بهایێ هزار تابلۆیێن ئێكێ یێن هژمارێن ترومبێلان ل هه‌له‌بجه بزانه!
ئه‌ڤرۆ نیوز:
رێڤه‌به‌رێ هاتنوچوونا پارێزگه‌ها هه‌له‌بجه چاوانیا فرۆشتنا هژمارێن نایاب یێن تابلۆیێن عیراق – هه‌له‌بجه ئاشكراكر.
عه‌مید حه‌سه‌ن عه‌بدوڵا، رێڤه‌به‌رێ هاتنوچوونا پارێزگه‌ها هه‌له‌بجه ل دۆر پارێ هژمارێن نایاب یێن تابلۆیێن (عیراق – هه‌له‌بجه) راگه‌هاند” پارێ وان تابلۆیان 100% بۆ پێشڤه‌برنا پارێزگه‌ها هه‌له‌بجه‌یه ودێ د سه‌ر ئێك زێده‌كرنه‌كا أشكرا دا هێنه فرۆتن”.
ناڤبرى زێده‌تر بۆ رادیوا ( ترافیك ئێف ئێم) یا سلێمانیێ گۆت ژى” رێژا 20% ژ وى پاره‌ى دێ بۆ رێڤه‌به‌ریا هاتنوچوونا هه‌له‌بجه بیت، بۆ نموونه دابینكرنا تابلۆى وهێمایێن هاتنوچوونێ ومه‌زاختنێ بۆ ئاڤاهیێ هاتنووچونا هه‌له‌بجه‌یه”.
دیاركر” ل ده‌ستپێكا هه‌یڤا داهاتى دێ ده‌ست ب زێده‌كرنا ئاشكرا بۆ فرۆتنا تابلۆیان هێته كرن”.
دیسا گۆت” بهایێ تابلۆیێ هژمار (1) یێ (عیراق – هه‌له‌بجه) ئێك ملیار دیناره وبهایێ تابلۆیێن هژمار (2) هه‌تا هژمار (9) دێ 600 ملیۆن دینار بن بۆ هه‌ر تابلۆیه‌كى، هه‌روه‌سا بهایێ تابلۆیێن هژمار (10) هه‌تا هژمار (99) دێ 300 ملیۆن دینار بن بۆ هه‌ر تابلۆیه‌كى، تابلۆیێن هژمار (100) هه‌تا هژمار (999) دێ بۆ هه‌ر تابلۆیه‌كى 200 ملیۆن دینار بن.وتابلۆیێ هژمار (1000) دێ بهایێ وى 180 ملیۆن دینار بن، هه‌روه‌سا تابلۆیێ هژمار (1988) كو ئاماژه‌یه بۆ سالا كیمیابارانكرنا هه‌له‌بجه دێ بهایێ وى 600 ملۆن دینار بیت”.
