تێكچوونا شۆڕشا ئیلۆنێ نەخۆشترین رۆژ بـوو دژیانا من دا
سێمێل: سالار محەمەد دۆسكی:
1-4
پێشمەرگەیێ شۆڕشا مەزنا ئیلۆنێ ژ بەتەلیۆنا نەعمو سەمەد بەحسێ چەند بیرهاتنێن خوەیێن پێشمەرگاتیێ و رۆژێن سەختێن ژیانا خوە دكەت.
سمائیل زوبێر محەمەد ئەرتووشی، پێشمەرگەیێ شۆڕشا مەزنا ئیلۆنێ دیدارەكێ دا ل گەل بەرپەڕێ دیرۆك یێ رۆژنامەیا ئەڤرۆ گۆت: من ژیانا خوە یا زارۆكینی ل گوندێ هاجنسێ دەربازكریە وی دەمی ئەم دناڤ شورشێ دابووین، و دەمێ مەلا مستەفا بارزانی هاتیە دەڤەرێ بیرا من دهێت بەلێ وی دەمی گەلەكێ بچوویك بووم وەكی خەونێ ل بیرا منە و خەلكی گەلەك پشتی وێ چەندێ بەحس ل هاتنا وی و پێشمەرگەی دكر، وی دەمی مەرەما مەلا مستەفا ژ دەڤەرێ دەرباز بوون بوو بۆ وەلاتێ سوریێ، و دووڤ دا زڤری و قەستا دەڤەرا بەرواری یا كر، بیرا من دهێت لەشكرێ حوكمەتا ئیراقێ هات و ئەڤە ب تنێ بیرهاتنە وی دەمی گەلەكێ بچوویك بووم، وەك پێشتر من ئاماژە پێكری و لەشكرێ ئیراقێ چوو ناڤ بەرواری یا و هەتا كانی ماسێ چوون، وی دەمی (رەشید ئاغا) و (رەشویێ سمۆ) سەرقول بوون، وی دەمی بابێ(خالد كوچەر) شەهید بوو و بەرامبەر حوكمەتێ راوستیان و لەشكرێ حكومەتا ئیراقێ هاتە شكاندن، و كورد ب هێزكەفتن وی دەمی گوند هاتبوونە بەردان و رۆژ بۆ رۆژێ پێشمەرگە بەرەڤ بهێزبوونێ ڤە چوو، و دوبارە خەلكی قەستا گوندێن خوە كرنە ڤە و ئەم ژی وەكی هەر گوندەكێ كوردستانێ چووینە سەر گوند و وارێن خوە.
سەعیدێ خەلیل هات و بارەگایێ خوە دانا گوندێ شاوریكێ و فەرمان دا هەر كەسەكێ چەك هەبیت بلا چەكێ خوە ب هەلگریت و ئەگەر چەكێ خوە نەهەلگریت پێدڤی یە وی چەكی بدانیت، وی دەمی برایێ من خدر خودێ ژێ رازی بیت تڤەنگەك هەبوو و پێشمەرگە بوو، و شۆڕش رۆژ ب رۆژێ ب هێزتر كەفت، و خەلكێ كوردستانێ گەلەك ب دلەكێ بەرفرەە و مەزن پشتەڤانیا شۆڕشێ كر و هەر ئێكی ل دووڤ پێچێبوون و شیانێن خوە، و ل سالا 1967 ل ژیەكێ بچوویك و گەنج من قەستا ناڤ رێزێن شۆڕشا ئیلۆنا مەزن كر، وی دەمی چەند پێشمەرگەیێن ل دەڤەرا دهۆكێ هاتنە خوارێ و بوونە چەتە.
هەمان پێشمەرگەی گۆت: وی دەمی مامێ من (نەعمو سەمەد، خەلۆ مراریا، محەمەدێ حەجی بەدەل) نێزیكی 20 مرۆڤێن مە ل گەل هاتبوونە دەستەسەركرن، و ئەڤە ل سالا 1961 هاتبوونە گرتن، و سێ سالان ل بەغدا مانە زیندانكری، و مامێ من دگۆت هەر حەفتیێ بوو مە رۆژنامە دئینان ب پێنچ دیناران و دگۆتن ئەم ل فازلیێ بووین، و ل گوڤێن دەواران دا هاتبوونە زینداكرن و تێدا دنڤستن، هەر ل دووڤ گۆتنا وان جارەكێ ل دەمێ دانوستاندێن شۆڕشا ئیلۆنێ ل گەل حوكمەتا ئیراقێ یا وی سەردەمی گۆتنێ ناڤێن خوە بنڤیسن كا كی پارتی نە و بەلێ ب مەرجەی شوعی ناڤێن خوە نەنڤیسن، و ئەوێن پارتی گۆتنێ ئەڤە هەڤالێن مەنە، و رەنگە خەلكێ ئێك دەڤەر بووینە بۆچی ناڤێ وان نەنڤیسن و مامێ من ناڤێن وان چەندین شوعیان كرنە دلیستێ دا وەكی پارتی دانەنیاسین دا بهێنە ئازادكرن، و پشتی ئازادكرنێ هەر زیندانیەكی دو دەفكێن ریها و پارچەكا سابینێ و دو دینار دانێ و دووڤدا هاتنە ئوتێلێ و پشتی ماوەكێ كورد (عەلی شنگالی) خودێ ژێ رازی بیت هاتە ئوتێلێ و هەر هەمی ئاگەهداركرن كو هەر زووی خوە قورتال بكەن چونكە حوكمەتا ئیراقێ یا بزاڤا گرتنا هەوە دكەت و هەر زووی هەمی ب ترۆمبێلان بەرەڤ مویسل هاتن و بۆ دهۆك و گەهشتنە تاخێ كوچەرا و قەستا مالێن خوە كر، مامێ مە (نەعمو صەمەد) گۆت دووڤ دا هاتمە ئاگەهداركرن ژلایێ مرۆڤەكێ مە ڤە ب ناڤێ (خورشید بریفكی) كو ژ مال دەركەڤم و خو قورتال بكەم چونكە حوكمەت بزاڤا گرتنا من دكەت و نەچاربوو قەستا مالا (حەسەن مریەما) كر ل گەڤەركێ و هەر وێ شەڤێ پەیوەندی ب شۆرەشێ كر و چوو بۆ كادر وی دەمی گەلەك هاریكاریا شۆرەشێ كر و (نوك و ساڤار، نیسك) كرین بۆ پێشمەرگەی.
