ئه‌مریكا: ئالۆزكرنا ره‌وشا باكورێ سووریێ د به‌رژوه‌ندیا چو ئالیه‌كێ دا نینه
ئه‌ڤرۆ:
په‌یڤدارێ وه‌زاره‌تا ده‌رڤه یا ئه‌مریكا راگه‌هاند كو ئه‌و ل گه‌ل توركیا و هه‌ڤپه‌یمانێن خوه كار بۆ پاراستنا ده‌ستكه‌فتیێن ل باكورێ سووریێ دكه‌ن و ئالۆزكرنا ره‌وشا باكورێ سووریێ د به‌رژوه‌ندیا چو ئالیه‌كێ دا نینه و دڤێت توركیا ژی ئێرشی باكورێ سووریێ نه‌كه‌ت.
نید پرایس په‌یڤدارێ وه‌زاره‌تا ده‌رڤه یا ئه‌مریكا راگه‌هاند كو نها ره‌وشا باكورێ سووریێ ئارامه، شه‌رێ ل دژی تیرۆرێ ژی به‌رده‌وام دكه‌ت، هه‌كه توركیا بڤێت ده‌ست ب ئۆپه‌راسیۆنه‌كا نوو ل باكورێ سووریێ بكه‌ت ئه‌و یه‌ك دێ بیته ئه‌گه‌رێ روودانا ئالۆزیێن نوو و گۆت: (ئه‌م ل گه‌ل توركیا و هه‌ڤپه‌یمانێن خوه یێن دی پێكڤه كار بۆ پاراستنا ده‌ستكه‌فتیێن ل باكورێ سووریێ دكه‌ین، ئارامیا سووریێ ب تایبه‌تی ژی باكورێ سووریێ بۆ مه گه‌له‌ك گرنگه، هه‌كه ره‌وشا باكورێ سووریێ یا ئالۆز بیت ئه‌و یه‌ك بۆ توركیا ژی دێ ئه‌نجامێن خوه یێن خراب هه‌بن، ژ به‌ر هندێ ژی ده‌مه‌كه ئه‌م ل گه‌ل توركیا كار دكه‌ین و مه دڤێت ب جهێ ئۆپه‌راسیۆنێن سه‌ربازی ل سه‌ر هنده‌ك خالێن دی پێكڤه كار بكه‌ین).
ناڤهاتی ئه‌و یه‌ك ژی دیار كر كو هێزێن سووریا دیموكرات هه‌ڤپه‌یمانێن سه‌ره‌كی یێن ئه‌مریكا نه ل سووریێ، چونكی هه‌تا نها ژی شه‌رێ ل دژی داعشێ به‌رده‌وام دكه‌ت، داعش هێشتا ژی مه‌ترسیه‌كا گه‌له‌ك مه‌زنه، هه‌كه ئۆپه‌راسیۆنێن ل دژی داعشێ به‌رده‌وام نه‌كه‌ن دێ رێكخستنا تیرۆرستی شێت جاره‌كا دی بیته مه‌ترسی و ئه‌و یه‌ك د به‌رژه‌وه‌ندیا چو ئالیه‌كێ دا نینه، ژ به‌ر هندێ مه دڤێت توركیا ژی هه‌ست ب مه‌ترسیێن تیرۆرێ ل سه‌ر ده‌ڤه‌رێ ب گشتی بكه‌ت.
ئه‌و یه‌ك د ده‌مه‌كێ دایه كو به‌ری نها ئاژانسه‌كا رۆسیا ژی دیار كربوو كو شانده‌كێ رۆسیا ل توركیا نه و ل گه‌ل به‌رپرسێن وی وه‌لاتی ده‌ست ب دانوستاندنان دكه‌ن، رۆسیا داخواز ژ توركیا كریه كو ده‌ست ب چو ئۆپه‌راسیۆنێن سه‌ربازی ل باكورێ سووریێ نه‌كه‌ت، ل هه‌مبه‌ر دا به‌رپرسێن توركیا ژی دیار كرینه كو دڤێت رۆسیا سۆزێن خوه بجه بینیت و دڤێت هێزێن سووریا دیموكرات ٣٠ كیلومیتران ژ سنۆری دوور بكه‌ڤن.
هه‌مان ئاژانسێ ئه‌و یه‌ك ژی دیار كربوو كو رۆسیا داخواز ژ هێزێن سووریا دیموكرات كریه كو هێزێن خوه ژ منبجێ و كۆبانێ ڤه‌كێشن دا توركیا ژی ده‌ست ب چو ئۆپه‌راسیۆنان نه‌كه‌ت، لێ هه‌تا نها سه‌باره‌ت ب چۆلكرنا كۆبانێ و منبجێ هێزێن سووریا دیموكرات چو داخۆیانیه‌ك به‌لاڤ نه‌كرینه و ئه‌مریكا ژی به‌رده‌وام دیار دكه‌ت كو ئه‌و ل دژی هندێ نه توركیا ده‌ست ب چو ئۆپه‌راسیۆنان بكه‌ت.
ئه‌و یه‌ك د ده‌مه‌كێ دایه كو به‌ری دو رۆژان سه‌رۆك كۆمارێ توركیا ژی راگه‌هاند كو ئه‌و نه‌چارن سنۆرێن خوه ژ تیرۆرستان پاقژ بكه‌ن و هه‌كه ئه‌مریكا و رۆسیا سۆزێن خوه بجه نه‌ئینن وه‌كو توركیا ئه‌و دێ یا پێدڤی كه‌ن.
