بیركرنه‌ك (به‌رته‌نگ).. كى دێ (قه‌ره‌بۆیا) زاخۆ كه‌ت؟!
كۆڤان حسێن
قه‌ت باوه‌ر ناكم ئه‌و گوله تۆپێن ب سه‌یرانگه‌ها (په‌ره‌خێ) كه‌فتین زانیبیت كا ناسناما رێڤنگ و سه‌یرانێن وێ كینه، ڤێ جارێ ژ نشكه‌كێ ڤه خه‌لكێ زاخۆ ژ كۆمه‌لكۆژیه‌كا كوره رزگار بوون. هه‌ر چه‌نده ئه‌وێن بووین قوربانى ژى كه‌سێن مه و مرۆڤێن مه‌نه ب حوكمێ مرۆڤاتى و هه‌ڤوه‌لاتیبوونێ، لێ پرس نه ئه‌ڤه‌یه، چونكو گه‌له‌گا ل سه‌ر ڤێ چه‌ندێ هاتى گوتن، سه‌ده‌مێن وێ دیارن و ئه‌ڤه ئه‌نجامێ ئالۆزیه‌كا كه‌ڤنا بێ چاره‌سه‌رییه بۆ 40 سالان ڤه دگه‌ریێت,لێ یا بۆ زاخۆ گرنگ ئه‌ڤه ل سه‌ر و به‌ندێ شه‌ڕێ ناڤخوه دا زاخۆ ل 27 شواتێ باجه‌گا گران دا و نوكه ژى هه‌مان باج ب ره‌نگه‌گ دى، چه‌ند رۆژه رێڤنگ و سه‌یرانى ل زاخۆ یان یێن ب كێمى ڤه به‌رچاڤ دكه‌ڤن، ب ده‌هان جهێن سه‌یرانان هاتن گرتن و ژبلى ئه‌و پێشه‌یێن په‌یوه‌ندى ب سه‌یرانان ڤه هه‌یى، هه‌مى یان ژ كاركه‌فتن یان پشتى ده‌مه‌ك دى هه‌مى دێ هه‌ره‌سا خوه راگه‌هینن. راسته مه چو ئامار نینن ده‌رباره ئه‌و كه‌سێن زیانمه‌ند ببن ژ ڤێ روودانا دلته‌زین، لێ مسۆگه‌ر بێ ره‌وشیه‌ك ئه‌ڤه چه‌ند رۆژه ب زاخۆڤه دیاره و خه‌لكێ زاخۆ چه‌ندێن ساله هنده‌ك ژێرخانا سه‌یران و گه‌شتان ل دووڤ شیانێن خوه دروست كریه. قه‌ت قه‌ره‌بۆیا گیانان ناهێته‌كرن ب هیچ ره‌نگى لێ قه‌ره‌بۆیا باژێره‌كێ گه‌شتیارى و وه‌ك زاخۆ پێدڤى ب راوه‌ستیانه‌كێ یه. ب چى ره‌نگى جاره‌كا دى باوه‌رى و سه‌ر راستى بهێته‌كرن كو زاخۆ یا ئارامه و ئه‌ڤا بووى روودانه‌كه دوباره نابیت. بێگومان ئه‌ڤ پشتراست كرنه ئاسان نینه و پێدڤى ب هه‌وه‌كا مه‌زنا (عه‌لاقات عامه)یه ل سه‌ر ئاستێ فه‌رمى و جه‌ماوه‌رى. زاخۆ ب گرانى باجا ڤێ سه‌ركێشیا له‌شكرێ داگیركه‌رێ توركیا نوكه دده‌ت، نه‌مازه ل ڤێ وه‌رزێ گه‌شت و سه‌یرانان كو ره‌نگه ب ملیۆنا دۆلار ژ كیسێ زاخۆ چوون. ئه‌گه‌ر مه پیجه‌كا باوه‌ریێ ژى ب (مۆئامه‌را) هه‌بیت وه‌ك هنده‌ك بۆ دچن دوور نینه كه‌رتێ سه‌یرانان ل كوردستانێ هه‌میێ ئارمانج بیت د قازانجا جهه‌ك دى دا. زاخۆ پێدڤى ب قه‌ره‌بۆیه‌كا بله‌ز و زانستى و گه‌ره‌نتى یه، بۆ جاره‌كا دى ژیان ڤه‌گه‌ریێت بزاڤا بازارى و گه‌شت و سه‌یرانان…
