ئەردێ یاریگەها زاخۆ یا نێڤدەولەتی، د ڕەوشەكا نەباش دایە و پێدڤی ب سەخبێركرنێ یە
ئەیاد بەرواری
ل گەل دەستپێكرنا گەشتا یانا زاخۆ د خولا ستێرێن ئیراقێ دا، چاڤەڕێ دهاتە كرن كو یارییا وێ بەرامبەر یانا (غاز الشمال) ببیتە ئاهەنگەكا وەرزشی یا ل گۆر گرنگییا روودانێ، ب تایبەت كو یارییا ئێكێ یا هەردو تیمان بوو د خولێ دا، لێ ئەوا سەرنجا مە بەرهەڤبوویان ل یاریگەهێ وهەموو بینەرێن یاریێ راكێشای، نە تنێ ئاستێ یاریزانان بوو د ناڤ یاریگەهێ دا، بەلكو رەوشا ئەردێ یاریگەها زاخۆ یا نێڤدەولەتی بوو.
كەسكاتییا یاریگەهێ ب ئاشكرا دیار بوو كو پێدڤی ب چاڤدێری و سەخبێركرنێ یە، ئەڤە ژی كارتێكرنەكا راستەوخۆ ل سەر ئاستێ یاریزانان، بزاڤا تەپێ و رەوانییا یاریكرنێ دكەت. د یاریێن خولا ستێران دا، كو هەموو تیم بزاڤێ دكەن تەپا پێی یا سەردەم و ب لەز پێشكێش بكەن، باشییا ئەردێ یاریگەهێ دبیتە پشكەكا سەرەكی ژ سەركەفتنا یاریێ، نە كو بتنێ هووركارییەكا لاوەكی بیت.
یاریگەها زاخۆ یا نێڤدەولەتی وەكی روویێ وەرزشی یێ باژێڕی دمینیت و پێشوازیێ ل جەماوەری دكەت، ئەڤ جەماوەرە ب حەژێكرنا مەزن یا تەپا پێی و پشتەڤانییا تیمێ هاتییە نیاسین، لەورا دەركەفتنا وێ یاریگەهێ ب ڤی رەنگی ل دەستپێكا وەرزی، گەلەك پرسیارێن رەوا ل دۆر ئاستێ ئامادەباشییێ بۆ وەرزێ نوو دروست دكەت، ب تایبەت كو دەستپێكا وەرزی دڤێت دەرفەتەك بیت بۆ نیشادانا یاریگەهان ب باشترین شێوە.
ل ڤێرێ، داخوازییا مە ل ڤێ دەمێ، نە ب مەرەما رەخنێ یە هند یا كو داخوازەك بیت بۆ ب لەز چاڤدێریكرنا ئەردێ یاریگەها زاخۆ و سەخبێركرنا وێ ب شێوەیەكێ دلخواز، بەری یاریێن خولێ بەردەوام ببن و هەژمارا یارییان زێدە بیت. چارەسەركرنا ڤێ ئاریشەیێ د دەمێ خۆ دا، دێ گەلەك باشتر بیت ژ چاڤەڕێكرنێ تا رەوشا ئەردێ یاریگەهێ وكەسكاتییا وێ خرابتر لێ دهێت و كارتێكرنا وێ ل سەر یارییان و یاریزانان مەزنتر دبیت.
زاخۆ هەژی یاریگەهەكێ یە كو ل گۆر ناڤێ وێ و جەماوەرێ وێ بیت، و خولا ستێرێن ئیراقێ ژی هەژی یاریگەهێن ب ڤی رەنگی نە كو هاریكارییا یاریزانان بكەن بۆ پێشكێشكرنا تەپا پێی یا باشتر، لەورا چاڤدێریكرنا ئەردێ یاریگەها زاخۆ یا نێڤدەولەتی بەرپرسیارەتییەكا گەلەك گرنگە و دڤێت ب زووترین دەم بهێتە كرن، دا ئەڤ وێنەیە د یاریێن بهێت دا دووبارە نەبیت.