ب سەرفەرازی و پارەیێ حەلال خێزانا خۆ ب خودان دكەم
دلڤین رەشید
بۆیاغچی (كاوە سەدیق مستەفا) د دیدارەكێ دا بۆ رۆژنامەیا ئەڤرۆ گۆت: ئەز خەلكێ باژێرێ دهۆكێ مە و ئەڤە دەمەكە كارێ بۆیاغكرنا پێلاڤان دناڤ بازاڕێ دهۆكێ دا دكەم، ژبۆ هندێ دا خێزانا خۆ پێ ب خودان بكەم، راستە ئەڤ كارە هەموو پێدڤێن ژیانا من پڕ ناكەن، بەلێ یا گرنگ ئەوە خودان كارێ خۆ یی سەربەخۆمە و رۆژنە سپێدەهیان ژ خەو ڕادبم و سندوقا خۆ یا بچووك رادكەم و بەرەف ناڤ بازاڕی دچم و ب دلەكێ پڕی هیڤی و ڤیان دەست ب كارێ خۆ دكەم و پێلاڤێن خەلكێ بۆیاغ دكەم و كەیفا وان ژی خۆش دكەم، چنكو پشتی بۆیاغكرنێ پێلاڤێن وان نوو و پاقژدبن.
هەروەسا گۆت: راستە ژیانا نوكە ب زحمەت كەفتیە، ب تایبەت ژی ژبۆ فەقیر و هەژارن، بەلێ یا گرنگ ئەوە ئەم بشێن خۆ ل سەر پێن خۆ بگرین و بەردەوامیێ بدەینە ژیانا خۆ، لەورا داخوازێ ژ هەر كەسەكی دكەم هەكــــــــــــە خۆدی ساخلەمیەكا باش دابیتێ بلا بۆ خۆ كار بكەن و ب سەرفەرازی و ب پارێ حـــــــــەلال خێزانـــــــــا خۆ خودان بكەن.
