جڤاتا روحانی یا ئێزدیان نەختێ کچێ دیاردکەن
بێوار حەمدی:
شارەزایەکێ جڤاک و ئایینێ ئێزدیان دیار کر کو قەلەنێ نوکە، ب بڕیارا جڤاتا روحانیا یا سالا 2012 ل قەزا شێخان، لدویف غراما زێڕی هاتیە دەستنیشانکرن و گۆت: هەر ژ کەڤندا و هەتا نها، جڤاتا روحانیا نەختێ کچێ دیار دکەت.
هوگر حەیدو، شارەزایێ جڤاک و ئایینێ ئێزدیان، د دیدارەکێ دا بۆ رۆژنامەیا ئەڤرۆ دیار کر کو مەبەست ژ هەڤژینیا ب قەلەن، ئانکو نەختێ کچێ و خواستنا مال و دراڤێ دونیایێ یە ژلایێ مالا بابێ بووکێ ڤە بۆ مەهرێ، و ئەو دراڤە دبیتە ل شوونا سۆزا زەلامی بۆ ژنێ و گۆت: ژێدەرێ ناڤێ مەهرێ ژی ژ (میترا) هاتیە، کو خودانێ سۆز، پەیمان و پێکڤەگرێدانێ بوو.
هوگر حەیدو د بەردەوامیا ئاخفتنێن خۆدا دیار کر کو قەلەنێ بەرێ ژلایێ جڤاتا روحانیاڤە ب 75 غرامێن زێڕی بوو، لێ د نها دا و لدووڤ بڕیارا جڤاتێ، نەخت بوویە 40 غرام.
حەیدو گۆتژی: قەلەنێ نها ژی هەر ب بڕیارا جڤاتا روحانیایە ل سالا 2012 ل قەزا شێخان هاتیە دەستنیشانکرن لدووڤ غراما زێڕی، ژبەر هندێ گوهۆڕین ب سەردا دهێن، و د بەرێ دا و هەتا نها ژی هەر بڕیار یا جڤاتا روحانیایە.
هوگر حەیدو زێدەتر گۆت؛ د بەرێ دا و لدووڤ مەرج و بڕیارێن وان ل سالا 1968ێ، دەمێ قەلەن دهاتە بڕین، هندەک ژ ڕوی سپی و مەزنێن گوندی دگەل مالباتا بووکێ کۆم دبوون، و لدووڤ شیانێن مالا زاڤای قەلەن دەستنیشان دکر؛ ژبەر کو ل وی دەمی هەژاری و دەست کورتیەکا زۆر هەبوو.
ل دوماهیێ ژی شارەزایێ جڤاکی گۆت ( دبەرێدا لدویڤ شەرت وڤەبڕێن وان لسالا 1968 دەمێ قەلەن دهاتە ڤەبڕین دا هندەک ژ مەزنێن گۆندی وماڵباتا بوکێ کومبن و لدویڤ شیانێن ماڵا زاڤای قەلەن ڤەدبڕی ژبەرکو ل وی دەمی هەژاری ودەستکورتی بوو)
