ئێكه‌مین كۆنفڕانسێ زانستی یێ نێڤده‌وله‌تی ل زانكۆیا زاخۆ هاته ئه‌نجامدان
زاخۆ، دلۆڤان هالۆ:
كۆلیژا كارگێری و ئابووری ل زانكۆیا زاخۆ، ئێكه‌مین كۆنفڕانسێ خوه یێ زانستی یێ نێڤده‌وله‌تی ل ژێر ناڤونیشانێ (حوكمڕانیا باش و گه‌شه‌پێدان) ئه‌نجام دا.
دكتۆر ڕه‌نج محه‌مه‌د، سه‌رۆكێ لژنا ئاماده‌كار یا كۆنفڕانسی بۆ ڕۆژناما ئه‌ڤرۆ دیار كر، ب ئاماده‌بوونا شاندێ وه‌زاره‌تا خواندنا بلند و ڤه‌كۆلینێن زانستی و دكتۆر ئامانج سه‌عید، ڕاوێژكارێ وه‌زیرێ خواندنا بلند و خانم دكتۆر ژاله سه‌عید، ڕێڤه‌به‌را گشتی یا وه‌زاره‌تا خواندنا بلند و دكتۆر نازم سلێمان، سه‌رۆكێ زانكۆیا زاخۆ و دكتۆر داود ئه‌ترووشی، سه‌رۆكێ زانكۆیا دهۆك و گۆهدار شێخۆ، سه‌رپه‌رشتێ ئیدارا سه‌ربخوه یا زاخۆ و عه‌لی عه‌ونی، ئه‌ندامێ كۆمیته‌یا ناڤه‌ندی یا پارتی دیموكراتی كوردستان و به‌رپرسێ لقێ هه‌شتێ پارتی ئێكه‌مین كۆنفڕانسێ زانستی یێ كۆلیژا كارگێری و ئابووری ل ژێر ناڤونیشانێ (حوكمڕانیا باش و گه‌شه‌پێدان) ل زانكۆیا زاخۆ هاته ئه‌نجامدان.
ناڤهاتی ئاماژه ب وێ چه‌ندێ ژی كر، د ڤی كۆنفڕانسی دا چه‌ندین په‌نه‌ل هاتنه پێشكێشكرن، دیسا پێشانگه‌هه‌كا تایبه‌ت ب دراڤان هاته ڤه‌كرن و تێدا هژماره‌كا زۆر ژ دراڤێن وه‌لاتێن جیهانێ یێن كه‌ڤن و نوو هاتنه نیشادان و گۆت: “ئه‌ڤ كۆنفڕانسه دێ بۆ ده‌مێ دو ڕۆژان یێ به‌رده‌وام بیت و ٣٢ ڤه‌كۆلینێن جۆراوجۆر ژ لایێ ڤه‌كۆله‌رێن ناڤخوه و بیانی دێ هێنه پێشكێشكرن”.
