بێ چاڤ
نایف مەحموود
دبیت خواندەڤانێ هێژا وەسا تێ بگەهیت بێ چاڤ ئانكو كۆرە، یانژی كەسەكی چاڤێن خۆ ژ دەست دا بن و ژ خۆشیا دیتنێ یێ بێ باربیت، هەلبەت نەخێر، وە ل گۆر داڕێتن و پۆختەیا بابەتی دێ شرۆڤەكێ دەینە ڤی ناڤ و نیشانی.
وەك ئیدیەمەكێ مە یێ كوردەواری (بێ چاڤ) بۆ وان جۆرە مرۆڤان دهێتە گۆتن و ب كار ئینان یێن كو چ تشتا ل پێش چاڤێن خۆ نەبینن، ئانكو یێن بێ منەت ژ قەنجی و باشیا هەر كەسەكی لێ كری، ل خۆ دیار ناكەن سوپاسیا خەلكی بكەن دەربارەی وێ هاریكاری و قەنجیا لێ هاتیەكرن، جاران ژی وەك خۆ مەزن دیتنەك دێ پاتكا خۆ دەنە وی كەسی یێ جارەكێ پشتەڤانی لێ كری و ژ كێشە و گرفتەكێ قۆرتال كری.
زۆر جاران هەكە مرۆڤ ب زەند وباسكێن خۆ ب تنێ ب خۆڕیت و منەتێن خەلكی بهاڤێژیتە بەتەنێ ل وی دەمی ئەم دبێژینە ڤان جۆرە مرۆڤان فلان كەس كەسەكێ بێ نان و خوێ یە، قەنجیێ زوی ژ بیر دكەت.
خۆیایە كو د ڤێ ژیانێ دا ئەم دێ پێدڤی ب هەڤ دو بین، هەموو تەخ و چینێن جڤاكی پێدڤیا یا ب ئێك و دو هەی، ج چار ئەم ب دەستەكی بتنێ نەشێین بۆ سەرێ چیای بچین و ل سەر داران سەركەڤین، لەوما ئەڤ ژیانە وێ چەندێ ژ مە دخازیت كو چەنگێ هاریكاری و پشتەڤانیێ بۆ هەڤ ڤەكەین، وەختێ مە خۆ د ڤی مەودای و ڤی بازنەی دا دیت، پشتی هینگێ نابیت ئەم خۆ بێ منەت كەین وەك مرۆڤێن بێ چاڤ بهێینە پێناسەكرن، ئەوێن ل وەختەكی د كاودانێن نەخۆش دا و پێدڤی ب دەستەكێ هاریكاریێ و پاشی پشتی خۆ ل ئاستەكێ دی یێ پێهەلتر دبینیت یانژی ژ وێ گرفتاریێ دەردكەڤیت، دێ بینی پشتا خۆ دا وی یێ هاریكاریا وی كری، نانێ وی خواری و هەتا دووماهیێ بەس دڤێت ژبیر نەكەین ئەڤان كەسان بهایێ خۆ نامینیت و ژ سەنگ و پێگەهێ خۆ یێ ڕاستەقینە بچووكتر لێ دهێن، ئەم ژی دبێژین ب مخابنی ڤە ئەڤ كەسە وەكی دندكا نیسكێ نە، نە بەرە و نەپشت، حەتا دگەهیتە وی ڕادەی ئەڤ میناكێن بێ چاڤ یێن كو قەنجی لێ كری دێ ڕابن پشتی هینگی بەرا هاڤێژنە وێ كانیا ئاڤ ژێ ڤەخواری و شێلی كەن. ڕاستە مە پەندەكا كوردی هەیە دبێژیت قەنجیێ بكە و ب ئاڤێ دا بەردە، بەس جاران ژی دبیت مرۆڤ هندەك وانە و پەیامان بگەهینیتە خودانێن ڤی سەخلەتی داكو ب خۆ ب حەسیێن و بزان ئەڤ سالوخەتە هێژای ڕەخنەگرتنێ یە، هێژای هندێ یە مرۆڤ بێژیتە ڤان كەسان ئەڤە نیشانێن نە ڕەوشەنبیری و ئاست نزمیەكێ یە ل دەف وان.
