تێکـدانا وێنەیـێ خێزانـێ د مـەژیێ زارۆکـی دا
سولین کەریم چولی
خێزان ئانکو ئارامی، حەژێکرن و باوەری بو هەر تاکەکێ، بتایبەتی بو زارۆکان، ئەو پێناسەیا مەزن ددەنە خێزانێ و ئەو شێوازێ پەیوەندیێن خێزانی پێ دپارێزن، راستەوخۆ کارتێکرنێ دکەنە سەر هزر و دیتنا زارۆکێن مە بۆ رامانا پەیڤا خێزان و چاوانیا سەرەدەریکرنێ دگەل ئەندامێن وێ.
پاراستنا پەیوەندیێن خێزانی یێن ساخلەم لایەنەکێ هەرە گرنگە بو ئاڤاکرنا زارۆکەکێ دەروون ساخلەم. ژبەرهندێ، پێدڤییە زارۆک ژ ناکۆکی و کێشەیێن خێزانی بهێنە دویرخستن، و ب چو ڕەنگان ب خرابی بەحسێ ئەندامێن خێزانێ ل دەف وان نەهێتە کرن؛ داکو زارۆک نەبنە ئامرازەک بۆ تۆلڤەکرنێ یان درێژەپێدانا دوژمنداریێ.
مخابن، ئەڤ دیاردەیە ل دەف گەلەک دایکان و جاران بابان ژی دهێتە دیتن، ب تایبەتی دەمێ بابەت (مەت) بیت، بکارئینانا ناڤێن نەگونجایی و پێناسەیەکا کرێت بۆ مەتان ل دەف زارۆکان بکاردئینن، ب مەرەما کرێتکرنا وێنەیێ مەتێ لبەر چاڤێن زارۆکی، هەتا وی ڕادەی کو دایک وێنەیێ ماران نیشا زارۆکێ خو ددەت و دبێژیتێ ئەڤە مەتێت تەنە!.
ئەڤ پێناسەیا کێم بها بو مەتان، و گەلەک جاران بو خالەتان ژی، هەر د کەڤندا هەبوو، و مخابن هەتا نوکە ژی یا بەردەوامە. کو وەک کەسێن تێکدەر، دووڕی، حەسوود، و ب چەندین ناڤێن دی دهێنە ناڤکرن. ئەڤ چەندە هەتا چ ڕادە یا ڕاست بیت، یا گرنگە نەبنە پشکەک ژ بەلاڤکرن و چاندنا ئەڤان هزران. ژبەرکو زارۆک د سیاسەتا خێزانێ و ناکوکیێن وێ ناگەهیت، و بناڤکرنا ئەندامێن خێزانێ ب ناڤێن نەشیاو، وێنە و بهایێ راستەقینە یێ خێزانێ لبەر چاڤ و هزرێن زارۆکی تێکددەت و هەستێ پشتەڤانی و حەزژێکرنا خێزانی ژ دەست ددەت.
هەروەسا ب بۆرینا دەمی، ئەڤ رەفتارە کارتێکرنێ دکەنە سەر ئاڤاکرنا پەیوەندیەکا ساخلەم و ب باوەر د ناڤبەرا زارۆکی و ئەندامێن خێزانێ دا، و دروستکرنا پەیوەندیێن جڤاکی د پاشەرۆژێ دا.
گەلەک گرنگە زارۆک بخۆ د پرۆسێسا گەشەپێدانا پەیوەندیێن خێزانی دا دەرباز ببیت؛ دا کو بێ ترس و گەف، حەزژێکرن و ڤیانا خۆ بۆ ئەندامێن خێزانێ دیار بکەت. ب بۆرینا دەمی و ب هاریکاریا مە، زارۆک دێ شێت بخۆ بڕیارێ ل سەر بەردەوامیا پەیوەندیان یان باشی و خرابیا کەسان دەت.
پێدڤییە ل سەر مە وەک دایک و باب، ئەم ب ڕێزڤە بەحسێ ئەندامێن خێزانا خۆ ل بەرامبەر زارۆکێن خۆ بکەین و وان ژ ئالۆزی و پێکدادانێن خێزانی بپارێزین. هەروەسا، ئەرکێ مە یێ سەرەکی ئەوە کو زارۆکێن خۆ ل سەر بنەمایێ حەژێکرن، ڕێزگرتن و نیاسینا گرنگیا خێزانێ پەروەردە بکەین.
