ئەپلیكەیشنێن ڤەشارتی یێن ئینتەرنێتێ دخۆن بێی تو پێ بزانی
دهۆك، هێلین سالم:
ل دەڤەرا مە گەلەك جاران خەلك گازندان ژ وێ چەندێ دكەن كو پاكێجێن سنووردار یێن ئینتەرنێتێ، چ یێن كۆمپانیا فاستلینك بن یان ژی یێن هێلێن مۆبایلێ وەك كۆڕەك و ئاسیاسێل، ب شێوەیەكێ بێسەروبەر و ب لەز ب دووماهی دهێن. ئەو ب ڤی رەنگی هزر دكەن كو كۆمپانیایان فێل ل وان كریە، د دەمەكی دا كێشەیا سەرەكی د ناڤ مۆبایلا وان ب خۆ دایە. هندەك بەرنامە و رێساێن ڤەشارتی د سیستەمێ مۆبایلێ دا هەین كو ب شەڤ و رۆژ ئینتەرنێتێ دمەزێخن، بێی كو خودانێ مۆبایلێ چ نیشانان ل سەر شاشێ ببینیت.
بۆ هندێ تو ژ ڤێ مەزاختنا زێدە رزگار ببی، پێدڤییە ئەڤان پێزانین و ئامۆژگاریێن تەكنەلۆژی د ژیانا خۆ یا رۆژانە دا بكار بینی:
١- راوەستاندنا نووكرنێ ل پشت شاشێ (Background App Refresh)
ئەڤە مەزنترین دزێ ئینتەرنێتێ یە. گەلەك بەرنامە (وەك فەیسبووك، ئینستاگرام و تیكتۆك) دەمێ تو وان دگری ژی، ئەو ل پشت شاشێ بەردەوام د گەڕیانێ دانە دا كو پێزانینێن نوو بۆ تە بەرهەڤ بكەن.
چارەسەری:
دێ چیە ناڤ رێكخستنێن مۆبایلێ (Settings) -> گشتی (General) -> پاشان (Background App Refresh) و ڤێ تایبەتمەندیێ ب گشتی بگرە (Off) یان بتنێ بۆ وایفایێ (Wi-Fi) چالاك بكە.
٢- كاركرنا ئۆتۆماتیكی یا ڤیدیۆیان د ناڤ سۆشیال میدیایێ دا
دەمێ تو د ناڤ فەیسبووك یان ئینستاگرامێ دا دگەڕی، ڤیدیۆ ب شێوەیەكێ ئۆتۆماتیكی كاردكەن بێی كو تو كلیكێ ل سەر بكەی. ئەڤ چەندە د چەند خولەكان دا دشێت سەدان مێگابایتێن ئینتەرنێتێ ژ پاكێجا تە ببەت.
چارەسەری:
بچۆ ناڤ رێكخستنێن ناڤخۆیی یێن پڕۆفایلێ خۆ یێ فەیسبووك و ئینستاگرامێ، ل بەشێ (Media) بژاردا (Never Autoplay Videos) چالاك بكە دا كو چ ڤیدیۆ لێ نەدەن هەتا تو ب خۆ داخوازیێ نەكەی.
٣- پشتەڤانییا ئۆتۆماتیكی یا وێنە و ڤیدیۆیان (Cloud Backup)
بەرنامەیێن وەك (Google Photos) یان (iCloud) ب شێوەیەكێ ڤەشارتی هەمی ئەو وێنە و ڤیدیۆیێن د ناڤ مۆبایلا تە دا دهێنە كێشان، ئێكسەر رەوانەی سەر ئینتەرنێتێ دكەن دا كو كۆپیەكێ بپارێزن. ئەگەر ئەڤە ل سەر هێلا مۆبایلا تە (Mobile Data) چالاك بیت، دێ پاكێجا تە ب بلەزی ب دووماهی ئینیت.
چارەسەری:
د ناڤ رێكخستنێن ڤان بەرنامەیان دا، پشتڕاست بە كو بژاردا (Use Cellular Data) یا گرتی بیت، دا كو بتنێ دەمێ مۆبایلا تە گەهشتە سەر وایفایا مالێ دەست ب هنارتنا وێنەیان بكەت.
٤- چەوا دزێ سەرەكی د ناڤ مۆبایلا خۆ دا ئاشكرا بكەین؟
سیستەمێ مۆبایلێ داهێنانەكێ باش یا تێدا كری كو راپۆرتەكا روون ددەتە تە كا كیش بەرنامەی پتر ئینتەرنێتا تە مەزاختییە.
چارەسەری:
د ناڤ رێكخستنان (Settings) دا، بەشێ (Cellular یان Mobile Data) هەلبژێره. ل خوارێ دێ لیستەكێ بینی كو ناڤێ هەمی بەرنامەیان تێدا هەیە و ل تەنشت هەر ئێكێ یێ نڤیسی كا چەند مێگابایت یان گیگابایت مەزاختینە. هەر بەرنامەكێ تە پێدڤی پێ نەبوو، تو دشێی هێلا ئینتەرنێتێ ل سەر بگری.
