ئايفۆنێن خۆ ئابدهيت بكهن
کۆمپانیایا ئەپل سیستەمێ کارپێکرنێ iOS 26.6 بەلاڤکر، کو رێ ددەتە بکارهێنەران نووکرنێن ئەمنی و چارەسەریێن پێدڤی بۆ بکارئینانا رۆژانە دابەزینن. مالپەرێ (9to5Mac) یێ نووچەیێن تەکنیکی دیار کر کو ئەڤ بەرنامە پتر ژ 75 کێماسیێن ئەمنی د ئامیرێن ئایفۆنێ دا چارەسەر دکەت، د دەمەکێ دا راپۆرت ب هوێری ئاماژێ ب “78 کێماسیێن ئەمنی ددەت کو گرێدای 87 ژمارەیێن CVE یێن تایبەتن”.
سەرەرای وێ چەندێ کو چو ژ ڤان کێماسیان ب شێوەیەکێ کرداری نەهاتینە بکارئینان، لێ ژێدەرێ ناڤبری ئاشکرا دکەت کو بەرنامێ (MediaRemote) رەنگە دەسهەلاتێن کارگێڕی (Admin) ب دەست ڤە بینیت، و (Cloud Attestation) رەنگە رێ بدەتە بەرنامەیەکێ خرابکار یاسایێن ئیمزاکرنا کۆدان ببەزینیت. هەروەسا کێماسیەک د (ImageIO) دا رەنگە ببیتە ئەگەرێ بجهئینانا کۆدێن نەدیار دەمێ سەرەدەری دگەل وێنەیەکێ دەستکاری لێ هاتیە کرن دهێتە کرن، و بەرنامێ (AVC Video Encoder) رەنگە کۆدێن نەدیار ب دەسهەلاتێن ناڤۆکا سیستەمی (Kernel) بجه بینیت. زێدەباری ڤێ چەندێ، کێماسیێن د (Game Center) و (libc) دا رێ دابوو بەرنامەیێن خرابکار کو ژ ژینگەها خوە یا پاراستی دەربکەڤن، و کێشەیەک د گەهشتنا بسانەهی (Accessibility) دا هەبوو کو دبوو ئەگەرێ ئاشکراکرنا داتایێن هەستیار ب رێیا تایبەتمەندیا نیشاندانا شاشەیا ئایفۆنێ بۆ کەسەکێ کو ئامیر د دەست دا بیت، و تەنانەت کێماسیەک د بەرنامێ ناڤ و نیشانان (Contacts) دا هەبوو کو رێ ددا بەرنامەیان ناڤان زێدە بکەن بێی دەستوورا بکارهێنەری.
هەروەسا، ئەڤ نووکرنە چەندین چارەسەرییان بۆ (WebKit) ب خۆ ڤە دگریت – کو مەکینەیا ل پشت وێبگەڕێ Safari یە – دا کو رێگریێ ل مەترسیێن وەک ئاشکرابوونا بیردانکا پرۆسەیان، ئاشکرابوونا دیرۆکا گەڕیانێ ب رێیا لینکێن سەرەدانا وان هاتیە کرن، و گەهشتنا نەیاسایی بۆ فایلێن دەرڤەی ژینگەها بەرنامەی بگریت. زێدەباری ڤان، کێماسیەکا ئەمنی د سیستەمێ وای فای (Wi-Fi) دا هاتە چارەسەرکرن کو رێ ددا هێرشبەرەکێ نێزیک بیردانکا پرۆسەیان تێک بدەت.
بکارهێنەرێن ئامیرێن ئایفۆنێ دشێن نووترین نووکرنا سیستەمێ iOS ب ڤان گاڤان دابەزینن:
● ڤەکرنا (Settings) (General) (Software Update
● ئەگەر نووترین وەشان دیار بوو، پێدڤیە ل سەر (Update Now) یان (Update Tonight) کلیک بکەن دا کو ئامیرێ ئایفۆنێ یێ پاراستی بیت.
