ئیراقا لاواز
كۆڤان حسێن
ژبلى هنده‌ك سه‌رده‌مێن به‌روه‌خت و كورت د هنده‌ك گه‌شێن دیاركرى دا ڤى وه‌لاتێ ده‌ستكرد یێ دبێژنێ ئیراق هیچ جاره‌كێ وه‌لاته‌ك بهێز و كاریگه‌ر نه‌بوویه ل ڤێ ده‌ڤه‌رێ، بێى بێن سه‌ده‌ما ب كوردى هه‌مى بۆ هندێ ڤه‌دگه‌ریت د ناڤخوه دا یێ خاڤ و نه (متجانسه) و كاره‌سات ژى ئه‌وه هه‌تا نوكه ژى ئه‌ڤێ راستیێ وه‌رناگریت و د هنده‌ك وه‌همێن سه‌رده‌مێ (نبۆخه‌ز نوسسه‌ڕ) دا دژیت. كو وه‌لاته‌ك بێ كێماسییه. هندێ ژبیر دكه‌ت خه‌لكه‌كێ هیچ مێژوویه‌ك نینه، بووینه وه‌لاتێن رێزدار و خودان كاریگه‌رى ل جیهانێ نموونه ژى زۆرن. ئه‌ڤ ئیراقه ژ قه‌یرانێ بۆ قه‌یرانێ د ناڤبه‌را هه‌ر قه‌یرانه‌كێ دا ژى كاره‌ساته‌ك. ئه‌ڤه پشكه‌كا راستیا ڤى وه‌لاتییه كو نه‌شێت لۆمه‌ى كه‌سێ ژى بكه‌ت، ژ خوه پێڤه‌تر، چونكو هه‌مى ره‌گه‌زێن وه‌لاته‌كێ سه‌ركه‌فتى و بهێز و رێزدار لێ هه‌نه. جارێ مه گرتى كورد نه ل ئیراقێ نه ژى، بێى كورد ئیراق ژیا نه‌كه هه‌یى باشتر نه‌دبوو نموومه 10 ساله كوردستان ئابلۆقه داى مێتره‌ك ل شاره‌عێن خوه زێده نه‌كریه.
ئه‌ڤ ئیراقا ئه‌م ژ ڤى ئالى ڤه لاواز و بێ كاریگه‌رى دبینین و وه‌سایه و نوكه ل په‌راوێزێ یه و بتنێ پروتوكۆلى ده‌وله‌ته و پڕانیا ناڤه‌رۆكا خوه‌یا هه‌ى ژى د ڤان 30 سالێن بۆرى دا هندا كریه. لێ ئه‌وا راست بیت بۆ كوردستانێ بهێزه و ب شیانه و ب ئالیه‌ت و كێلب و ددانه و هه‌مى شیانێن خوه‌یێن ده‌وله‌تدارى ئه‌وێن به‌رامبه‌ر جیهانێ و ده‌ڤه‌رێ هندا كرین ل كوردستانێ بكاردئینیت و ب پشته‌ڤانیا بێ سنۆرا تركا و ئیرانێ. ئیراق بۆ گه‌لێ كوردستانێ رۆژه‌كێ ژى لاواز نه‌بوویه هه‌مى گاڤێ تێرا هندێ شیان یان هه‌بوونه یان بۆ په‌یداكرینه سه‌رپێچیا ماف و داخوازێن كوردستانێ و خه‌لكێ وێ بكه‌ت ژ سه‌رده‌مێ مه‌لیك مه‌حموودى هه‌تا نوكه. سیاسه‌تكرن ل گه‌ل به‌غدا بۆ سیاسیێن كورد ئێك ژ زحمه‌ترین سیاسه‌تایه ئه‌وان باوه‌رى ب سیاسه‌تا (التقنیه الشرعیه) هه‌یه كو پره‌نسیبه‌ك تایبه‌ته ب بژاره‌یا عه‌ربان ڤه كورتیا وىِ ئه‌وه. ئیمزا بكه و جێبه‌جێ نه‌كه، سۆزان بده و بجه نه‌ئینه و هه‌تا دوماهیێ ره‌ڤینه ژ هه‌ر رێكه‌فتنه‌كێ.سه‌رگه‌ردانكرنا كوردایه ب درێژیا سه‌د سالان و ئه‌ڤه هه‌تا دگه‌هیته وێ سیاسه‌تێ یا به‌رمبه‌رى وان ژێ بترسیت بۆ نموونه ئابلۆقه‌دان و برسیكرن كو پیسترین ره‌نگێ شه‌ڕی یه بتنێ یێن بێ مۆرال و لاواز ژ سه‌رجه‌مێن حه‌قانى و سه‌ركه‌فتنێ په‌نایێ دبه‌نه به‌ر. ئه‌ڤجا ئیراق بهه‌ڕفیت ژى بۆ كوردستانێ ده‌وله‌ته و بهێزه ژى. جارێ نوكه و پاشى ژى گه‌له‌ك جێواز نابیت.