پێشمەرگەیێ شۆرشا مەزن یا ئیلۆنێ هەروەسا گۆت: ئەسعەد خوشەڤی مامێ من (نەعمو سەمەد) گازی كر وگۆتێ مە توو دانایە جهێ (رەشید ئاغایێ شەرەفا)، و دووڤدا (نەعمو سەمەد) هاتە قەشەفرێ وی دەمی (خەلیل مراری) ژی ل گەل بوو و رۆژ ب رۆژێ خەلكێ دەشتێ گەهشتنێ و بەرەڤ زێدەبوونێ دچوون و سەعید خەلیل چوو و عەلی خەلیل هاتە جهێ وی، وی دەمی دگۆتنێ سەرقوول و (نەعمو سەمەد) بوو سەرقوول، (عەریف سلێمان زێوی) خودێ ژێ رازی بیت ل گەل پێشمەرگەیێن ل گەل دا پلانەك دانا ب شەڤ بهێن دربەكی ل (كانی سپیێ) بدەن، ئەڤە د ناڤبەرا سالا 1966ێ بوو و ئەز ل گەل بابێ خوە ژ گەلناسكێ هاتین و چەندین كەسایەتی بوون (حەجی عەبدی، مەلا قاسم، غازی میسێ) دانە سیندێ و گۆتێ بەحسێ من نەكەن، و گۆتێ بژڤانن هێرش بكەینە كانی سپیێ و ئەم ب شەڤ هاتین و ئەم سپێدێ چووینە مالا (عەمەر ئاغای) ل گوندێ (دارێ) و مە تێشتا خوە خوار و ئێكی دگۆتنێ بەكر بسمامێ مە بوو، ل گەل چەندین پێشمەرگەیان ئەو دەركەفتن و چوون و ل (كانی سپیێ) كەرەكێ پەزی ب سەركەفت و سپێدە زووی بوو، و تڤەنگ هاڤێتن و بەرێ پەزی كەفتە چیایی و پشت پێشمەرگەی كەفت و ئێدی بوو شەر خالێ من (رەشو) برایێ دایكا من بوو و تڤەنگەك ل ملێ وی دا و كەت و مامێ من (نەعمو) هات و گۆت دا بچین وی دەمی پێشمەرگە بووم، و ئەم هاتین شەرە و ئاگر بەربوو دەشتێ وچەتە هاتن و بوو قیامەت و جەلالی هاتن وی دەمی ل سێمێلێ بوون و ل گەل حوكمەتێ بوون، عەریف سلێمان زێوەی ئێڤاری چو و سێ توپ ژ دەف (عیسێ سوار، حسۆ میرخان، عەلیێ خەلیل) ئینان ب وێ مەرەمێ ئینان كو ب هاڤێتە (كانی سپیێ) هەتا وی دەمی سەرقول بوون، و پاشی بەتەلیۆن هاتنە پێكئینان.
هەمان پێشمەرگەیێ شۆڕشا مەزنا ئیلۆنێ ئەو ژی گۆت: وی دەمی سەرقول محەمەد حەسەن باجلوری، حەسەنێ عەلی، نەعمو سەمەد، فارس كورەماركی، ئەڤە هەمی سەرقول بوون و هەر ئێكی 40 بۆ 50 پێشمەرگە ل گەل بوون، (عەلیێ خەلیل) هێزا دهۆك بوو و (عیسێ سوار) هێزا زاخو بوو، ( حسو میرخان) هێزا شێخان بوو و (ئەسعەد خوشەڤی) بەرپرسێ هەمی هێزا بوو و (سەلیم ئەسعەد) ئامر هێزێ ئامێدیێ بوو.