کرن، سەرۆکێ ھەرێمێ دێ دناڤا پەرلەمانێ کوردستانێ دا ھێتە ھەلبژارتن، نە دناڤا خەلکێ دا، ھەروەسا بۆ ڤی پرۆژەی ئەم حەز دکەین ئێکەتی پشکداریێ تێدا بکەت، لێ ھەکە ئێکەتی گیرو بوو و پشکداری تێدا نەکر، ئەم وەکو پارتی دێ ڤی پرۆژەی ل پەرلەمانی پەسەند کەین، ھەروەسا ل ڤان نێزیکان ئەڤ پرۆژە قانوونە دێ ھێتە دەرباز کرن و ئێدی گەلەک دەم ڤەناکێشیت، لەوما ب پرانیا دەنگان ئەم وەک پارتی ل گەل بزاڤا گۆرانێ و ئالیێن دیتر دێ ڤێ قانوونێ تێپەرینین ل پەرلەمانی، ھەر چەندە ئەز وەسا دبینم، کو ئێکەتی ژی دێ پشکداریێ د راستڤەکرنا ڤێ قانوونێ دا کەت.
ئەڤرۆ نیوز، نەوزاد ھلۆری:
رێڤەبەریا رەوشەنبیری و ھۆنەری یا ئاکرێ دێ سێ ژ باشترین فوتوگرافەرێن کوردستانێ ئەڤێن وێنە بۆ نەورۆزا ئاکرێ گرتی خەلات کەت، بۆ ڤێ مەرەمێ ھەموو فوتوگرافەر داخوازی بەریکانەکا گرنگ دکەت.
کاوە زوھێر، رێڤەبەرێ رێڤەبەریا رەوشەنبیری و ھۆنەری یا ئاکرێ بۆ ئەڤرۆ نیوز گۆت: (ب مەرەما زێدەتر خزمەتکرنا نەورۆزا ئاکرێ، رێڤەبەریا مە دێ رابیت ب ئەنجامدانا بەریکانەکا فوتوگرافی بۆ ھەموو فوتوگرافەرێن کوردستان و ئاکرێ، تێدا دێ سێ ژ باشترین فوتوگرافەران خەلات کەت).
زێدەتر گۆت: (بەریکانە تنێ دێ بۆ وێنێن نەورۆزا ئاکرێ بیت، ھەموو فوتوگرافەر دێ وێنێن خوە رادەستی رێڤەبەریا رەوشەنبیری و ھونەری کەن، پاشان ھەموو وێنە دێ ھێنە نیشادان و لیژنەک دێ ھەلسەنگاندنێ بۆ کەت و ل داویێ سێ وێنە وەکو جوانترین وێنەیێن نەورۆزا ئاکرێ دێ ھێنە خەلاتکرن).
ئه‌ڤرۆ نیوز:
محه‌مه‌د ئه‌مین هه‌ورامانی په‌یڤدارێ وه‌زاره‌تا كاره‌با حوكمه‌تا هه‌رێما كوردستانێ راگه‌هاند, كار ل سه‌ر وێ چه‌ندێ هاتیه كرن كو رێژا كاره‌با نیشتمانی یا پێدڤی بۆ وه‌لاتیان بهێته دابینكرن.
هه‌ورامانی ئاشكرا ژی كر كو پشتی ده‌ربازبوونا وێ پێلا سه‌رمایێ، ره‌وشا كاره‌بێ به‌ر ب باشتر ڤه دچیت و بزاڤ دهێته كرن هه‌تا هه‌یڤا نیسانێ رۆژانه 20 ده‌مژمێران كاره‌با نیشتمانی بۆ وه‌لاتیان بهێته دان.
