جڤاتا نوونه‌رێن عيراقێ ده‌ست ب روونشتنا خوه ل دۆر بودجه‌ى كر
ئه‌ڤرۆ نيۆز:
به‌رى ده‌مه‌كى جڤاتا نوونه‌رين عيراقێ ب به‌رهه‌ڤبوونا 169 په‌رله‌مانتاران ده‌ست ب روونشتنا خوه ل دۆر بۆدجا گشتى يا عيراقێ بۆ سالا 2018 كر.
سه‌رحان سلێڤانى ئه‌ندامێ لژنا دارايى ل جڤاتا نوونه‌رين عيراقێ ژفراكسيۆنا پارتى گۆت، برياره خواندنا ئێكێ بۆ پرۆژێ قانوونا بودجێ بهێته كرن وكورد ژى دێ پشكداريێ دروونشتنێ دا كه‌ن، چونكى تنێ خواندن دێ بۆ هێته كرن ودانوستاندن ل سه‌ر ناهێته كرن، به‌لكو دێ راده‌ستى لژنا دارايى هێته كرن.
سه‌رحانى زێده‌تر بۆ وشه گۆت، دپرۆژێ قانوونا بودجێ گشتيێ عيراقێ دا، سته‌مه‌كا مه‌زن ل هه‌رێما كوردستانێ هاتيه كرن، چونكى حوكمه‌تا هه‌رێما كوردستانێ ژ روويێ دستوورى ڤه دانپێدان يا پێ هاتيه كرن وحوكمه‌تا عيراقێ ناڤێ وێ نه‌ئيناه وحيساب بۆ نه‌كريه، ژبلى وێ چه‌ندێ دێ ل دووڤ رێژا ئاكنجيێن پارێزگه‌هێن هه‌رێمێ به‌هرا بودجا هه‌ريما كوردستانێ هێته دان. هه‌تا نوكه ژى ناهێته زانين كا هژمارا ئاكنجيێن هه‌ريمێ چه‌نده، چونكى سه‌رژمێريا گشتى نه‌هاتيه ئه‌نجامدان.
دياركر ژى، دێ بزاڤێ ل گه‌ل فراكسيۆنێن دى يێن په‌رله‌مانى كه‌ين پرۆژه قانوونا بودجێ بزڤريت بۆ جڤاتا وه‌زيرێن عيراقێ وبه‌هرا هه‌رێما كوردستانێ ببيته 17% وه‌كو به‌رێ، چونكى ئه‌وا نوكه هه‌ى ئه‌وژى 12.67% جهێ قه‌بوولكرنێ نينه وئه‌وا وان داناى شه‌ش تريليۆن ديناره كو تێرا مووچێن فه‌رمانبه‌ران ناكه‌ت ودبيته 35% ژ مووچێن فه‌رمانبه‌رێن هه‌رێمێ بۆ هه‌ر هه‌يڤه‌كێ.
گۆت ژى، فراكسيۆنێن كوردستانى ل جڤاتا نوونه‌ران ل دۆر پرۆژێ قانوونا بودجێ ئێك هه‌لويستن، به‌لێ هه‌تا نوكه حوكمه‌تا هه‌رێما كوردستانێ بۆچوونا خوه ل سه‌ر وێ پرۆژى قانوونێ وگوهۆرينان نه‌دياركريه.
