ئیمزا بۆ راکرانا موەلیدان دھێنە کۆمکرن
ئەڤرۆ نيوز:
ل ناحیا دیرەلۆکێ ھژمارەکا وەلاتیان دۆرێن 300 ئیمزایان بۆ راکرنا موەلیدەکی کۆم دکەن و رێڤەبەرێ ناحیێ ژێ دبێژیت: مە ل سەر خودانێ موەلیدەی فەرز کریە کو موەلیدا خوە راکەت و دڤێت وەلاتی نەمیننە بێ کارەب.
دلدار ئیبراھیم وەک ئێک ژ نوونەرێن وان وەلاتیان بۆ ئەڤرۆ دیار کر، وان پتری 300 ئیمزایێن وەلاتیان ب مەرەما راکرنا موەلیدێ تاخی کۆم کرینە و گۆت: “ئەو موەلیدە دکەڤیتە تاخێ گولان ل دێرەلۆکێ و ھەر ھەیڤێ جارەکێ یان پتر ژ کار دکەڤیت و پتری حەفتیەکێ خەلک دمینیتە بێ کارەب، ژ بەر وێ یەکێ ژی ئەم داخوازێ ژ جھێن پەیوەندیدار دکەین کو موەلیدە بھێتە راکرن”.
ژ لایێ خوە ڤە سامی ئوشانە، رێڤەبەرێ ناحیا دێرەلۆکێ بۆ ئەڤرۆ خویا کر، بەری نوکە ھژمارەکا زۆرا وەلاتیان سەرا وان دابوو و گازندە ل سەر وی موەلیدەی ھەبوون، نوکە ژی پتری 300 ئیمزایان بۆ راکرنا وی ھاتینە کۆمکرن و گۆت: “ئەم ژی ل گەل داخوازیێن واناینە و مە دڤێت وەلاتیان کارەب ھەبیت، مە ژی داخوازیا وانا گەھاندیە جھێن پەیوەندیدار و مە ل سەر خودانێ موەلیدەی فەرز کریە کو موەلیدا خوە راکەت”.
سامی ئوشانە ئاشکرا ژی کر، نوکە کەسەکێ دی موەلیدەکا نوو ئینایە و دانایە جھێ وێ، ئێک ژی بەری نوکە ھەبوویە و کار دکر و دێ ئێکا دی یا یەدەک ژی دانیت و د ڤێ حەفتیێ دا ئەڤ ئاریشە دێ ھێتە چارەکرن.