ئه‌ڤرۆ نيوز:
پشتی کو بڕیارا ھایتە دان، فیستەڤالا ھەلبەست خواندنا ئەڤ سالە یا باژێرێ (ھیت) یا سەر ب پارێزگەھا ئەنبارێ ڤە بھێتە ئەنجامدان، پێشنیاز ھاتیە کرن ھەلبەستڤانێ کورد عەدنان رێکانی د بەرنامێ وێ ڤیستەڤالێ دا بھێتە خەلاتکرن.
ھەلبەستڤانێ ناڤبری تایبەت بۆ ئەڤرۆ نیۆز راگەھاند، دلخۆشم بۆ ڤێ پێشنیازا ھاتیە کرن، زێدەباری پشکداریا د ڤیستەڤالا سالانەیا باژێرێ (ھیت) دا ل ژێریا عیراقێ، ھەلبەت ڤیستەڤالا رەوشەنبیری و ھەلبەست خواندنا سالانە یا گەرا سیێ یە دێ رێککەفتی 28 ،29 ،30/3/2019 دھێتە کرن، ئەم وەک نوونەرێن پارێزگەھا دھوکێ ھاتیە دخوازکرن، و ھەلبەستڤانەک ل پارێزگەھا سلێمانیێ و ئێک ژ خانەقین، ئانکو بتنێ سێ ھەلبەستڤانێن کورد ل سەرانسەری ھەرێما کوردستانێ دێ پشکداریێ دۆی ڤیستەڤالێ دا کەن.
ئه‌ڤرۆ نیوز:
ل دووڤ ژێده‌ره‌كێ ژ وه‌زاره‌تا دارایى یا حوكمه‌تا هه‌رێما كوردستانێ ل نێزیك دێ ده‌ست ب پله‌بلندكرنا فه‌رمانبه‌ران هێته كرن ب تنێ فه‌رمانا سه‌رۆكێ حوكمه‌تێ مایه.
ل دووڤ ژێده‌رى، پشتى كو رێڤه‌به‌ریا میلاكاتا ل وه‌زاره‌تا دارایى و ئابوورى دووماهى راپۆرتا خوه سه‌باره‌ت پله‌بلندكرنێ ئاراسته‌ى وه‌زیرێ دارایى كرى، وه‌زیرى ژى ب نڤێسار ئاراسته‌ى ئه‌نجومه‌نێ وه‌زیران كریه و بڕیاره ل ده‌مه‌كێ نێزیك ده‌ست ب پله‌بلندكرنا فه‌رمانبه‌ران بهێته كرن و ل دووڤ پێزانینان ب تنێ دێ پله‌بلندكرن ژ وان فه‌رمانبه‌ران گریت یێن پله‌یێن وان د ناڤبه‌را 6 بۆ 10 ێ دا.
وه‌زاره‌تا دارایى و ئابوورى ل دووڤ رێنمایێن ژماره 25 یا سالا 2016 ێ، هه‌موو پله‌بلندكرنه‌كا ( ته‌رفیع) فه‌رمانبه‌رێن راژا شارستانى و سه‌ربازى راگرتبوو.
ئه‌ڤرۆ نیوز، زنار تۆڤى:
دیار ته‌یب ئه‌ندامێ په‌رله‌مانێ عیراقێ ل سه‌ر فراكسیۆنا پارتى دیموكراتى كوردستان، ئه‌و ده‌نگۆیه ره‌تكرن یێن كو دبێژن حوكمه‌تا عیراقێ مووچێ فه‌رمانبه‌رێن هه‌رێمێ ناهنێریت و د دیداره‌كێ دا بۆ ئه‌ڤرۆ نیوز گۆت: ب تنێ ئه‌ڤ گۆتنه د راگه‌هاندنێ دا دهێنه به‌حسكرن و وه‌كو دى ڤان گۆتنان چو بنه‌مایێن راست و دروست نینن، هه‌روه‌سا هه‌تا نوكه حوكمه‌تا هه‌رێما كوردستانێ یا پێگیره ب وێ رێككه‌فتنا د ناڤبه‌را به‌غدا و هه‌ولێرێ دا هاتیه كرن، لێ ئاریشا سه‌ره‌كى ئه‌وه، كو هه‌تا نوكه هێشتا حوكمه‌تا نوو یا هه‌رێما كوردستانێ نه هاتیه پێكئینان، ژ پێخه‌مه‌ت بشێت رێككه‌فتنێن دروست ل گه‌ل حوكمه‌تا به‌غدا بكه‌ت و پێگیریێ ژى پێ بكه‌ت، چونكى حوكمه‌تا نوكه نه‌شێت گه‌له‌ك بریاران بده‌ت، له‌وما د نوكه دا پارتى دیموكراتى كوردستان یا له‌زێ دكه‌ت، داكو كابینا نوو یا حوكمه‌تێ بهێته پێكئینان.
