ئافرێنەر د سەردەمێ AI دا
شەمال ئاکرەیی
د سەردەمەکێ دا کو ژیرییا چێکری دشێت د چەند چرکەیان دا تێکستان ل سەر هەر بابەتەکێ د هزرا کەسەکی دا هەبیت بەرهەم بینیت (هەلبەت ئەڤ چەندە ل سەر لایەنێن دی یێن بەهرەداریێ و ئەفراندنێ ژی یێ دروستە). ئەڤ رەوشا ژیرییا چێکری چێکری، پرسیارەکا گەوهەری دئازرینیت کو یا بوویە سەرپشکا پرسیاران ل سەر ئاستێ هەمی جیهانێ: ئەرێ چارەنڤیسێ داهێنان و ئەفراندنا مرۆڤی دێ چ بیت؟ بەرسڤا ڤێ پرسیارێ د رەسەنایەتییا پەیڤێ ب خۆ دا رۆهن دبیت. نڤیسەرێن کو بەری پەیدابوونا ژیرییا چێکری ب خامە و خەیالێن خۆ جیهانا ئەدەبی دئافراندن، خودان بەهرەیەکا کوور و سروشتی بوون؛ دێ هەر مینن ستوونێن سەرەکی یێن کۆلتووری، و چ ئاویز یان ئەلگۆریتم و AI نەشێن جهێ وان بگرن. دیسان هەر بەهرەدارەکێ ل پشتی پەیدابوونا AI ئەفراندنێ بکەت دێ شێت جهێ خۆ بکەت.
ئەو نڤیسەرێن بەری شۆرەشا تەکنۆلۆژیایێ، بەرهەمێن خۆ ژ ناخێ ئێش، هیڤی و ئەزموونێن ڕاست و دروست یێن ژیانێ دادرێژتن، داهێنانا وان نە ژ ئەنجامێ تێکهەلکرنا داتایێن پێشوەخت بوو، بەلکو ژ ئەنجامێ هەستەکێ مرۆڤایەتی یێ زیندی بوو. دەمێ نڤیسەرەکێ بەهرەدار رێزەکێ یان تێکستەکێ دنڤیسیت، ئەو نە ب تنێ پەیڤان رێز دکەت، بەلکو پشکەک ژ روح و هوشمەندییا خۆ ددەتە تێکستی. ئەڤەیە یا کو ژیرییا چێکری نەشێت چ جاران بکەت؛ چونکی ئەڤ تەکنۆلۆژیایە چەند یا پێشکەفتی بیت ژی، ب تنێ یاسایێن زمانەڤانی و زانیارییێن بەرهەڤکری کۆم دکەت، بەلێ یا بێبەهرە ژ سۆز و رەوشێن دەروونی یێن مرۆڤی.
بەهرە و ئەفراندن نە تشتێن پڕوگرامکری نینە، بەلێ تێهزرینەکا کوورن ژ ناخێ مرۆڤی درژیێن و دکەڤنە سەر بەرپەڕی یان ب رێکا کیبۆردی دهێنە نڤیسین.
نڤیسەرێ ئەفرێنەر دێ هەر مینیت خودانێ پێگەهێ خۆ يێ جودا؛ چونکی تێکستا وی خودان مۆرکا وی یە و دبیتە ناسنامەیا نڤیسەری. نڤیسەرێ بەهرەدار دزانیت چەوا دەردێ جڤاکی، دیمەنەکێ سروشتی، یان کەسەرا کۆچبەرەکێ ل بەر بارانێ د قالبێ پەیڤێن کاریگەر دەرببڕیت. ئەڤ جیاوازییا مەزن دێ وەکەت کو ئەدەبیاتا ڕاست ل پاشەرۆژێ، پتر بهێتە نرخاندن.
ل دووماهییێ، ژیرییا چێکری دشێت ببیتە ئامرازەک بۆ کۆمکرنا زانیارییان یان ڕێکخستنا کاران، بەلێ چ جاران نابیتە خودانێ خەیالێ. نڤیسەرێن رەسەن، ئەوێن بنیاتێ هزر و فەلسەفێ داناین، دێ هەر وەک ژێدەرێن زەلال یێن سرۆش و ئیلهامێ مینن. ئەفراندن تاجەکا زێڕینە یا ل سەر سەرێ بەهرەداران و ئەڤ تاجه د چ سەردەمان دا رەنگێ خۆ یێ زەر بەرزە ناکەت.
