ئاگر به‌ربوو باخچه‌كێ زارۆيان ل دهۆكێ
ئەڤرۆ نیۆز، سالار دۆسکی:
باخچێ بشکوژ یێ زارۆيان سەر ب پەروەردا دھۆک یا رۆژئاڤا ڤە، ژ ئەگەرێ شورته‌كێ کارەبێ ھاتیە سۆتن و زیانێن ماددی ل پشت خوە ھێلاینە، ل دووڤ گۆتنا رێڤەبەرا باخچەی نها نەشێن دەوامێ تێدا بکەن.
ھودا ئیبراھیم حسێن، رێڤەبەرا باخچێ بشکوژ یێ زارۆيان بۆ ئەڤرۆ نیۆز دیارکر کو شەڤا ئه‌ینی ژ ئەگەرێ شورته‌كێ کارەبێ ژوورا باخچەی ھاتیە سۆتن و چەندین زیان ب باخچەی کەفتینە و جھێن روونشتنێ و مەحفیر و گەلەک کەلوپەلێن باخچەی ھاتینە سۆتن و گۆت: “زێرەڤانێ باخچەی گەلەک بزاڤ کرینە ڤەمرینت، به‌لێ نەشیا کونترۆلێ ل سەر بکەت، نەچار بوو تیمێن بەرەڤانیا باژێرڤانیا دھۆکێ ئاگەھدار بکەت و پاشان ئاگر ھاتە کۆنترۆلکرن”.
رێڤەبەرێ باخچەی ئەو ژی ئاشکرا کر ژ ئەگەرێ ڤێ سۆتنێ زیان گەھشتیە ھەموو ژوورێن باخچەی و رەش بووینە ژ بەر دووکێلێ و گۆت: “ئەڤرۆ زارۆ نەھاتینە و نەشێين ل سەر بەرپرساتیا خوە وانا بێژين چونکو زارۆ د نازکن و بھێنەکا نەخوش کەفتیە باخچەی، ب تنێ ھولا باخچەی نە ھاتیە سۆتن”.
ھودا ئيبراهيم گۆتژى: “ژڤان بوو رۆژا دوشەمبی 24ى كانوونا ئێكێ ئاھەنگا سەرێ سالێ یا باخچەی بھێتەکرن و بەرھەڤی ھاتبوونەکرن، به‌لێ ژ بەر ڤێ روودانێ نەشێين ئاھەنگا خوە ژی بکەن”.
مەھدی سالح خالد، ژ راگەھاندنا بەرەڤانیا باژێری بۆ ئەڤرۆ نیۆز نووچە پشست راستکر، دیارکر کو ژ ئەگەرێ لێکدانەکا کارەبێ ئاگر بەربوویە باغچێ بشکوژ یێ زارۆکان و چەندین کەل و پەلێن رونشتنێ وەک مەحفیر و سەلاجە و قەنەپە و مێزە ھاتینە سوتن و زیان گەلەک گەھشتیە باغچەی.
مەھدی ئەو ژی ئاشکراکر کو بنگەھێ نزاری یێ ئاگر ڤەمراندنێ ھەر دەم ل دەست قەستا جھێ روودانێ کربوو و کێمترین ماوە دا کونترۆل ل سەر ئاگری ھاتیەکرن، لێ نەھاتیە نڤسێسین کا بھایێ زیانێن مادی چ بووینە.
