حزبێن كوردستانێ نه‌شيان ل سه‌ر ئێك ليستيێ ل سنورێ مادا 140 رێككه‌ڤن
ئه‌ڤرۆنيوز، عه‌زيز هه‌ورامى:
ل سه‌ر داخوازيا حزبا زه‌حمه‌تكێشێن كوردستانێ، ل رۆژا 7 ڤێ هه‌يڤێ ل باره‌گايێ سه‌ره‌كيێ وێ حزبێ 11 لايه‌نێن سياسى كۆمبوون ورێككه‌فتن ل سه‌ر وێ چه‌ندێ كورد ب ئێك ليستێ پشكداريێ دهه‌لبژارتنێن عيراقێ دا بكه‌ن ل سنورێ ده‌ڤه‌رێن داگيركرى.
ئه‌ڤرۆ پێنجشه‌مبى 8/2/2018، ژبه‌ر به‌رهه‌ڤنه‌بوونا نوونه‌رێ مه‌كته‌با هه‌لبژارتنێن ئێكه‌تى نيشتمانى كوردستان دكۆمبوونێ دا، نوونه‌رێن هه‌ر سێ لايه‌نێن كۆمه‌ل وگۆران وهه‌ڤپه‌يمانى بۆ دادپه‌روه‌رى وديموكراسى كۆمبوون بجه هێلا.
سه‌لام كه‌ريم، به‌رپرسێ مه‌كته‌با هه‌لبژارتنێن بزاڤا ئيسلامى بۆ ئه‌ڤرۆنيوز گۆت” ئه‌ڤرۆ بۆ تمامكرنا كۆمبوونا دوهى يا لايه‌نێن سياسى، پتريا به‌رپرسێن مه‌كته‌بێن هه‌لبژارتنێن حزبان به‌رهه‌ڤى كۆمبوونێ بوون، تاكو بشێن ل سه‌ر نه‌خشه رێيه‌كێ رێبكه‌ڤن تاكو كورد ب ئێك ليست پشكداريێ دهه‌لبژارتنێن عيراقێ دا بكه‌ن ل ده‌ڤه‌رێن كوردستانى يێن داگيركرى”.
سه‌لامى گۆت ژى” ژبه‌ر نه‌به‌رهه‌ڤبوونا نوونه‌رێ ئێكه‌تيێ دكۆمبوونێ دا، نوونه‌رێن كۆمه‌ل وگۆران وهه‌ڤپه‌يمانى بۆ دادپه‌روه‌ريێ وديموكراسيێ كۆمبوون بجه هێلا، له‌وما چو ده‌مه‌كێ دى نه‌هاته دياركرن بۆ كۆمبوونێ وهه‌كه وان هه‌رسێ لايه‌نان كۆمبوون بجه نه‌هێلابا، دا دشيان دا بيت ئه‌و پرس بهێته ئێكلاكرن”.
ب ديتنا وى ئێدى دره‌نگه وكورد نه‌شێن ليسته‌كا هه‌ڤپشك وئێكگرتى ل وان ده‌ڤه‌ران دروست بكه‌ن.
