بەلاڤكرنا پارچەیێن ئەردی ل زاخۆ دێ دەستپێكەت
زاخۆ، دلۆڤان هالۆ:
وەزیرێ باژێرڤانی و گەشتوگوزارا حكومەتا هەرێما كوردستانێ ئاشكرا كر، ل ئیدارەیا سەربخوە یا زاخۆ دەست ب بەلاڤكرنا پارچەیێن ئەردی ل سەر فەرمانبەران دێ هێتە كرن، چونكی زەڤیێن پێدڤی ل وێ دەڤەرێ د ئامادەنە.
ساسان عەونی، وەزیرێ باژێرڤانی و گەشتوگوزارێ گۆت: «دام و دەزگەهێن ئیدارەیا سەربخوە یا زاخۆ سەرجەمێ ئامار و زانیارییان ڕادەستی مە كرینە، لەوما دەستپێكێ ل وێ دەڤەرێ پارچەیێن ئەردی دێ هێنە بەلاڤكرن، پاشی مە ل بەرە ل هەولێر و دهۆك و سلێمانی و حەلەبچە دەست ب بەلاڤكرنا پارچەیێن ئەردی بكەین».
گۆتژی: «هێشتا هندەك وەزارەتان ئامار و زانیاری ڕادەستی وەزارەتا باژێڕڤانی و گەشتوگوزارێ نەكرینە، لەوما ئەڤ چەندە بوویە ئاریشە ل هەمبەر پرۆسێسا بەلاڤكرنا پارچەیێن ئەردی، بۆ ڤێ مەرەمێ لیژنەیەكا بلند، سەرپەرشتیا چارەسەركرنا ئەڤێ ئاریشەیێ دكەت، هیڤیدارین د نێزیكترین دەم دا سەرجەم فەرمانبەر ببنە خودان پارچەیێن ئەردی».