زێده‌تر گۆت: هه‌كه هه‌رێم په‌ترۆلێ ژى راده‌ستى سومۆ نه‌كه‌ت، دێ هه‌ر حوكمه‌تا عیراقێ وێ پشكا هه‌رێمێ ژ مووچه‌یان ڤرێكه‌ت، یاكو د پرۆژه قانونا بوودجێ عیراقێ دا هاتیه په‌سه‌ند كرن، له‌وما ئه‌و گۆتنێن په‌رله‌مانتارا ئێكه‌تیێ گۆتین، چو بنه‌ما ژ بۆ نینه، هه‌روه‌سا پشتى هنده‌ك به‌رپرسێن پارتى گۆتین، كو هه‌كه ئێكه‌تى پشكداریێ د راستڤه‌كرنا پرۆژه قانوونا سه‌رۆكێ هه‌رێمێ دا نه‌كه‌ت، ئه‌م دێ شێین بێى ئێكه‌تیێ ژى وێ قانوونێ راستڤه‌كه‌ین، له‌وما وان ژى بزاڤكریه كو ب رێیا راگه‌هاندنێ ڤان جۆره داخویانیان بده‌ن، ژ پێخه‌مه‌ت ب رێیا جادێ فشاره‌كێ بێخیته سه‌ر پارتى، چونكى دناڤا په‌رله‌مانێ عیراقێ دا چو بابه‌تێن ب ڤى ره‌نگى نه‌هاتینه به‌حسكرن، كو دێ مووچێ فه‌رمانبه‌رێن هه‌رێمێ ژ لايێ حوكمه‌تا به‌غدا ڤه هێنه برین، هه‌روه‌سا هنارتنا مووچه‌ى ژ لايێ حوكمه‌تا عیراقێ ڤه ناهێته راگرتن.
ئه‌ڤرۆ نيوز:
وه‌زاره‌تا دارايى وئابوورى ل هه‌رێما كوردستانێ نڤيساره‌كێ ئاراسته‌ى وه‌زاره‌تان وفه‌رمانگه‌هان دكه‌ت وتێدا هوشداريێ دده‌ته وان فه‌رمانبه‌ر ومامۆستايان ئه‌وێن بووينه كه‌فيلێن وه‌لاتيان بۆ وه‌رگرتنا سولفا هه‌ڤژينيێ وداخوازێ ژێ دكه‌ت ب زووترين ده‌م كه‌فيل وان وه‌لاتيان بووينه كه‌فيلێن وان ئاگه‌هدار بكه‌ن تاكو سه‌ره‌دانا گه‌نجينان بكه‌ن ژبۆ دانا قستێ سولفێ.
ل دووڤ وێ نڤيسارا وه‌زاره‌تا دارايى وئابوورى” هه‌كه قست نهێنه دان، دێ مووچێ كه‌فيلان بۆ ده‌مێ سێ هه‌يڤان هێنه راگرتن، يان تاكو تمامبوونا پشكا قه‌رێ، هه‌يڤانه 180 هزار دينار ژ مووچێ كه‌فيلێ دێ هێته برين”.
نيشاندان