دھۆکێ 60 مێگاواتێن کارەبێ ژ رێڤەبەریێن میری بڕین
ئەڤرۆ نیوز:
پشتی کو رێڤەبەرێ گشتیێ کارەبا پارێزگەھا دھۆکێ داخوازکری رەوشا کارەبێ بۆ ئەنجەمەنێ پارێزگەھا دھۆکێ شرۆڤە بکەت، دوھی 20/1/2016 دگەل ستافێ رێڤەبەریا گشتی ل ئەنجومەنی بەرھەڤ بوو و د روونشتنا ئەنجومەنی یا ژمارە 61 دا رەوشا کارەبێ شرۆڤە کر و گەنگەشە ژ ئالیێ ئەندامان ڤە ھاتە کرن، پشتی ھینگێ پرێس کۆنفرانسەک ھاتە ل دارخستن، کو تێدا رێڤەبەرێ گشتیێ کارەبێ ئەگەر و چارەسەری بەرچاڤ کرن.
ل دەستپێکێ فەھیم عەبدولا حەمۆ سەرۆکێ ئەنجومەنێ پارێزگەھا دھۆکێ دیار کر کو کارەب ئێکە ژ کەرتێن سەرەکیێن خزمەتگوزاریان، ئەڤ کەرتێ گرنگێ ژیانێ راستی گەلەک ئالۆزیان بوویە، لەورا گەلەک پرسیار ل جەم خەلکەکی پەیدا کرن، بۆچی دەمژمێرێن کارەبێ کێم بووینە و بەرھەمێ کارەبێ کێم بوویە یان زێدە بوویە؟ ژ بۆ بەرسڤدانا پرسیارێن ئەندامێن ئەنجومەنی کو نوونەرێن خەلکینە ب رێڤەبەرێ گشتیێ کارەبا دھۆکێ دەستپێشخەر بوویە یا کو بھێت رەوشا کارەبێ ل سەرانسەری پارێزگەھا دھۆکێ شرۆڤە بکەت و گۆت بۆ مە ھاتە دیارکرن کو نەبوونا سۆتەمنیێ ئانکو گازا سپی، چونکی ھەکە یا زێدەبایە دا ببیتە بارسڤکیەک بۆ کەرتێ کارەبێ و بێگومان دا دەمژمێرێن کارەبێ دا زێدەتر بن ھەروەسا گرتنا دەرگەھێن سنووریێن کوردستانێ چ بسەدەما بوویەرێن سروشتی مینا بەفربارینێ بیت و چ بسەدەما رەوشا سیاسی یا دەڤەرێن ئالیێ دن یێ سنووری بیت.
سەرۆکێ ئەنجومەنی گۆت ژی سالا بۆری ئەم کەفتینە د رەوشەکا زێدە خراب دا چونکی ھەکە مرۆڤ ھزرا سالێن 2013 و 2014 بکەت کو خەرجی یان بودجا رێڤەبەریەکا گشتی 235 ملیار دینار بوون و نھا بوویە کێمتر ژ پێنج ملیار دیناران ئەڤجا ھزر بکەن چەند جوداھیەکا مەزن کەفتیێ، نەمازە و دەمی بارگرانیا ئاواران و بەروکێن شەڕی ژی ل سەر نەبوو، لێ نھا ب ڤی بودجا کێم ڤە ئەو ژی ھاتینە سەر.
ئەندازیار کەمال محەمەد رێڤەبەرێ گشتیێ کارەبا پارێزگەھا دھۆکێ د بەرسڤا پرسیارەکێ دا کابۆچی داخواز کریە بەرھەڤی ئەنجومەنێ پارێزگەھا دھۆکێ بیت و دێ شێن ب رێیا ئەنجومەنی چ کەن؟ دیار کر کو خەلکەک ھەست دکەت کارەب کێمتر لێھاتیە وان ژی ڤیا ئەگەرێن ئالۆزیا رەوشا کارەبێ بۆ ئەنجومەنێ پارێزگەھا دھۆکێ وەکو نوونەرێن خەلکی دیار بکەن و گۆت چونکی دەمێ خەلک بزانیت رەوشا ھەر کەرتەکی دیێ باشتر رەفتارێ کەن، بەلکو ئەڤە پێنگاڤا ئێکێ یە و چەندین پێنگاڤێن دی ژی مە ھاڤێتینە بۆ نموونە ئەم دگەل ئێکەتیا زانایێن ئیسلامی کۆم بووینە و ب سوپاسی ڤە پتریا خوتبەخوینان ل سەر مینبەران خەلکێ مە ھایدار کریە کو ئابوورێ د کارەبێ دا بکەن ھەروەسا ل گەل زانکۆ و رێکخراوێن نەحکوومی ژی ئەڤ ھەوە دێ یا بەردەوام بیت.
د بەرسڤا پرسیارەکێ دا ئەرێ رەوشا کارەبێ د ئەڤ سالە دا (2016) دێ ھوسا یا بەردەوام بیت رێڤەبەرێ کارەبێ گۆت لااوازیا کارەبێ گەلەک ئەگەر ھەنە، ژ وانا نەبوونا سۆتەمەنیێ و نەدانا گازا سپی بۆ وەلاتیان، ھەبوونا ژمارا زۆرا ئاواران کو نھا زێدەتر ژ 820 ھزار ئاوارە ل دھۆکێ نە، ب ئاوایەکی 115 میگاواتێن کارەبێ بۆ ئاواران دھێنە دان و 105 میگاوات بۆ بەروکێن شەڕی دچیت بگرە ژ سنوونێ ھەتا خازری، ل ھەمان دەمی وەلاتی ژی ئابوورێ د مەزاختنا کارەبێ دا ناکەن و گۆت لەورا میگاوات زێدەبووینە و دەمژمێر کێم بووینە، بۆ نموونە ل ھەیڤا یازدە ژ سالا بۆری 568 میگاواتێن کارەبێ ھەبوون و مە پتر ژ 18 دەمژمێران کارەب ددا وەلاتیان، لێ نھا 620 میگاواتن ئەم 12 دەمژمێران کارەبێ ددەینە وەلاتیان ئەڤە وێ ئێکێ دیار دکەت کو میگا زێدەبووینە، لێ چونکی مەزاختن زێدەتر بوویە، لەورا دەمژمێرێن کارەبێ کێم بووینە.
رێڤەبەرێ گشتیێ کارەبا پارێزگەھا دھۆکێ ئاشکرا کر کو 60 میگاواتێن کارەبێ ژ دامودەزگەھێن میری بڕینە و د ڤان 18 رۆژێن بۆری دا 12 دەمژمێران کارەب دایە خەلکی و گۆت 294 پشکدار مە ل پارێزگەھا دھۆکێ ھەنە، ھەکە ھەر پشکدارەک گلۆپەکا زێدە ڤەمرینت ئەم دێ شێین 294 ھزار گلۆپان بدەینە بەروکێن شەڕی و ئاواران.
