جـڤاکـەکێ چـاڤلێکـەر
تارق عەبدال
هەر جڤاکەک ب ھندەک پرەنسیپ و داب و نەریتان دھێتە نیاسین، هەلبەت دناڤ جڤاکێ کوردەواری دا گەلەک تشێن جوان و ماقویل هەنە، ب خۆشحالیڤە ئەم کورد خودان کلتور و دیروکەکا مەزن و پاڤژین و ب درێژاھیا دیروکێ مە هەبوونا ناسناما خوە پاراستیە، ژبەرکو تاکێ کورد ب گشتی د هەر سەردەمەکی دا زور ب ھشیاری و زانابون سەرەدەری دگەل داب و نەرتێن خوە یێن رەسەن کریە، سەرەڕای وێ چەندێ کو هەردوو وەلاتێن زلهێزێن دەوروبەرێن مە، وەک تورکیا و ئیران، د هەمی دەمان دا دگەل شەڕ و جەنگان دژی مە بووینە و هەموو بزاڤ و پێکول کرینە ب هەر ێیەکا هەی دیروک و شارستانیەتا مە بکەنە ملکێ خو یان ژناڤ ببەن ئەڤە ژلایەکی ڤە و ژلایەکێ دیترڤە بزاڤێن بەردەوام کرینە کو دەست بێخنە دناڤ هەر تشتەکێ گرێدایی کلتور و داب و نەریتێن مە، بەلێ شکەستن ئینایە.
بەلێ ب مخابنیڤە د نهادا بزاڤێن بەردەوام دھێنە کرن ب رێک و شێوازێن جودا کارتێکرنێ ل مە بکەن، ئەوژی بناڤێ جیهانگیری و پێشکەفتن و خۆ گونجاندنێ دگەل پێشڤەچونێن ئەڤرو سەرانسەری جیهانێ هەین د هەموو سیکتەرێن ژیانێ دا ب بهانەیا وێ چەندێ کو داب و نەریتێن مە دکەڤنن و دگەل سیستەمێ ژیانا ئەڤرو ناگونجن، بەلێ د راستی و جەوهەری دا وەسا نینە، بەلکو ئەڤە جورە فێلکرنەکە ل جڤاکێ مە دھێتە کرن ئەوژی بڤان رێ و شێوازا بزاڤان دکەن ئەو حەز و ڤیانا مە کوردان هەی ل هەمبەری کلتور و شارستانیەتا خو لاواز بکەن و ھێدی ھێدی ژناڤ ببەن.
کاکلکا ڤی بابەتی ئەوە کو ئەم کورد مللەتەکێ چاڤلێکەرین ب تایبەتی دڤان چەند سالێن داویێ دا ئەڤ دیاردەیە پەیدابویە و سال بو سالێ بەر ب زێدەبونێ ڤە دچیت، مە ل دەستپێکێ ب زەلالی بەحسێ فاکتەرێن دەرەکی کر ئەوێن دبنە ئەگەرێ ژناڤچونا کلتور و داب و نەرتێن مە، بەلێ بتنێ ل وێرێ نەراوستیا بەلکو ئەڤەژی لێ زێدەبوو، ب دیتنا من ئەڤا چاڤلێکرنێ ژ هەموویان خرابتر و مەترسیدارترە بوچی؟ ژبەرکو ئەڤە بلەزتر بەلاڤ دبیت و کارتێکرن و زیانێن وێ مەزنترن ژ یێن دیتر، لەورا ژی دڤێت ھندەک سنور و سانسور بهێنە دانان ژلایێ سازیێن میریڤە و هەر تشتەکێ دگەل داب و نەریتێن جڤاکێ کوردەواری نەگۆنجیت، دڤێت رێگری لێ بهێتە کرن و یاسا و ریسا و رێنمایی بو بهێتە دەرکرن هەر کەسەکێ سەرپێچیا وان یاسا و رێنمایان کر، بهێتە سزدان دا کەسەکێ دی وێرەکیێ نەدەتە خۆ وان سنوران بەزینیت یێن دبنە ئەگەرێ تێکدان و شێواندنا کلتور و داب و نەریتێن مە، ژبەرکو هەر مللەتەک ب کلتور و زمان و داب نەرتێن خو دھێتە نیاسین.
