ئەو خەبات مە یاكری داکو نانەكێ ب ئازادی و تەناهـی و رەحەتی بخوین
سالار محەمەد دۆسكی:
1-5
پێشمەرگەیێ شۆرشا ئیلۆنێ، تاهر تێلی سۆفی سەعدی كەمەكی دۆسكی، یێ بەرنیاس ب تاهر كەمەكی، ل سالا 1953 ل گوندێ كەمەكا ژ دایك بوویە، ژ بەر تێكچوونا ڕەوشا دەڤەرێ و سۆتنا گۆندێ خوە نەشیا بەردەوامیێ ب دەتە خواندنێ ل قوتابخانێ و قەستا گوندێ پیرۆمەرا دكەت، ل ژیەكێ بچووك چەكێ شەرەفێ هەلدگریت و دبیتە پێشمەرگە و بەردەوامیێ دەتە خەباتا خوە هەتا ئاوارەیی ئیرانێ دبیت، پاشی دهێتە نەفیكرن بۆ باشورێ ئیراقێ، گەلەك زۆلم و ستەم و نەخوشیێ دیتینە و ئەوان رۆژێن نەخوش دەرباز دكەت.
پێشمەرگەیێ شۆڕشا ئیلۆنێ تاهر كەمەكی تایبەت بۆ رۆژنامەیا ئەڤرۆ زێدەتر گۆت: ل دەسپێكا شۆڕشا ئیلۆنێ ل سالا 1961 رەوش ل دەڤەرێ بگشتی تێكچوو و گوندێ مە كەمەكا هاتە سۆتن و فڕۆكێن بەعسیان ڕەمی ل گوندی كر، و ئەم نەچار بووین ژ گوندی دەركەڤین و مە قەستا گوندێ پیرۆمەرا كر، ل دوف پێزانینێن من گوندێ كەمەكا سێ جاران هاتیە سۆتن، بیرا من دهێت وەكی خەونێ دەمێ فرۆكە ل سالا 1961 هاتینە گەلی دهۆكێ و خەلكی بخوە ساڤاردكرن و ئەو مەنجەلێن صاڤارێ ل سەر ئاگری و فرۆكا ڕەمی كر ئێك دو مرۆڤەك شەهید بوون، و چەندەك بریندار بوون و خەلكی نەدیت بوو بۆ قولیزێنا خەلكی و هەتا نوكە دهێتە بیرا من و هەر وێ رۆژێ ئێڤاری خەلكی گوند بەردان و هەر خێزانەكێ قەستا جهەكی كر.
تاهر تێلی كەمەكی هەر وەسا دیاركر: پشتی تێكچوونا پەیوەندیێن شۆڕشێ ل گەل حوكمەتا ئیراقێ ل سالا 1974ێ باژێرێ دهۆكێ هاتە بەردان و خەلكی قەستا گوندان و ئەڤراز كر، و ئەم ژی وەكی خەلكی هەمیێ ژ باژێری دەركەفتین و هەر كەسەكێ مرۆڤە هەی قەستا مالا مرۆڤێن خوە كرن، و ئەز هاتمە گوندێ كەمەكا مالا مامێ خوە و من تەماشەی كاودانێن ژیانێ كر و گەهشتمە وێ باوەریێ نەشێم بەردەوام بم ل گوندی و نەچار بووم زڤریمە مانگێشكێ دەف خودێ ژێ ڕازی (لەزگین سندرۆی) مامە ل گەل ماوەكێ درێژ وەكی پوستەچی من كار دكر، و هەر كارەكێ راسپاردبام من كر و ماوەكێ درێژ ل گەل دا بووم، و دوڤدا چەندین كەسێن دی ژی هاتنە بارەگایی دەڤ (لەزگین سندۆری) و جامێری نڤیسارەك دامە و ئەم راسپاردین بچینە (چۆمان) و ئەم نێزیكی 15 كەسا بووین، و دەمێ ئەم چووین درەنگ بوو و گەهشتینە سیارەتیكا بۆ تاری و ئەم وێ شەڤێ ماینە ل وێرێ ئوتێلەك ل وێرێ هەبوو كربوو بارەگایێ پارتی، مە نڤیسارا خوە وەرگرت و چووینە دەف (عەلی شنگالی) وی دەمی بارەگایێ وی ل (ئاشەوا) بوو، و خودێ ژێ رازیبت نڤیسارا (لەزگین سندرۆی) وەرگرت و ئەوی نڤیسارەكا دی دامە و ەكی ڤێگاڤێ یا ل بیرا من هەر ئێك ژ مە سێ دینار ژی وەك پارێ رێكێ دانە مە و ئەم كەفتینە پیا و بەرەف ئامێدیێ و بەری بچین ئەم شەڤەكێ ل قەسرا شاهێ ئیراقێ ل سەرسنگ ژی نڤستین بیرا من دهێت ئەو ژی كربوو جهێ ڤەحەواندنێ و ئەم چووین و بیرا من دهێت ل دێرەلوكێ بارەگایەك دانا بوو بۆ رێڤینگا و كەسێن هاتن وچوونێ دكەن، كو ئەگەر لێ بۆ درەنگ ب شەڤ ل وێرێ بنڤن و ئەم وێ شەڤێ ماینە وی بارەگایی و مە بهێنا خوەدا، و قوناغ قوناغ هەتا ئەم گەهشتینە (چۆمان) هەر هەمی ب پیا بوو و چوونا مە یا بترس بوو چونكە مەنەزانی كیش دەمی دێ فرۆكە هێت و رەمیێ ل تەكەت، پشتی مە نڤیسارێن خوە ڕادەستكرین و ئەم نێزیكی (20) رۆژا ماینە ل (چومان) رۆژەكێ گازی مە كر، و چەك دامە و ئەم بووینە پێشمەرگە، پشتی نڤیسارێن مە دەركەفتین پشكەكا مە نڤیسار دەركەفت كو بووینە پێشمەرگە سەر ب هێزا دهۆك ڤە، پشكەك ژی نڤیسار بۆ دەركەفت بۆ نڤێسینگەها لەشكری و ئەز ئێك ژ وانا بووم یێ هاتیەڤەگوهاستن بۆ نڤێسینگەها لەشكری، پشتی بورینا شەش هەیڤان نە من چ ژ خێزانا خوە زانی و نە ئەوا چ ژ من زانی و خێزانا من وی دەمی ل دهۆكێ بوو.
تاهر تێلی كەمەكی پێشمەرگەیێ شۆڕشا ئیلۆنێ بەحسێ ئێكەم دیتنا خوە ل گەل مەلا مستەفا بارزانی دكەت وگۆت: ئەم ل فەوجێ بووین ئەو دەم بوو وەختێ هندەكێن پێشمەرگەیێن پایە بلند چووینە ناڤ حوكمەتێ و هێشتا من خێزانا نەڤەگوهاست بوو، ژ باژێرێ دهۆكێ بۆ چۆمان و ئەم ل فەوجێ بووین، وێ شەڤێ دەمژمێر ئێكی شەڤێ بوو و فەرمان هات ئەم بچین و ئەم سواری ترۆمبێلا كرین وێ شەڤێ و ئەم ئیناینە مێرگەسورێ و رۆژ دەركەفت و ژێریا مێرگەسورێ زیارەتەكێ هەی دبێژنێ پیرەفاتێ وكانیەكا ئاڤێ ل وێرێ بوو و مە دیت سێ لەندوڤر هاتن، دو لەندروڤر دشاسی درێژ بوون و ئێكا شاسی كورت بوو، و ئێك ل بەراهیێ و ئێك ل دووماهیێ و مەلا مستەفا بارزانی ل ترۆمبێلا شاسی كورت دا بوو، نوكە ژی ئەو مایە ل دەف كورێ وی و مەلا مستەفا ل پێشییا ترۆمبێلێ دا بوو، و ئێك پشتێ دابوو و شوفێرەكێ دهاژوت و راوستیا و هەڤالەكێ مە چوو دا دەستێ وی ماچی كەت، خودێ ژێ رازی بیت نەهێلا و ئەم هەمی لێ كۆمبووین و تەماشەی مەكر، وی دەمی هەمی دانوستاندن و مووچێن مە پارێن ئیرانی بوو وی دەمی پارێ ئیرانی 50 دینار پێكڤە بوون، وەكی پارێ نوكە یێ ئیراقی و 50 دینارێن ئیرانی رادەستی مەكرن، كو بخوە بدەنە پێلاف و ئەڤە جارا ئێكێ بوو مەلا مستەفا بارزانی ببینم.
