ئاستێ تێگەهشتنێ ب باوەرنامەیێ ناهێتە پیڤان
سولین کەریم چولى
د جڤاکی دا گەلەک جاران ئاستێ تێگەهشتن و سەرکەفتنا تاکەکەسی ب باوەرنامەیان ڤە گرێددەن، بتایبەتی ژی یێن ئافرەتان، هەرچەندە هەتا ڕادەیەکێ ئەڤ چەندە دبیت ڕاست بیت بەلێ نابیتە پیڤەرەک بو دیارکرنا ئاستێ تێگەهشتنێ، ژبەرکو هندەک کەس هەنە خودان باوەرنامەیێن بلندن، بەلێ ئاستێ تێگەهشتن و بەرفرەهیا هزرێن وان د ئەو پەڕی کێمیێ دایە.
ئەگەرێ ڤێ چەندێ ژی ئەوە کو ژینگەهـ و پەروەردە هزرێن زارۆکی ئاڤا دکەن، چونکی زارۆک هزر و دیتنا ئەو ژینگەها دناڤدا مەزن دبیت، وەکی دایک و بابێن خۆ، هەڤالێن خۆ، ماموستایێن خو وەردگریت و ل دووڤ ژیێ خو لسەر ئەوان هزر و دیتنان کەسایەتیا خو ئاڤا دکەن.
ئاڤاکرنا ئاستێ تێگەهشتنا تە ل دووڤ حەز و خولیا و کریارێن تە دمینیت، بو نمونە خواندنا پەرتوکێن جوراو جور، وێنەکێشان، ژەنینا ئامێرێن موزیکێ، پشکداریکرن د خول و سیمینارێن پێشخستنا کەسایەتیێ دا و سەحکرنا بابەتێن ب مفا. دیسان ژی ئەڤ چەندە بو ژینگەها تە یا زارۆکینی و تێگەهشتن و پشتەڤانیا دەیبابێن تە ڤە دگەڕیتەڤە.
بەلێ ئەڤە وێ چەندی ناگەهینیت کو ئاڤاکرنا کەسایەتیا مرۆڤی هەتا ژیەکێ دەستنیشانکریە و ل دووڤدا مەژیێ مە ناهێتە گوهوڕین و هزرێن مە بەرفرەهتر لێ ناهێن، بەروڤاژی مەژیێ مە بەردەوام د فێربونێ دایە و ئەم بەردەوام دشێین ئاستێ زانین و تێگەهشتنا خو بەرفرەهتر لێ بکەین و کەسایەتیەکا بهێز ئاڤا بکەین بێی خواندنا هیچ باوەرنامەیەکێ.
ئەگەر وەکی دایکەک د شیانێن تە دا نەبویە هەتا نها خواندنا خۆ ب دووماهیک بینی و باوەرنامەیا زانکویێ یان پەیمانگەهێ ب دەستخوڤە بینی، ڕێکێ نەدە ئەڤ چەندە ڕێگریێ ل پێشڤەبرن و ئاڤاکرنا کەسایەتی و تێگەهشتنا تە بکەت، ژبەرکو تو دشێی خو ئاڤا بکەی و تە کەسایەتیەکا بهێز هەبیت و کەسەکا تێگەهشتی بی بێی هەبونا هیچ باوەرنامەیەکێ. ل ئەڤی سەردەمی و نفشێ نها پێدڤی ب دایکێن تێگەهشتی و بهێز و هشیار هەیە، دایکەک وەها کو پێزانین لسەر پتریا بابەتان هەبیت، د هەست و پێدڤیێن دەروونی یێن خو و زارۆکێن خو بگەهیت، و پشتەڤانیا خەون و هیڤیێن زارۆکێن خو بکەت کو دبیت گەلەک ژ یێن وێ جیاوازتر بن.
گەلەک گرنگە دگەل پێشڤەبرن و بلندکرنا ئاستێ خو، بو زارۆکێ خو ژی ژینگەهەکا هاندەر و پشتەڤان ل گورەی پێدڤی و گوهوڕینێن سەردەمی بەرهەڤ بکەی کو د پاشەڕوژێ دا ببیتە کەسەکێ تێگەهشتی و هزر بەرفرەهـ بێی هەبونا هەر باوەرنامەیەکێ.
گەهشتن ب ئاستەکێ بلند ژ بو پەروەردەکرنا نفشەکێ تێگەهشتی و ل دووڤ سەردەمی دەم و نیەتەکا ژدل پێ دڤێت.
یا گرنگە ئەم بزانین ئەم مروڤین و نەشێین کامل بین ئانکو دێ توشی بێزاریێ و شکەستن و پەشیمان بونێ بین، بەلێ پێدڤیە نەهێلین ئەڤ چەندە کارتێکرنێ ل مە بکەت و دەستا نەداهێلین. گەشتا سەرکەفتن و پێشڤەچونێ یا بەردەوامە و دەم پێدڤێت، دڤێت شانازیێ ب هەر پێنگاڤ و دەستکەفتەکا خۆ بکەین خو ئەگەر یا بچووک ژی بیت.
