ئاریشێن ئەردی ل گەلیێ دھۆکێ و ئێتیتێ دھێنە چارەکرن
ئەڤرۆ نیوز:
پارێزگەرێ دھۆکێ د کۆمبوونەکێ دا د گەل لژنا تایبەت ب دووڤچوون و چارەکرنا ئاریشێن ئەردی ل سکرێ دھۆکێ و ئێتیتێ دیار کر کو دڤێت ل دووڤ رێیێن قانوونی و ب لەز ئەو ئاریشە بھێنە چارەکرن، دا کو ھەر کەسەک بگەھیتە مافێ خوە.
فەرھاد ئەمین ئەترووشی، پارێزگەرێ دھۆکێ دوھی ٩-١١-٢٠١٥ د گەل وێ لژنا تایبەت بۆ دووڤچوون و چارەکرنا ئاریشێن ئەردی ل سکرێ دھۆکێ و ئێتیتێ کۆمبوو، ل دەستپێکێ پارێزگەر ل سەر ئەو کارێ ھاتیە کرن و ئەو پێنگاڤێن لژنێ ھاڤێتین بۆ دیتنا چارەیێن قانوونی و گونجای بۆ چارەکرنا وان ئاریشان، پاشی گەنگەشە ل سەر ئەردێ سکرێ دھۆکێ یێ جھێ گوزاری ل سەر ھاتیە دانان و ئەو ئەردێ ئێتیتێ یێ ھەتا نوکە نەھاتیە کوژاندن ھاتە کرن.
پارێزگەرێ دھۆکێ ئەو لژنا تایبەت ڕاسپارد کو دڤێت ل دووڤ قانوونێ کار بۆ چارەکرنا وان ئاریشان بھێتە کرن و ھەر لایەک بگەھیتە مافێ خوە و گۆت: “پێدڤیە لەز کار ل سەر بھێتە کرن، ئەو ئاریشێن گرێدای ھەردو جھان ب زووترین دەم بھێنە چارەکرن”.
ھەژی گۆتنێ ب مەرەما چارەکرنا ئاریشێن گرێدای ئەردێ ل ئێتیتێ نەھاتیە کوژاندن و یێ سکرێ دھۆکێ و ب فەرمانا پارێزگەری لژنەکا تایبەت ب سەرۆکاتیا قایمقامێ دھۆکێ و ئەندامەتیا رێڤەبەریێن پەیوەندیدار ھاتبوو پێکئینان، ھەتا نوکە کارەکێ باش ھاتیە کرن و بەلگێن پێدڤی بۆ چارەکرنا وان ئاریشان ھاتینە کومکرن.
