ب وێنه: كارمه‌نده‌كێ رۆژناما ئه‌ڤرۆ وه‌غه‌را دووماهيێ كر
ئه‌ڤرۆ نيوز:
شڤێدى ل ئێك ژ نه‌خۆشخانێن هه‌ولێرا پايته‌خت ژ ئه‌گه‌رێ نه‌خۆشيه‌كێ ئێك ژ كارمه‌ندێن رۆژناما ئه‌ڤرۆ وه‌غه‌را دووماهيێ كر و ل گورستانا شاخكێ ل دهۆكێ هاته ڤه‌شارتن.
نزار تاهر جانگير دۆسكى، ديزاينه‌ر ل رۆژناما ئه‌ڤرۆ پشتى رۆژا پێنجشه‌مبيا بۆرى تووشى كێشه‌يه‌كێ د دلێ خوه دا بوويى، ره‌وانه نه‌خۆشانا ئازادى ل دهۆكێ هاته كرن و ژ به‌ر كو ئه‌و نشته‌رگه‌ريا پێدڤى كو بۆ بهێته كرن ل دهۆك نه‌بوو، ل رۆژا سێشه‌مى ب نه‌چارى ره‌وانه‌ى نه‌خۆشخانا دلى ل هه‌ولێرا پايته‌خت هاته كرن.
وێنێ ره‌حمه‌تى ل نه‌خۆشخانا دلى ل هه‌ولێرا پايته‌خت به‌رى به‌ر ب نشته‌رگه‌ريێ ببه‌ن
ل رۆژا چارشه‌مبى رێكه‌فتى 7ى كانوونا ئێكێ ل نه‌خۆشخانا و ل دانێ پشتى نيڤرۆ ل ده‌مژمێر 2:30 ده‌قيقه بره د ژورا نشته‌رگه‌ريێ ڤه ژ به‌ر ئه‌و كێشا د دلێ وى دا دروست بووى كو قه‌باره مه‌زن ببوو”تضخم” به‌لێ ب مخابنى ڤه ژ وێ نشته‌رگه‌ريێ ده‌رنه‌كه‌فت و ل ده‌مژمێر 7:00ى شه‌ڤ دلێ وى ژ لێدانا راوه‌ستيا و ب ئێكجارى ژ ناڤ هه‌ڤال و دوستێن خوه باركر.
نزار دۆسكى ژ دايكبوويێ 1970 بوو و هه‌ر ل ده‌سپێكا سالێن نۆتان ل سه‌ر ده‌مێ رۆژناما په‌يمان وه‌كو كارمه‌ند كاركريه و ل ده‌مێ نه‌مانا رۆژناما ناڤبرى و ڤه‌بوونا رۆژناما ئه‌ڤرۆ ژى كو درێژه‌پێده‌را وێ بوويه، ل سه‌ر ئه‌ركێ خوه يێ به‌رده‌وام بوويه و ب درێژاهيا وى ماوێ درێژ ل پشكا پێشوازى و تيپچن و پاشان ژى وه‌كو ديزاينه‌ر كار كريه.
