بسپۆرەکێ قانوونی: ل دووڤ دستوورى مافێ كوردان د ناڤ ده‌زگه‌هێن له‌شكرى دا 17% یە
ئەڤرۆ نيوز:
بسپۆرێ قانوونی حامد نازم خورشید بۆ رۆژناما ئەڤرۆ راگەھاند، وەکی مە گوھلێ دبیت و دزانین رۆژانە ب تایبەتی پشتی ئەنجامدانا ریفراندۆما قانوونی ژ ئالیێ وەلاتیێن ھەرێما کوردستانێ ڤە، و پشتی 16 ئۆکتۆبەرێ، بەرپرسێن حوکمی و حزبی ل حوکمەتا بەغدا، بەحسێ بجھئینانا دستووری ژ ئالیێ ھەرێما کوردستانێ ڤە دکەن، و براستی کریار بەروڤاژی وان گۆتنا ئەو دستوور ل بەغدا ھاتیە پێشێلکرن.
حامد نازم خورشید گۆت: ل بەندێ مادێ (4) یێ دستوورێ عیراقێ ھاتیە ( زمانێ فەرمیێ دەولەتا عیراقێ زمانێ عەرەبی و کوردیە، بەلێ پشتی 13 سالان ھەتا نوکە ژی زمانێ کوردی ل سەر ناسنامە و رەگەزنامێن عیراقێ نەھاتینە نڤیسین، ل قوتابخانێن دەرڤەیی ھەرێما کوردستانێ کوردی ناھێتە خواندن، ئەڤە ژی پێشێلکرنا دستووری یە، ھەروەسا ل بەندێ (9) یێ دستووری برگا (1) ھاتیە، ھێزێن چەکدار و ھێزێن پاراستن و ئاسایشێ ژ ھەموو ھێز و پێکاھتێن عیراقێ و نەتەوان و ل دووڤ رێژەکا یەکسانی دڤێت بھێتە پێکئینان ، ئەگەر ل دووڤ قانوونێ بیت دڤێت رێژا کوردان دناڤا ھێز و لەشکرێ عیراقێ ( 17%) بیت، بەلێ وەکو یا دیار ھەتا نوکە نەگەھشتیە (5%) ژی، پشکا عەرەبێن سوونە ژ لەشکرێ عیراقێ (23%) بیت، بەلێ ئەو ژی نەگەھشتیە (8%) بەھرا وانانا، یێن دیتر ھەموو شیعە مەزھەبن.
مامۆستایێ بسپۆر ھەروەسا گۆت: زێدەباری وێ چەندێ ددستووری دا ھاتیە، نابیت ھێزا لەشکری بۆ مەرەمێن سیاسی و ناڤخوەیی بھێنە بکارئینان، بەلێ عیراقێ ئەو دستوور پێشلێکریە و ل 16 و 20 ئۆکتۆبەرێ سالا 2017 ئەو ھێز دژی کوردان و پێشمەرگێ ھەرێما کوردستانێ ھاتە بکارئینان و داگیرکرنا کەرکووک و شەرێ پردێ و سحێلا یێ رووھن و ئاشکرایە.
حامد نازم دووپاتکر، سەرەرای وێ چەندێ خالا ھەرە گرنگ دناڤا دستوورێ عیراقێ بەندێ مادێ (140) کو تێدا ھایتە، پێدڤیە ل سەر حوکمەتا عیراقێ ھەموو ئەو عەرەبێن ل دەڤەرێن ل جھێن وانا ھاتینە ڤەگوھاستن بۆ دەڤەرێن کوردی، بزڤنە جھێن خوەیێن بەرێ، پاشی دڤێت سەرژمێریاریەک بھێتە ئەنجامدان و پاشی ریفراندۆم بھێتە ئەنجامدان، ل پارێزگەھا کەرکووک و ھەمی دەڤەرێن ناکوکی ل سەر ھەی کو ب داخوازیا وەلاتیێن رەسەن ل وان دەڤەران ئەو کێشە بھێنە چارەکرن، ل گۆڕ داخوازیا وەلاتیان کا وانا دڤێت ڤەگەرن سەر ھەرێما کوردستانێ یان ژی ل گەل عیراقێ بمینن.
